Parlamentin bir-birindən oyunbaz deputatları haqqında yazıb, Yevlaxın “makler” ləqəbli deputatı İlham Məmmədovu unutmaq günah olar. Əvvəla, başlayaq ondan ki, adama nədən bu ləqəbi veriblər? Deyilənə görə, rayondakı YAP-çılar da onu “Makler İlham” kimi tanıyıblar. Belə ki, Məmmədov həmişə Yevlax və Gəncədə torpaq satışı ilə məşğul olub. Yevlaxda hamı deyir ki, Məmmədov 2010-cu ildə əldə etdiyi mandat sayəsində özünə böyük biznes şəbəkəsi qurub. Beş illik deputatlıq müddətində xalqın işinə yarayan bir addım da atmayıb, ancaq öz biznesini genişləndirməklə məşğul olub. Gəncə və Yevlaxda özünə böyük biznes obyektləri açıb. 2015-ci ildə ikinci dəfə namizədliyini irəli sürəndə isə bəri başdan deputat olacağını bəyan edib.
Həmin ərəfədə kampaniya başa çatmadan Yevlaxda və Gəncədə yaxın adamlarına ziyafət məclisləri təşkil edib. Bununla öz seçicilərinə “mənim sizin səsinizə ehtiyacım yox” mesajı verməklə, adamları daha da narazı salıb. Onun haqqında seçicilərin münasibəti belə olub: “Əgər Yevlax camaatı arasında sorğu aparılsa, onların İlham Məmmədova səs vermədiyi və bundan sonra da verməyəcəyi məlum olacaq”.
Seçicilər deyir ki, Məmmədov heç vaxt onların heç bir problemi ilə maraqlanmayıb. Adam 2010-cu il parlament seçkiləri öncəsi qaranlıq keçmişi ilə bağlı məlumatların yayılmaması üçün mətbu orqanların redaksiyalarını qapı-qapı gəzirmiş. Mandat aldığı zamandan bəri rayonda milyonçuya çevrilib. Məmmədovun Hacıkənddəki villasının qiyməti yarım milyondan çoxdur. Yevlax və Gəncə şəhərlərində neçə-neçə obyekti var. Həmin obyektlər və villanı İlham Məmmədov məhz mandat alandan sonra əldə edib. Laxın və Gəncənin keçmiş icra başçısı olmuş Elmar Vəliyevlə də yaxın əlaqələri olub. Elmar Vəliyev Gəncədə güllələndikdən sonra deputat mətbuata onu ziyarət etdiyini bildirmişdi: “Mən Yevlax şəhəri YAP-ın sədri və rayon Mərkəzi xəstəxanasının baş həkimi işləyərkən, Elmar Vəliyev icra başçısı idi. Mən Elmar Vəliyevin işgüzarlığını, fəaliyyətini, peşəkarlığını həmişə yüksək qiymətləndirmişəm.” Yeri gəlmişkən, yevlaxlı deputatın əlindən seçiciləri qan ağlasa da, adamın icra başçısı Qoca Səmədovla da əla münasibətləri olub. Amma deyəsən onun yaxın olduğu icra başçılarının bəxti gətirmir. Bu gün İlham Əliyevin sərəncamı ilə Yevlax rayon İcra hakimiyyətinin başçısı Qoca Səmədov vəzifəsindən azad edilib. Gözləyək, bu dəfə yeni icra başçısı onu yola salacaq, yoxsa o, icra başçısını?