Sosial şəbəkələrdə Qarabağ əlili Haciyev Məhəmmədəlinin striptiz deputat Əsabil Qasımova ünvanlanmış videosu yayılmışdı.
19 oktyabrda bu rejimə “get” demək üçün min səbəbimiz var. Onlardan biri də bu torpaqlarda can qoymuş vətən qazilərinin tapdanan haqlardır. Acı həqiqət olsa da, onların hüquqları hər addımda, hər qapıda pozulur. Mediadan və sosial şəbəkələrdən onların üzləşdiyi ədalətsizliklər haqqında gündəlik xəbər tuturuq. Bu ölkədə ən yaxşı yaşamağı haqq edən bu insanlar ehtiyac, əzab-əziyyət içində boğulurlar. Harın məmurların, deputatların biznes ortaqları da bir tərəfdən zülm edir bu insanlara. Dünən sosial şəbəkələrdə ikinci qrup Qarabağ əlili Haciyev Məhəmmədəlinin deputat Əsabil Qasımova ünvanlanmış videosu yayılmışdı. Qarabağ döyüşlərində 70% sağlamlığını itirən qazi deyir ki, deputat Əsabil Qasımovun qardaşı oğlu Şahin Qasımov onun Nərimanov rayonundakı 232 kvadrat metrlik obyektini əlindən alıb, yerində bina tikdirib. Qazinin obyektini almaq üçün əvvəl onu dilə tutublar, sonra hədə-qorxu gəliblər, “dövlət bizik, qazi filan gözümüzdə deyil” deyiblər. “Dəfələrlə dedim ki, hər şeyi kənara qoyaq, mənim 4 övladım var. 2002-ci ildən burda ticarətlə məşğul olub, övladlarımı onunla saxlayıram. Mən əlağacına söykənib gəzən bir insanam. Məhəl qoymadılar, gecənin birində traktorları töküb sökdürdülər obyekti. Yarım milyonluq inşaat mallarım yoxa çıxdı, ofisdə nə vardısa, hamısını şumlayıb torpağa qatdılar, yerində bina tikməyə başladılar”. Qazi deyir ki, Əsabil Qasımovun biznesini idarə edən qardaşı oğlu Şahin Bakı şəhərində 37 yüksək mərtəbəli bina tikdirir. Aylardır qapı-qapı gəzib şikayət edən qazinin sözünü dinləyib yardım edən bir məmur da yoxdur…
Qazi yoldaşları Məhəmmədəli Hacıyevə dəstək məqsədilə fevral ayında etiraz aksiyası keçiriblər. Onlar döyüş yoldaşlarına dəstək üçün onun Xətai prospektində sökülən obyektin önünə toplaşıblar. Məsələ böyüyüncə, şirkət ona tikiləcək binadan mənzil təklif edib. Qazi isə deyir ki, onların mənzilə yox, işləyib çörək pullarını çıxaracaq obyektə ehtiyacı var. Bax, beləcə mülkiyyət hüququ kobudcasına pozulan qazi qardaşımız aylardır səlahiyyətli qurumları qapı-qapı gəzib durur. Amma ortada heç bir nəticə yox. Kimsə qanunsuz bizneslə məşğul olan deputatı qoyub, onun sözünü demir. Kimsə bu torpaqlar üçün canını fəda etmiş qazini eşitmək istəmir. Sözünüzü eşitdirmək üçün üz tutacağınız ünvan bəlli, vətən qaziləri! 19 oktyabr mitinqi həm də sənin tapdanan haqlarının bərpası məqsədilə təyin olunub. O aksiya Əsabil kimi saxta, xalqı saymayan, qazisinə hörmət qoymayan deputatların istefası üçün çağırılıb. O aksiya sənin hər kəsdən yaxşı, hər kəsdən hörmətli və təminatlı yaşmaq haqqının geri qaytarılması üçün keçirilir. O gün siz də pozulan haqları uğrunda mübarizəyə qalxan xalqın arasında olmalısınız. Siz də illərlə yığılıb qalmış problemlərinizi uca səslə hayqırıb, əsabilləri danışıq masasına oturtmalısınız. O gün siz də hər kəsdən çox sevdiyiniz bu ölkəyə ədalət gəlməsini istəyən on minlərin sırasına qatılmalısınız. Bu ölkəni bir qrup quldurun əlindən alıb xalqa qaytarmağın zamanı çatıb. Öz ölkən, öz xalqın, öz övladlarının gələcəyi üçün sən də meydana gəl, şərəfli Qarabağ qazisi!