Parlament buraxıldı, qaldı Aparat rəhbəri Səfa Mirzəyev
MM-nin mahir hüquq yozan və hüquq pozan Aparat rəhbəri
Konstitusiya Məhkəməsi dekabrın 4-də Milli Məclisin buraxılmasının konstitusiyaya uyğun olub-olmaması barədə İlham Əliyevin müraciətinə baxacaq. Məlum olduğu kimi, Milli Məclis səs çoxluğu ilə növbədənkənar seçkilərin təyin edilməsi haqqında Azərbaycan prezidentinə müraciət qəbul edib. Guya “Milli Məclis üzvlərinin mütləq əksəriyyətində parlament fəaliyyətinin həyata keçirilməsinin mümkünsüzlüyü barədə mövqe formalaşıb və nəticədə parlamentin öz fəaliyyətini davam etdirməsi qeyri-mümkün olub.” Çox gülünc situasiya yaranıb, bu məsələ gündəmə gələn anadan hazırkı Konstitusiyanın müəlliflərindən biri, Milli Məclis Aparatının rəhbəri Səfa Mirzəyev dedi ki, parlamenti buraxmağın 3 şərti Konstitusiyanın 98-1 maddəsində nəzərdə tutulub. Həmin 3 şərtin heç biri bu gün parlamenti buraxmaq arqumentinə uyğun gəlmir. Amma nə olacaq? Təbii ki, Konstitusiya Məhkəməsi prezidentin sözündən çıxmayıb, parlamentin buraxılması məsələsini yoluna qoyacaq. Elə zamanında həmin Səfa Mirzəyevin özü konstitusiyanın atasını yandırıb, prezidentlik müddətini 7 ilə qədər uzatmaq üçün problemi belə həll etməmişdimi? O, parlamentin insan hüquqları ilə bağlı bir tədbirində “Milli Məclis Aparatı insan hüquqlarına zidd olan heç bir qanun qəbul etməyəcək” demiş, onun ardınca isə prezidentlik müddətinin 5 ildən 7 ilə qədər uzadılmasını dəstəkləmişdi. Aparat rəhbəri o zaman məlum instansiyanın göstərişi əsasında konstitusiyanı kənara qoyub, məsələni belə əsaslandırmışdı: “Əgər kimsə öz üzərinə öhdəlik götürürsə, o zaman ona uzun vaxt verilməlidir ki, həmin işləri başa çatdırsın. Hesab edirəm ki, 7 il dəqiq götürülmüş müddətdir.”
Bu, ailə hakimiyyətinin uzadılmasına haqq qazandırmaq üçün belə “müdrik” bir yalan uyduran həmin Mirzəyevdir. Yalan uyduranda da unutmuşdu ki, o vaxta qədər İlham Əliyev nə az, nə çox 14 il prezident kürsüsündə oturub. Hələ ata Əliyevin hakimiyyətini də toplasaq, bu müddət 24 il olur.
Məclisin klassik ağsaqqalı
Səfa Mirzəyevin parlamentin buraxılmasının hüquqi əsası olmadığını söyləməsi və təlaşlanması anlaşılandır. İstefaya göndərilmə sırası ona da gələ bilər. Niyə də gəlməsin? Gözümüzü açandan Mirzəyevi parlamentdə görmüşük. Adam sovet klassiklərindəndir, Milli Məclisdə saç ağardıb. 1995-ci ildə yeni konstitusiya layihəsini hazırlayan komissiyanın üzvü olub. Deyirlər MM-də də özünü lap parlamentin memarı kimi aparır. Özünü ağsaqqallı, qarasaqqallı bütün deputatların böyüyü hesab edir. Hüquq məsələlərində də sözünün üstünə söz deyən yoxdur, çünki bu istiqamətdə nəyi necə hüquqi müstəvidən çıxarıb yozmağı hamıdan yaxşı o bilir. S. Mirzəyevin parlamentdə özünü xüsusi avtoritet kimi aparmasına dair başqa bir fakt illər öncə baş vermiş telefon qadağası məsələsi idi. Xatırladaq ki, o zaman Aparat rəhbəri Milli Məclisin elanlar lövhəsindən deputatların binaya smartfon tipli telefonlarla daxil olmasını qadağan edən qanunsuz əmr asdırmışdı. Amma bu qeyri-adi əmr geniş hay-küy yaratdığına görə, Məclis Katibliyinin rəhbərliyi həmin sənədi yığışdırmaq barədə göstəriş vermişdi. Katiblik tələm-tələsik belə bir açıqlama yaymışdı ki, bu qadağa deputatlara yox, Milli Məclis Katibliyinin əməkdaşlarına və jurnalistlərə aiddir. Deputatlar isə bildirmişdi ki, Səfa Mirzəyevin belə bir əmr vermək ixtiyarı yoxdur. Əgər belədirsə, Katiblik rəhbəri səlahiyyət hüdudlarını aşaraq qanunları kobud şəkildə pozur. Çünki Səfa Mirzəyevin parlamentin fəaliyyətinə heç bir dəxli yoxdur və o heç deputat da deyil.
