د افغانستان پخواني ولسمشر حامد کرزي د نجونو نړیوالې ورځې په مناسبت د نجونو پر زده کړو ټینګار کړی او ویلي یې دي، چې د هېواد د پرمختګ او پراختیا لپاره باید ټولو نجونو ته د زده کړو فرصتونه برابر شي.
کرزي نن (یکشنبه، د تلې ۱۹مه) په یوه پیغام کې ویلي، چې د نجونو پیاوړتیا د ټولنې ګډ مسوولیت دی او باید د هلکانو ترڅنګ د نجونو د پیاوړتیا موضوع هم له پامه ونه غورځول شي.
هغه زیاته کړې، چې افغانستان د ودې او پرمختګ لپاره تر هر څه ډېر د نجونو پیاوړتیا ته اړتیا لري او دا هغه مهال شونې ده، چې نجونې د زده کړو له ټولو فرصتونو برخمنې شي او د لوړو زده کړو په بشپړولو سره د خپل ولس او هېواد خدمت وکړي.
د افغانستان پخواني ولسمشر هیله څرګنده کړې، چې ژر تر ژره دې د نجونو پر مخ د ښوونځیو او پوهنتونونو دروازې پرانیستل شي، څو هغوی د خپلې پوهې، تخصص او مهارتونو له لارې د هېواد په پرمختګ کې ونډه واخلي او په نړیواله کچه د افغانستان د ویاړ لامل شي.
کرزي په خپل پیغام کې د افغانستان د لرغوني کلتوري تاریخ او د ښځو او نجونو د درناوي یادونه هم کړې او ویلي یې دي، چې افغانان په کورنیو او نړیوالو غونډو کې د ښځو او نجونو د مقام، بریاوو او زړورتیا یاد په ویاړ کوي.
د نجونو نړیواله ورځ هر کال د اکتوبر په ۱۱مه لمانځل کېږي. ملګرو ملتونو په ۲۰۱۱ کال کې دا ورځ په رسمیت وپېژندله او په ۲۰۱۲ کال کې د لومړي ځل لپاره ولمانځل شوه. د دې ورځې موخه د نجونو د حقونو ملاتړ، زده کړو ته د هغوی د لاسرسي پراخول، د جنسیتي نابرابرۍ پر وړاندې مبارزه او د نجونو پر وړاندې د تاوتریخوالي او تبعیض د مخنیوي لپاره د پوهاوي لوړول دي.
دا ورځ په افغانستان کې داسې مهال را رسېږي، چې د طالبانو حکومت د شپږم ټولګي پورته نجونې له ښوونځیو او ښځې له پوهنتوني زده کړو منع کړې دي.
د دغو محدودیتونو له امله میلیونونه نجونې له زده کړو بېبرخې شوې دي او د هغوی د زده کړو د حق د بېرته ورکړې غوښتنې د افغانانو او نړیوالې ټولنې له مهمو غوښتنو څخه دي.
