د امریکا ولسمشر ډونالډ ټرمپ د اوکراین پر ولسمشر ولودیمیر زلنسکي په سختو نیوکو کې ویلي، چې اوکراین نوي ولسمشر ته اړتیا لري.
رویټرز خبري اژانس راپور ورکړی، چې ټرمپ د شنبې په ورځ (د تلې ۱۸مه) په سپینه ماڼۍ کې له خبریالانو سره د خبرو پر مهال د روسیې د تېلو پر بنسټیزو تاسیساتو د بریدونو په اړه د زلنسکي پر تګلارې سختې نیوکې کړې دي.
ټرمپ ویلي: «زما په اند، اوس هغه وخت رارسېدلی چې اوکراین نوی ولسمشر ولري.»
هغه زیاته کړې، چې د روسیې پر تېلو چاڼځایونو د زلنسکي بریدونو د ډیزلو پر نړیوالې عرضې منفي اغېز کړی دی.
ټرمپ ویلي: «هغه غواړي د ډیزلو د سون توکو په نښه کولو سره زموږ د بزګرانو او مالدارانو لپاره ستونزې جوړې کړي، ځکه روسیه د نړۍ د اړتیا وړ ډیزلو لویه برخه برابروي.»
اوکراین په وروستیو میاشتو کې د روسیې د تېلو پر بنسټیزو تاسیساتو بریدونه زیات کړي دي. کییف هره اوونۍ سلګونه بېپیلوټه الوتکې د روسیې پر تاسیساتو، په ځانګړې توګه د تېلو پر زېرمو، ورولي، څو د مسکو پر تېلو ولاړ اقتصاد ته زیان ورسوي.
خو د امریکا ولسمشر ډونالډ ټرمپ تېره اوونۍ له خپل روسي سیال ولادیمیر پوتین سره په ټیلیفوني خبرو کې یوې هوکړې ته رسېدلی، چې له مخې به یې مسکو د ډیزلو پر صادراتو محدودیتونه لرې کړي او د امریکا د اړتیا وړ ډیزلو په برابرولو کې به مهم رول ولوبوي.
اوکراین له دې هوکړې سخت ناخوښ دی. ولودیمیر زلنسکي ویلي، د ډیزلو په اړه دغه هوکړه به «روسیه لا زړوره کړي».
زلنسکي ویلي، د جمعې په ورځ د پوتین او ټرمپ ترمنځ د ډیزلو د هوکړې اعلان د دې لامل شوی، چې مسکو لا زیاتې بېپروا کړنې وکړي.
کییف په بدل کې له واشنګټن غوښتي، چې پر مسکو فشار راوړي څو د څلور نیم کلنې جګړې د پای ته رسولو لپاره جدي خبرې پیل کړي.
په مقابل کې، ټرمپ څو ځله د زلنسکي پر هغو تګلارو نیوکې کړې چې دی یې ناسمې بولي، او د روسیې پر ځای یې د اوکراین پر وړاندې توند دریځ نیولی دی.
ټرمپ تر اوسه لږ تر لږه شپږ ځله په ښکاره د اوکراین د ولسمشرۍ ټاکنو د ترسره کېدو غوښتنه کړې ده. هغه د ۲۰۲۵ کال په فبرورۍ کې زلنسکي «بېټاکنو دیکتاتور» هم بللی و.
ولودیمیر زلنسکي د ۲۰۱۹ کال په مې میاشت کې د اوکراین ولسمشر شو. د هغه د ولسمشرۍ قانوني دوره پنځه کاله وه او باید په ۲۰۲۴ کال کې پای ته رسېدلې وای، خو له روسیې سره د جګړې د دوام او د پوځي وضعیت له امله نوې ټاکنې نه دي ترسره شوې.
د اوکراین پارلمان د روان لمریز کال په مې میاشت کې اعلان کړی و، چې د پوځي وضعیت پر مهال د ټاکنو ترسره کول ممکن نه دي.
