İlham Hüseyn
Qorxmaz Əliyev bugün azadlığa çıxdı və mən də İradə Nərimanla, şöbə sədri Qabil bəylə birlikdə ziyarətinə getdik. Təbii ki, bizim məlum müsahibədən xəbərimiz yox idi və Qorxmaz da hər şeyin qaydasında olduğun bildirdi. Amma ziyarətdən qayıdanda, yolda xəbər tutduq ki, Qorxmaz bizimlə şirin-şirin söhbət etdiyi vaxt, artıq “sürpriz” açıqlama veribmiş.
- Həbsdə olan cəbhəçilər arasında ən çox maddi yardım Qorxmazın ailəsinə edilib. İki azyaşlı uşağının olmasını, ailə vəziyyətinin ağır olmasını nəzərə alaraq, xeyli adam Qorxmaza yardım göstərib.
- Qorxmazın ailəsinə edilən əsas yardımlar bank vasitəsilə edilib. Bankdan isə ya anası, ya həyat yoldaşı, ya da qardaşı götürüb. Yəni, ona edilən yardımlardan 1 manat mənimsəmək ehtimalı olmayıb. Bunu sübut etmək çətin deyil.
- İlk gündən Qorxmaz vəkillə təmin edilib. Əvvəl Elçin Sadıqov, sonra Fariz Namazlı müdafiəsin təşkil edib.
- Qorxmazın məhkəmədə çıxışından kiçik bir hissəni təqdim edirəm. Bunu vəkil də, məhkəmədə iştirak edənlər də təsdiqləyə bilər.
“Mənə AXCP-dən istefa verməyim müqabilində “Prado” markalı avtomobil təklif etdilər. Başqa təkliflər də oldu. Amma mən bildirdim ki, bizim şərəfimiz satılmır. Gördüyünüz bu hakim isə mənə deyir ki, səni süründürəcəm. Çünki cəbhəçilərə nifrət edir”. - Qorxmazın həyat yoldaşının şəxsən mənə yazdığı onlarla vatsap mesajı var ki, dərin təşəkkürün bildirir, bu aylar ərzində onlara maddi və mənəvi dəstək olduğumuza görə minnətdarlığın ifadə edir.
Mən o səs yazıların yaymağı özümə sığışdırmıram. Amma Qorxmazın həyat yoldaşı hicablı qadındı, namaz qılandı. Ona demək istəyirəm ki, inandığı Allaha xatir həqiqəti söyləsin və bu aylar ərzində partiyadan edilən yardımlardan danışsın. Təkcə Novruz bayramı ərəfəsində cəbhəçilər bu ailəyə 600 manatdan artıq yardım ediblər. Qalan aylarda da mütəmadi yardım edilib. Və bir daha deyirəm ki, həmin yardımlarla bağlı sübutlar da var. - Bu aylar ərzində virtual olaraq da Qorxmazı tək buraxmamışıq. Onun həbsiylə bağlı kampaniyalar etmişik, gündəmdə saxlamışıq, mətbuatda haqqında onlarla material dərc edilib və s.
Biz heç nəyə görə peşman deyilik. Günahsız tutulan cəbhədaşımızı müdafiə etmişik, öz insanlığımızı göstərmişik. Təəssüf ki, Qorxmaz bəy bu yolu axıra qədər gedə bilmədi və şər-böhtana əl atdı.
Amma biz belə şeyləri çox görmüşük və Qorxmazı buna məcbur edənləri lənətləyirik.
P.S Qorxmaz bəy, Allah köməyin olsun. Amma belə bir hərəkətdən sonra gərək bizimlə şəkil çəkdirib “bəy, alnıaçıq girdim, başıdik çıxdım” deyib, üzümə qımışmayaydın. Sənə hazır mətn yazanları, oxutduranları qınayırıq.
P.S.S. Əgər bu aylar ərzində sənin ailəni sahibsiz qoysaydıq, bu gün hansı üzlə evinə gələrdik?