Dekabrın 5-də Avropa Şurasının Nazirlər Komitəsi, Avropa İnsan Haqları Məhkəməsinin (AİHM) REAL hərəkatının lideri İlqar Məmmədovun qeyd-şərtsiz azad edilməsi qərarını icra etmədiyinə görə Azərbaycana qarşı xüsusi prosedura başlanması barədə keçid qətnaməsi qəbul edib.
Nazirlər Komitəsi bu proseduru İlqar Məmmədovun işi ilə bağlı bundan əvvəl 2010-ci ildə işə salmışdı. O vaxt, Azərbaycan Avropa məhkəməsinin qərarını yerinə yetirməyəndə, Nazirlər Komitəsi AİHM-ə rəsmən müraciət edərək Azərbaycanın məhkəmə qərarını yerinə yetrimək öhdəliyini pozub-pozmadığının araşdırılmasını istəmişdi.
2014-cü ilin mayında AİHM qərara gəlmişdi ki, Azərbaycan tərəfi İlqar Məmmədova qarşı cinayət işinin qaldırılması, onun həbsi və məhkəməyə qədər saxlanmasının əsaslandırılması üçün heç bir dəlil təqdim edə bilməyib.
AİHM-in həmin qərarında deyilirdi ki, Məmmədova qarşı sözü gedən tədbirlərin görülməsinin yeganə məqsədi onun susdurulması və ya hökuməti tənqid etdiyinə görə cəzalandırılması olub.
AİHM-in hökmündə bu da qeyd olunurdu ki, Azərbaycan tərəfi Avropa İnsan Haqları Konvensiyasının 5, 6 və 18-ci maddələrini pozub.
2017-ci ilin noyabrınadək AİHM-in Azərbaycan barədə hökmlərində Konvensiyanın 18-ci maddəsinin pozulması hallarına yalnız beş işdə rast gəlindiyi bildirilirdi. AİHM bildirirdi ki, sözü gedən işlər üzrə İlqar Məmmədov istisna edilməklə bütün qalan məhbuslar azad olunub.
Azərbaycan İnsan Haqları Konvensiyasını pozur
Avropa Şurasının Nazirlər Komitəsi 2014-cü ilin dekabrından indiyədək AİHM-in İlqar Məmmədov barədə 2014-cü ilin mayında verdiyi hökmlə bağlı çoxsaylı qərarlar və keçid qətnamələri qəbul edib.
Bu qərar və qətnamələrdə İlqar Məmmədova qarşı cinayət araşdırması zamanı Azərbaycan tərəfindən yol verilmiş fundamental pozuntulardan söz açılırdı.
Bu sənədlərdə Nazirlər Komitəsi Azərbaycanı dəfələrlə İlqar Məmmədovun dərhal və qeyd-şərtsiz azadlığa buraxılmasına çağırırdı.
Avropa Şurası Nazirlər Komitəsi xatırladır ki, AİHM-in bu iş üzrə son hökmündən üç il keçməsinə baxmayaraq məhbus pozulmuş cinayət araşdırması əsasında həbsxanada qalmaqda davam edir.
Avropa Şurası bildirir ki, üzv ölkələr İnsan Haqları Konvensiyasının 46 maddəsinə uyğun olaraq Avropa İnsan Haqları Məhkəməsinin qərarlarını icra etməyə borcludur. Buna əməl olunması prosesinə Nazirlər Kabineti nəzarət edir.
2010-cu ildə qəbul edilmiş yeni prosedura görə Nazirlər Komitəsi AİHM-dən üzv ölkənin məhkəmə qərarını yerinə yetirməməsinin – Konvensiyanın yenidən pozulması kimi qiymətləndirilməsi məsələsinə baxmasını rica edə bilər.
Avropa Şurasının məlumatında deyilir ki, 2017-ci ilin 25 oktyabrında Nazirlər Komitəsi İlqar Məmmədova dair hökmün icrası ilə bağlı Azərbaycanın öz öhdəliyinə əməl etməməsi məsələsini baxılmaq üçün AİHM-ə göndərib.
Bundan əvvəl Nazirlər Komitəsi bu məsələ barədə Azərbaycanın öz mövqeyini bildirməsini istəmişdi.
Azərbaycan tərəfinin izahı Nazirlər Komitəsinin dekabrın 5-də qəbul edilmiş keçid qətnaməsinə əlavə olunub.
Oxunub: 1842
