د امریکا د کانګرس شپږو غړو د دغه هېواد د بهرنیو چارو او کورني امنیت له وزارتونو غوښتي، چې افغانستان او ایران ته د کډوالو د ایستلو الوتنې لغوه کړي.
دوی په یوه ګډ لیک کې، چې د دوشنبې په ورځ (د عقرب ۱۱مه) یې لیکلی، خبرداری ورکړی، چې د افغانستان د وګړو بېرته د طالبانو تر واکمنۍ لاندې سیمو ته لېږل ښايي د هغوی ژوند له خطر سره مخ کړي او د ځورونې، شکنجې او ان د وژل کېدو زمینه ورته برابره کړي.
د امریکا د استازو جرګې غړو سکاټ اېچ پیټرز، جېمي راسکین او خوان وارګاس، او د سنا جرګې غړو جک ریډ، مارک کېلي او اډم بي شیف دغه لیک د امریکا د بهرنیو چارو وزیر مارکو روبیو او د کورني امنیت وزیر مارکین مولین ته استولی دی.
د لیک لاسلیککوونکو افغانستان او ایران ته د څه باندې ۱۵۰ افغان وګړو د احتمالي ایستلو د راپورونو په اړه ویلي، چې په پام کې نیول شویو کسانو کې ښايي د هغو کسانو خپلوان هم وي، چې له امریکايي ځواکونو سره یې همکاري کړې ده.
دوی دغه اقدام له هغو کسانو سره د امریکا د «ژمنو او اخلاقي مسوولیتونو نقض» بللی، چې په افغانستان کې یې د امریکايي ځواکونو د ملاتړ لپاره د ځان او کورنیو امنیت له خطر سره مخ کړی و.
د لیک لاسلیککوونکو ویلي، افغانستان لا هم د هغو کسانو لپاره «خطرناک» هېواد دی، چې له امریکايي حکومت او پوځي ځواکونو سره یې همکاري کړې او ډېری یې د بېرته ستنېدو په صورت کې د «ځورونې، تعقیب، شکنجې یا مرګ» له ګواښ سره مخ کېدای شي.
دوی په افغانستان کې د ښځو، د طالبانو د سیاسي مخالفانو او د جنسي تنوع لرونکو کسانو وضعیت ته هم اشاره کړې او د هغو ښځو او زیانمنونکو کسانو په اړه یې اندېښنه ښودلې، چې ښايي د ایستل کېدونکو کسانو په ډله کې وي.
په لیک کې ایران ته د ښځو، عیسویت ته د اوښتو کسانو او د ډیموکراسۍ د فعالانو په ګډون د ایراني وګړو د احتمالي ایستلو په اړه هم اندېښنه څرګنده شوې ده.
د لیک لاسلیککوونکو په ایران کې د پوځي نښتو د دوام او د واکمن نظام د مخالفانو د ځپلو په شرایطو کې دغه هېواد ته د کسانو بېرته لېږل «د نه منلو وړ» بللي دي.
دوی له پاکستاني حکومت څخه هم غوښتي، چې د افغان کډوالو په طالبانو ته سپارلو کې همکاري ونه کړي. د کانګرس غړو په خپل ګډ لیک کې پاکستان ته خبرداری ورکړی، چې هغه چارواکي چې د کسانو په شکنجه کولو یا وژل کېدو کې د سپارلو له لارې ونډه ولري، ښايي د امریکا د بشري حقونو له بندیزونو سره مخ شي.
دوه ورځې مخکې هم، وروسته له هغې چې پاکستان ته د افغان کډوالو د ایستلو خبرونه خپاره شول، د امریکا یو شمېر سناتورانو د هغوی ایستل «بېرحمانه» او «د امریکا له متحدانو سره خیانت» بللي وو او د ډونالډ ټرمپ د حکومت د دې پرېکړې پر وړاندې یې د کانګرس د درېدو غوښتنه کړې وه.
د نیوهمپشایر ایالت سناتور جېن شاهین، د دلاویر ایالت سناتور کریس کونز، د کنېکټیکټ ایالت سناتور ریچارډ بلومنتال او د ویرجینیا ایالت سناتور ټیم کېن په جلا جلا پیغامونو کې پاکستان ته د افغان کډوالو د ایستلو د لغوه کولو غوښتنه کړې وه.
دا په داسې حال کې ده، چې «نیویارک ټایمز» د جمعې په ورځ (د عقرب ۸مه) راپور ورکړی و، چې د امریکا حکومت په لوزیانا ایالت کې تر ۱۵۰ ډېر افغان پناهغوښتونکي نیولي او غواړي د پاکستان له حکومت سره په همکارۍ یې په راتلونکو درېیو ورځو کې له دغه هېواده وباسي.
