Məlahət Ağacan Rübabə
Bütün dünyada koronavirus qadağaları yumşaldılıb, insanlar yavaş-yavaş normal həyata qayıdır, Azərbaycan isə karantinə hamıdan birinci başlasa da hamıdan axırıncı qurtaracağına da ümid yoxdur. Azərbaycan hakimiyyəti pinti qadınlar kimidir: pinti adamlar aylarla evi zibil içində saxlayır, sonra bir xeyir-şər olanda bilmirlər ev təmzliyi etsinlər, yoxsa qapıda gözləyən elçiləri qarşılasınlar, ya da qəfildən ölənə ağlasınlar. Koronavirus həşərat məmurlarla dolu olan Azərbaycanı qəfil yaxaladı: ömürləri boyu ölkənin sərvətlərini çapıb-talayıb siçovul kimi artan məmurların xalqın necə yaşayıb, nə ilə dolanması veclərinə də deyildi. Neftin qiyməti yuxarı olanda “Araz aşıqlarından, Kür topuqlarından” idi: hara gəldi beton tökürdülər, körpü salırdılar. Hər il saysız-hesabsız beynəlxalq konfranslar, sərgilər, festivallar, irimiqyaslı tədbirlər keçirirdilər. Kimə gəldi xalq artisti, əməkdar artist adlarını, prezident təqaüdünü şəkər-noğul kimi paylayırdılar. Qəribədir, dünyada neft qiymətləri ucuzlaşan kimi, koronavirus bəlası dünyanı ağuşuna aldı. Pandemiya ən böyük zərbəni Azərbaycan Mədəniyyət Nazirliyinə vurdu: yarım saat üçün avam, cahil toy sahiblərindən 6-7 min manat alan harın müğənnilər, pulsuz-parasız qaldılar. Artistlərin Təzə bazara, üzr istəyirəm, Mədəniyyət Nazirliyi bazarına getməyə pulları olmadı, nəticədə, Əbülfəs Qarayev yuxarılara “planı” verə bilmədi. O, məcbur olub 26 illik tarixi olan “kumbara”larının ağzını açdı. Hakimiyyət də özünü elə apardı ki, sanki Əbülfəs Qarayev “kumbara”ya topladığı pulları İlham Əliyevin cibindən oğurlayıb.
Koronavirus hər sahədə olan eybəcərlikləri, boşluqları üzə çıxartdı: Bakıda, 8 iyunda zibil atmağa çıxan vətəndaşa polislərin vəhşi hücumunu görəndə bir hadisənı xatırladım: Türkiyədə karantinin ən sərt vaxtında axşam hava almağa çıxmışdım, məndən başqa ətrafda heç kim yox idi. Hətta küçədəki it-pişiklər də gözə dəymirdi. Bir xeyli gəzib dolaşandan sonra evə qayıtmaq istədim, bu vaxt yekə bir itin qarşımda dayandığını gördüm. Addım atmaq istəyəndə it hürdü, hardansa beş-altı it qaça-qaça gəldi və məni dövrəyə aldılar. Mən məcbur olub onlarla söhbət etməyə başladım. Dedim ki, əziz və ağıllı itlər! Üzrlü sayın, səhv etmişəm, mən nizam-intizama hörmət edilməyən bir ölkədə ömür sürmüşəm, o səbəbdən qayda-qanuna əməl etmək mənim üçün çox çətindir… İtlər məni diqqətlə dinləyib, sonra ədəb-ərkanla yol verdilər…
Daha bir unudulmaz hadisə isə bazarda olmuşdu: maska taxmadan bazara getdim, iki polis gülə-gülə mənə yaxınlaşdı. Mənə maska verib dedilər ki, “abla, maskesiz pazara giriş yasak, 800 lira cezası var”. Hətta maskanı taxanda, çantamı alıb saxladılar…
Yüzlərlə belə misal çəkə bilərəm, amma yazmağın nə xeyri var ki? Həsəd, qısqanclıq yaxşı hisslər deyil, sadəcə, başqa ölkələrin vətəndaşlarının, heyvanlarının həyatına baxanda çox üzülürəm. Axı niyə mən özümü ölkəmdə yad ölkədəki bir it-pişik qədər də güvənli hiss etmirəm?!..
Mən demirəm Türkiyə vətəndaşları çox xoşbəxtdirlər, amma onlar uçmasalar da, ayaq üstə yeriyə bilirlər, daha bizim kimi sürünmürlər…