د بېپولې خبریالانو سازمان د «رسنیو د ازادۍ د دښمنانو» خپل کلنی نوملړ خپور کړی چې پکې د ۳۳ کسانو او بنسټونو نومونه شامل دي. په دې نوملړ کې د طالبانو د مشر ملا هبتالله، د امریکا د ولسمشر ډونالډ ټرمپ، د روسیې د ولسمشر ولادیمیر پوتین، د اېکس شبکې د مالک ایلان ماسک او د فېسبوک د مالک شرکت «مېټا» نومونه هم راغلي دي.
بېپولې خبریالانو دغه نوملړ نن (دوشنبه، د عقرب ۱۱مه) د «د خبریالانو پر وړاندې د جرمونو د بېسزا پاتې کېدو د پای ته رسولو نړیوالې ورځې» په مناسبت خپور کړی دی.
دغه سازمان په خپل نوملړ کې د ۳۳ کسانو او بنسټونو نومونه ثبت کړي چې د دوی په باور، په ۲۰۲۶ کال کې یې د خبریالانو د ګواښلو او نیولو، تاوتریخوالي، حقوقي او اقتصادي فشارونو او تبلیغاتو په ګډون د بېلابېلو لارو چارو له لارې د رسنیو ازادي او د خپلواکو خبریالانو فعالیتونه محدود کړي دي.
دا نوملړ په پنځو سیاسي، امنیتي، حقوقي، اقتصادي او ټولنیزو برخو وېشل شوی دی.
د امریکا ولسمشر ډونالډ ټرمپ د لومړي ځل لپاره په دې نوملړ کې شامل شوی دی. بېپولې خبریالان وايي، ټرمپ د خپلې دویمې ولسمشرۍ دورې له پیل راهیسې پر رسنیو خپل بریدونه زیات کړي او له خپل سیاسي واک څخه د هغو رسنیو د وېرولو لپاره کار اخلي چې راپورونه یې د ده له دریځونو سره سمون نه لري.
د دغه سازمان د رسنیو د ازادۍ په نړیواله درجهبندۍ کې امریکا د ۱۸۰ هېوادونو په منځ کې ۶۴م ځای لري.
سیاسي برخه؛ هغه کسان چې رسنۍ چوپوي او محدودوي
د افغانستان د طالبانو مشر ملا هبتالله اخوندزاده، د امریکا ولسمشر ډونالډ ټرمپ، د روسیې ولسمشر ولادیمیر پوتین، د اذربایجان ولسمشر الهام علیاف، د بلاروس ولسمشر الکساندر لوکاشنکو، د نیکاراګوا مشران دانیل اورتېګا او روزاریو موریو، او د اوګانډا د دفاعي ځواکونو قوماندان موهوزي کاینروګابا هغه اته کسان دي چې د بېپولې خبریالانو په وینا، رسنۍ محدودوي او د خبریالانو غږ چوپوي.
امنیتي برخه؛ هغه کسان او بنسټونه چې خبریالان نیسي یا یې وژني
بېپولې خبریالانو د سعودي عربستان د ولیعهد محمد بن سلمان او د مصر د ولسمشر عبدالفتاح السیسي نومونه د هغو کسانو په نوملړ کې راوستي چې خبریالان نیسي یا یې وژني.
د اسرائیلو پوځي ځواکونه، د چین کمونیست ګوند، د مکسیکو د «خالیسکو نوې نسل» کارټل او د دغه هېواد نور نشهيي توکو قاچاقوونکي کارټلونه، د بورکینا فاسو واکمنه پوځي شورا، د کانګو دیموکراتیک جمهوریت د «اېم ۲۳» یاغي ډله او د ګیني پوځي مشر مامادي دومبویا هم په دې نوملړ کې شامل دي.
