Hikmət Nikbin
…
Mən başa düşə bilmirəm, niyə axı, ailə hakimiyyətində təmsil olunan adamlar özlərini Azərbaycan cəmiyyətinə bu qədər fərqli göstərməyə can atırlar.
Həmin məqsədli adamlar İndiki idarəçilikdə təmsil olunanları yalançı bir hökmlə yararlılara və yararsizlara ayırırlar, ata-oğul-gəlin diktaturasının mövcudluğunu, davamlılığını daha 10 illər uzatmağa çalışırlar.
Yəni o adamlar Azərbaycan xalqını bu qədər bəsit, bu qədər sadəlövh bilirlər?
Ailə hakimiyyəti nə vaxta qədər idarəçilikdə təmsil olunan “böyük” fiqurlardan ildə bir-ikisindən imtina etməklə cəmiyyətdə “iş” görüntüsü, “islahat” görüntüsü yaradacaq?
İndi də idarəçilik F. Ağamalı vasitəsi ilə R. Mehdiyevi “qurban” verməyə hazırlayır ki, Azərbaycanda feodalizmi-ailə hakimiyyətinin əsaslarını bir qədər də qoruyub saxlaya bilsin!
“Qurban”lar vermək Feodalizmdən xilas olmaq deyil!
Ailə hakimiyyəti bütünlüklə, hamılıqla hakimiyyətdən getməlidir!
Bu gün ailə hakimiyyətində təmsil olunan HƏR BİR KƏS Feodal üsul-idarəçiliyinə məxsus “məktəb”in məhsuludur.
Feodal “məktəb”inin məzunları Azərbaycan cəmiyyətini özündən asılı bir vəziyyətə gətirən, daim insanları təzimə təhrik edən, cəmiyyəti sürü halında saxlayan, PADŞAH-TƏƏBƏ, ÇOBAN-QOYUN, CANAVAR-QUZU münasibətləri üzərində “qanun”lar fikirləşən bir düşüncəyə sahibdirlər.
Məhz bu səbəbdən də bu gün Azərbaycan Respublikası mütərəqqi dövlətlərlə müqayisədə bir SİYASİ FORMASİYA GERİ QALIR!
İdarəçiliyin Azərbaycan cəmiyyətinə mülkədarcasına yanaşması var!
Biz hələ də 19-cu əsr idarəçilik təsəvvüründən çıxa bilməmişik.
Biz hələ də ölkə olaraq köhnə dünyaya aidik!
Padşahdan “xələt” ummaq, “xələt” istəmək, bu “xələt”ə görə ölkədə çatışmazlıqlara göz yummaq, çatışmazlıqlara görə padşahı yox cəmiyyəti qınamaq, padşahın və ətrafının uğursuzluğunu uğur kimi göstərmək, düşüncədə daşlaşmış Feodal yanaşmasından irəli gəlir.
Azərbaycan Respublikasında Feodalizmdən doğan naturallıq hökm sürməkdədir!
Yəni özün üçün düşün, özün üçün ye, yaxın ətrafına cavabdeh ol, başqalarını düşünmə, ölür sənə nə, qalır sənə nə?
Acsan, padşaha xətir sus, toxsan toxluğunu padşahdan gör, itaət elə!
Ölkədə padşah-təəbə münasibətləri olmasaydı, Azərbaycanın çörəyini H. Əliyevin, oğlunun-gəlininin, eləcə də başqalarının adına yazmazdılar!
Mütərəqqi cəmiyyətlərdə hər bir kəs öz zəhmətinin çörəyini yeyir, hansısa kimin yox!
Müasir dünya ilə ayaqlaşa bilməyən ata-oğul-gəlin diktaturası Ölkəmizi olduqca ağır bir duruma gətirib.
- İcra hakimiyyəti dağınıq bir vəziyyətdə.
- Qanunverici hakimiyyət Qanunvericiliyə oxşamır.
MM Azərbaycan xalqından xəbərsiz formalaşdırılıb. - Məhkəmələr barəsində isə heç danışmağa dəyməz(sifarişlər, tapşırmalar, tərəf tutma, rüşvət və.s.).
- Vətəndaşların hüquq və azadlıqlarından istifadəsizlik!
Nəticədə, Azərbaycan xalqı özü üçün ailə hakimiyyətini gərəksiz hakimiyyət kimi qəbul edib!
Nəticədə Azərbaycan cəmiyyəti özünü ailə hakimiyyətinə yad bilir!
Nəticədə Azərbaycan ictimaiyyətinin böyük əksəriyyəti ailə hakimiyyətinin bir kəlməsinə də inanmır!
Bunun da nəticəsi kimi, Azərbaycanda dövlətçilik özünün yoxluğuna doğru getməkdədir!