Məhkəmə qalmaqallarında adı keçən hakim qardaşı
Aparat rəhbərinin adı böyük qanunsuzluqlarda hallanan yaxınlarından biri də qardaşı, Ali Məhkəmənin İnzibati-İqtisadi Kollegiyasının sədri Hikmət Mirzəyevdir. Xatırlayırsınızsa, onun adı xalq şairi Xəlil Rzanın ailəsinin bankda batan əmanətləri ilə bağlı gedən məhkəmə prosesində hallanmışdı. Üç il əvvəl “Dəmirbank”ın Bayıl filialının lisenziyası ləğv edilən zaman şairin ailə üzvlərindən Bəhruz Axundova 400 min, onun həyat yoldaşı Əzizə Axundovaya 1 milyon 155 min, qızı Pərvanə Əliyevaya 400 min, oğlu Tural Axundova 395 min, gəlini Gülnur Axundovaya 300 min ziyan dəydiyi məlum olmuşdu. Şikayətçi-əmanətçilər Əzizə və Tural Axundovlar mətbuatda açıqlama vermişdilər ki, “Bakı Apellyasiya Məhkəməsində və ibtidai istintaq orqanlarında dəfələrlə Ali Məhkəmənin Kollegiya sədri Hikmət Mirzəyevin bankın sahiblərindən biri olduğu bizə deyilib, bu səbəbdən dəfələrlə hədələnmişik, sonda hakim Məmməd Məmmədov Hikmət Mirzəyevin təzyiqlərinə dözə bilməyib sensasiya doğuracaq qərar qəbul etdi.” Hikmət Mirzəyevin adı mərhum istiqlalçı deputat Məryəm Həsənovanın deputat pensiyasından məhrum edilməsi məsələsində də gündəmə gəlmişdi. O zaman pensiya alması üçün bütün qanuni əsaslar olduğunu deyən Məryəm xanım bildirmişdi ki, Dövlət Sosial Müdafiə Fondu nədənsə qanunvericiliyə deyil, Milli Məclis Aparatının rəhbəri Səfa Mirzəyevin verdiyi antikonstitusion şərhinə istinad edir. “Səfa Mirzəyev və onun qardaşı, Ali Məhkəmənin İnzibati-İqtisadi Kollegiyasının sədri Hikmət Mirzəyev vəzifə mövqelərindən istifadə edərək məhkəmə icraatına qanunsuz təsir və müdaxilə edir, mənim Milli Məclisin sabiq deputatı olaraq məhkəmə yolu ilə pensiya almaq hüququmun təmin edilməsinə imkan vermirlər”-deyə bildirmişdi istiqlalçı deputat. Dediyimiz kimi, MM Aparat rəhbərinin hüquq və qanunları kontekstdən çıxarıb, işinə yarayan şəkildə yozmaqda əvəzi yox. Üstəlik, yeri gələndə hakim qardaşını da öz qanunsuzluqlarına şərik etməyi bacarır. İndi parlamentin başının üstünü qara buludlar alıb və o da yaxınlaşan təhlükəni hiss edir. Ümid edirik, çox keçmədən sıra ona da çatacaq. Böyük ehtimalla, yerinə uyğun kadr tapılan kimi, onu da yola salacaqlar.