بېپولې خبریالان وايي، اسرائیلي ځواکونو په غزه، لوېدیځه غاړه او لبنان کې د خبریالانو پر وړاندې اقدامات کړي دي او په غزه کې شاوخوا ۲۲۰ خبریالان وژل شوي چې له ۶۰ څخه ډېر یې د خپل مسلکي کار په تړاو وژل شوي دي. دغه سازمان همداراز وايي، په چین کې ۱۱۱ خبریالان او د رسنیو فعالان بندیان دي.
حقوقي برخه؛ پر خبریالانو د فشار لپاره له قانون څخه ګټه اخیستل
د ترکیې ولسمشر رجب طیب اردوغان، د قزاقستان ولسمشر قاسمجومارت توکایف، د امریکا د فدرالي مخابراتو کمېسیون رییس برېنډن کار، د هانګکانګ اجرائیه رییس جان لي کاچیو، د روسیې د مخابراتو څارونکې ادارې «روسکومنادزور» او په هند کې د «اداني» سوداګریزې ډلې نومونه په دې برخه کې راغلي دي.
بېپولې خبریالان وايي، دغه کسان او بنسټونه له قضايي بهیرونو او مقرراتو څخه د رسنیو او خبریالانو د فعالیتونو د محدودولو لپاره کار اخلي.
اقتصادي برخه؛ د رسنیو کمزوري کول
بېپولې خبریالانو د رسنیو د ازادۍ د محدودوونکو په خپل نوي نوملړ کې د «الفابېټ» شرکت نوم هم راوړی چې د ګوګل او یوټیوب مالک دی. دغه راز د فېسبوک او انسټاګرام مالک شرکت «مېټا»، د ګرجستان میلیاردر او پخوانی لومړی وزیر بیدزینا ایوانیشویلي، د روسیې د رسنیو مدیر ولادیمیر تاباک، فرانسوی پانګهوال وېنسنټ بولورې او د کینیا ولسمشر ویلیام روتو هم په دې برخه کې شامل دي.
د دغه سازمان په وینا، یاد کسان او بنسټونه د رسنیو د مالي کمزوري کولو هڅې کوي، څو د بیان ازادي محدوده شي.
دغه سازمان وايي، د اعلانونو د عوایدو پر وړاندې فشارونه، جریمې او پر رسنیو اقتصادي نفوذ کولای شي د رسنیو خپلواکي کمزورې کړي.
ټولنیزه برخه؛ د خبریالانو بدنامول او بېباوري رامنځته کول
د اېکس شبکې د مالک ایلان ماسک، د اسرائیلو د «هانیست ریپورټینګ» بنسټ، د سلواکیا د لومړي وزیر روبرت فیتسو، د ارجنټاین د ولسمشر خاویر مېلي، د روسیې د «ار ټي» شبکې د مشرې مارګریتا سیمونیان، د هند د «اوپایندیا» رسنۍ او د بورکینا فاسو د چټکو اړیکو واحد نومونه په دې برخه کې راغلي دي.
هغه کسان چې د رسنیو د ازادۍ د دښمنانو له نوملړه ایستل شوي
بېپولې خبریالانو د خپل راپور په پای کې ویلي چې د تېر کال له نوملړه یې د څلورو څېرو نومونه ایستلي دي.
د ایران پخوانی مشر علي خامنهيي چې د امریکا او اسرائیلو لهخوا وژل شوی، د وینزویلا پخوانی ولسمشر نیکولاس مادورو چې د امریکا لهخوا نیول شوی، د هنګري پخوانی لومړی وزیر ویکتور اوربان او د سربیا پخوانی ولسمشر الکساندر ووچیچ هغه کسان دي چې نور د بیان د ازادۍ د محدودولو توان نه لري.
بېپولې خبریالانو ټینګار کړی چې د «رسنیو د ازادۍ د دښمنانو» نوملړ بشپړ او هر اړخیز نه دی، بلکې د هغو کسانو او بنسټونو بېلګې پکې وړاندې شوې چې د دغه سازمان په باور، په ۲۰۲۶ کال کې یې په قصدي ډول د رسنیو ازادي کمزورې کړې ده.
