د پاکستان ولسمشر اصف علي زرداري په خیبر پښتونخوا صوبه کې د بېړني حالت د نافذولو منظوري ورکړې ده. د دې پرېکړې له مخې، په صوبه کې به د بېړنیو اقداماتو د پلي کېدو بهیر پیل شي.
د پاکستان د کورنیو چارو فدرالي وزیر محسن نقوي او د دغه وزارت د دولت وزیر طلال چوهدري د کابینې د پرېکړې اړوند لنډیز ولسمشرۍ ماڼۍ ته وړاندې کړی و.
تر دې مخکې، د یکشنبې په سهار د پاکستان فدرالي حکومت په خیبر پښتونخوا کې د بېړني حالت د نافذولو لپاره ولسمشر ته رسمي سپارښتنه کړې وه.
د پاکستان فدرالي کابینې د یکشنبې په ورځ تر غونډې وروسته په خپره شوې اعلامیه کې له لومړي وزیر شهباز شریف څخه غوښتي وو، چې ولسمشر ته مشوره ورکړي څو د وضعیت د جديت له امله د دغه هېواد د اساسي قانون د ۲۳۲ او ۲۳۴ مادو له مخې په خیبر پښتونخوا کې بېړنی حالت نافذ کړي.
د کابینې په اعلامیه کې ویل شوي، چې په خیبر پښتونخوا کې د امنیتي وضعیت خرابېدو او د ترهګرۍ پر ضد مبارزه کې د صوبایي حکومت د «قصدي بېپروايۍ او نه همکارۍ» له امله رامنځته شوي شرایط ارزول شوي دي. دا د فدرالي حکومت ادعا ده.
فدرالي حکومت وايي، په صوبه کې د امنیتي ننګونو زیاتوالی او د قانون او نظم خرابېدونکی وضعیت داسې شرایط رامنځته کړي، چې د اساسي قانون له مخې بېړنیو اقداماتو ته اړتیا لري.
په همدې حال کې، د پاکستان فدرالي حکومت ډاکټر محمد فخر عالم عرفان د خیبر پښتونخوا د نوي چیف سېکرټر په توګه ټاکلی دی. د راپور له مخې، نوموړی به تر بلې خبرتیا پورې په دې دنده کې پاتې شي.
