Hakimiyyət 19 oktyabr mitinqi üçün xalqa yenidən Lökbatan qəsəbəsini göstərdi. Antimilli rejim ikinci də xalqı saymadığını, öz hakimiyyət maraqlarını hər şeydən və hər kəsdən üstün tutduğunu ortaya qoydu. Bununla da açıq mesaj verdi ki, nə ölkənin taleyi, nə ölkə qanununda yazılanlar, nə də beynəlxalq konvensiyalar üzrə üzərinə götürdüyü öhdəliklər onu maraqlandırmır. Hökumət vəziyyətin əvvəlki illərdəkindən tam fərqli olduğunu yaxşı anlayır. Amma bir az da vaxt qazanmaq və ya “bəlkə bu dalğanı da ötürdük” düşüncəsini ağlından çıxara bilmir, deyəsən. Ölkədəki etiraz elektoratını səfərbər edən güc ortadadır, bunun üçün Milli Şura rəhbərliyi əlindən gələni edib. Bəs beynəlxalq birlik, onların bu ölkədəki təmsilçi missiyaları niyə susur? 26 ildir bu rejim insan haqları üzrə beynəlxalq qurumlar qarşısında götürdüyü öhdəlikləri tapdayıb keçir. On illər ərzində beynəlxalq qurumların susqunluğu bu adamlara bütün demokratik institutları məhv etmək və həbsxanaları azad fikirli insanlarla doldurmaq imkanı yaradıb. Bu korrupsioner diktatura rejiminə beynəlxalq öhdəliklərini xatırlatmağın zamanı gəlmədimi? İnsanlar insan haqlarını dünyanın ali dəyəri elan etmiş ölkələrdən dəstək gözləyir. İnsanlar ölkəmizdəki Amerika, Böyük Britaniya, Avropa ölkələri səfirlərinin baş verənlərə reaksiya verəcəyinə ümid edir. Nə qədər davam edəcək bu özbaşınalıq və qanunsuzluq? Bu oğru, talançı, korrupsiya əməlləri ilə bütün dünyanı çirkləndirən diktatura rejimi nə vaxt durdurulacaq? Nə vaxt bu adamlara çoxdan gündəmdə olan iqtisadi, siyasi sanksiyaların tətbiqinə başlanacaq? Arada sosial şəbəkələrə nəzər salın və görün, sizə bu sualları ünvanlayan nə qədər insan var ölkədə!
19 oktyabr mitinqi istənilən halda Milli Şuranın təyin etdiyi yerdə, 28 may metrosunun qarşısında keçiriləcək. Bu mitinqin baş tutmaması üçün əlindən gələni edən hakimiyyət də çox yanılır. Xalq bezib və bu yaramaz hakimiyyəti süpürüb tarixin zibilliyin atmaq üçün məqam gözləyir. Müxalifət liderləri isə kəfəni çoxdan geyinib əyninə. Dünən Əli Kərimli heç bir həbs təhdidindən qorxmadan xalqın içində olacağını bəyan etdi. Fuad Qəhrəmanlıya cinayət işi açıldığını tirajlayan hökumət saytlarına cavab da onun özündən gəldi, həm də ən sərt şəkildə. Fuad bəy qurama cinayət işindən qorxmadığını və həmin gün yenə mitinq iştirakçılarının önündə olacağını açıqladı. Hakimiyyətin məqsədi isə başqadır-xalqı qorxutmaq və mitinqin kütləviliyinin qarşısını almaq. Bununla, bir az da vaxt qazanmaq istəyir. Amma bu cəzasızlığın bir sonu olmalıdır. Burdan üzümüzü bütün beynəlxalq ictimaiyyətə, səfirliklərə, demokratik dünyaya tutub Azərbaycan xalqını bu mübarizədə yalnız buraxmamağa çağırırıq. İnsan haqları haqqında onlarca qanunun, konvensiyanın, bəyannamənin müəllifi olan təşkilatlar xalqların azadlıq davasına biganə qala bilməz. Bu, ən azı onların öz prinsiplərinə xəyanəti olar. Bir səfirin işi təmsilçi olduğu ölkədə istirahət etmək deyil, o ölkədə baş verən önəmli məsələləri lazımi ünvanlara çatdırmaqdır. Azərbaycan xalqının dinc mübarizəsinə tam dəstək verməyin zamanıdır. Dilucu deyil, quru sözlə deyil, əməli işlə dəstək verməyin zamanıdır bu xalqa. Azərbaycanın problemlərini parlamentlərə, konqreslərə, məhkəmələrə daşımaqla dəstək ifadə olunmalıdır bu xalqa. Əks halda, uzun illərin mübarizəsində böyük qurbanlar vermiş insanların inamı həmişəlik itəcək o ünvanlara. O inamın qırılmasına yol verməyin!