Həbsdə olan “Azadlıq” qəzetinin bölgə müxbiri Elçin Ismayıllının atası Səməd Ismayılov oğlunun cəzaçəkmə yerinin dəyişdirilməsi üçün Pentensiar Xidmətin rəisi Ceyhun Həsənova müraciət edib. Bu barədə azadliq.info-ya məlumat verən Səməd Ismayılov bildirib ki, oğlu hazırda 17 saylı cəzaçəkmə müəssisəsində saxlanılır. Onların daimi yaşadıqları İsmayıllı rayonuna yaxın olan Şəki şəhərində yeni Cəzaçəkmə müəssisəsi istifadəyə verilib. Qanunvericiliyə görə məhbuslar cəzalarını yaşadıqları əraziyə yaxın yerdə çəkməlidirlər. Səməd Ismayıllşov bu səbəbdən oğlunun yanına mütəmadi gedə bilmədiyini, ona sovqat apara bilmədiklərini də qeyd edib. Karantin rejimi dövründə bununla bağlı vəziyyət daha da imkansız olub.
Səməd Ismayılov məsələ ilə bağlı Elçin Ismayılının özünün də rəsmi müraciət edəcəyini deyib.