Talıbovun Şimalı Koreya qanunları dəyişəcəkmi?
Ölkədə siyasi proseslər tamam fərqli bir mərhələyə qədəm qoyur. Biyabırçı Parlament buraxıldı, amma hələ ki, bu buraxılma Paşayevlərin şousuna oxşayır. Köhnə deputatlar pul yığırlar ki, aparsınlar “yuxarı”. Əliyevlərin “kadr islahatları” paketini açıb, rejimin köhnəlmiş üzlərini çıxdaş etmək təlaşı da bununla bağlıdır. Rejim xalqın artan narazılığından əndişədədir və küçəyə yüz minlər çıxacağı halda tərksilah olub, geri çəkilmək zorunda qalacağını anlayır. Bu minvalla, hakimiyyəti müvəqqəti xilas etməyin bir yolu qalır – “kadr islahatlarını” davam etdirmək. Deyilənə görə, xalqın nifrətini qazanan ən antipatik kadrların siyahısını da çıxarıb qoyublar Əliyevlər cütlüyünün qarşısına. Deyilənə görə, diktator cütlükdən başqa, siyahıda bütün böyük akulaların adı yer alıb. Hətta 25 ildir Naxçıvanı babasının koloniyası kimi idarə edən Vasif Talıbovun da. Əliyevlərin yaxın ətrafından sızan xəbərə görə, yaxın zamanda onu da yola salıb, yerinə “normal, sivil, adekvat” bir kadr gətirəcəklər. Təbii, bu “normal” kadr təyinatı Siyavuş Novruzovun xanımının Ombudsman vəzifəsinə gətirilməsinə bənzər bir şey ola bilər. Amma 25 ildir Naxçıvanı faktiki Şimali Koreya qanunları ilə idarə edən Talıbovun vəzifədən uzaqlaşdırılmasını da xalqa böyük islahat kimi sırımaq olar. Hələ nəzərə alın ki, səhhəti ilə bağlı ciddi problemlər yaşandığı söylənən Talıbovun da öz varis planı var. O özündən sonra yerinə oğlu Seymur Talıbovu qoyub getmək istəyir…
Naxçıvan xanının qanlı varis planı
Yaxın zamanlar mətbuatda yayılan xəbərlər də bu faktı təsdiqləyir. Deyilənlərə görə, artıq xəstəlik səbəbindən Ali Məclis sədrinin muxtar respublikanın idarə olunmasında iştirakı formal xarakter daşıyır və idarəetmə ilə bağlı bütün qərarları Seymur Talıbov verir. Xatırladaq ki, Seymur elm sahəsində çalışır və keçən seçkilərdə Naxçıvan Ali Məclisinə deputat “seçilib”. Onun Naxçıvan London Universitetində ali təhsil aldığı bildirilir. Oğul Talıbov həm də Yeni Azərbaycan Partiyası Naxçıvan şəhər təşkilatının şura üzvüdür. Mətbuatda gedən xəbərlərə görə, son illər muxtar respublikada yüksək vəzifəli şəxslərin bir-birinin ardınca işdən çıxarılması və əmlaklarının “milliləşdirilməsi” prosesi Seymur Talıbovu Ali Məclis sədrliyinə gətirməyə hesablanıb. Yəqin ki, ilin əvvəlində Naxçıvan Gömrük Komitəsinin sədri Asəf Məmmədovun işdən azad edilməsi zamanı ölkədəki bütün biznes və daşınmaz əmlaklarının əlindən alınmasını xatırlayırsınız. O zaman yayılan xəbərlərdə qeyd edilirdi ki, Vasif Talıbovun qudası, muxtar respublikanın daxili işlər naziri Fazil Ələkbərov Asəf Məmmədovun xaricdəki biznesini əlindən almaq üçün ona dəhşətli işgəncələr verib. Sonra işdən çıxarılan Asəf Məmmədovun yerinə onun müavini Səhət Həbibbəyli keçdi. Məhz ona görə ki, o, Seymur Talıbovla çox yaxın idi və özünüonun yeni komandasının aparıcı şəxslərdən biri kimi görürdü. O ərəfədə komitə sədrinin müavini
Mirməhəmməd Seyidovun da nazir F. Ələkbərov tərəfindən verilən işgəncələr nəticəsində intihar etdiyi məlum olmuşdu. Ailəsinin məlumatına görə, o, 30 milyon manat pul tələb olunduğuna görə işgəncəyə məruz qalıb və intihar edib. Naxçıvanda isə hami bilir ki, Seyidovun qatili Fazil Ələkbərovvə o vaxt DTX-nın rəis əvəzi vəzifəsini tutan Əşrəf İbrahimov, onlara 30 milyon almaq tapşırığı verən şəxs də Seymurdur. Çünki son illər Naxçıvanda bütün “alış-veriş” işlərinə varis olaraq o baxır, onsuz şəhərin üzərindən bir quş da uça bilməz.
Paşayevlərə sədaqətli kadr axtarışı
Xülasə, deyilənlərə inansaq, yaxın zamanda dəyişiklik küləyi Naxçıvana da keçəcək. O, “kiçik torpağa” ki, oğul Talıbov siyasi meydana atılan gündən atasının kadrlarına qan uddurur, onları soğan kimi soyub kənara atır və yerinə öz kadrlarını yerləşdirir. Belə görünür ki, klanlararası davada hamı kimi, o da özünə sadiq adamlardan komanda formalaşdırıb, yerini bərkitməyə çalışır. Amma indi işlər qarışıb, daha Talıbovun aid olduğu klanın sözü keçmir. Bu halda onun varis planı da baş tutana oxşamır. Mehriban Əliyevaya yaxın adamlar onun Naxçıvana tamam başqa bir kadr təyin etmək, orda köklü dəyişikliklər aparmaq, azad iqtisadi zona yaratmaq planlarından danışır. Kim olacaq həmin yeni kadr? Hər kimsə, Seymur Talıbov olacağına bənzəmir. Yəqin ki, yenə Paşayevlərə çox sədaqətli birini axtarırlar.