İlham Hüseyn
Nə qədər həyasız, namərd, Allahsız adamlar var. Biz ilk gündən Qarabağla, orduyla bağlı mövqeyimizi ifadə etmişik. Dünən partiya sədri də birmənalı şəkildə “dövlətin və ordunun yanındayıq” mesajı verdi. Minlərlə vətənpərvər küçələrə axışdı və bütün dünyaya milli ruhumuzun ölmədiyini, Qarabağı untumadığmızı və heç kimə güzəştə getməyəcəyimizi bəyan etdi.
Amma yenə də məkrli qüvvələr bu prosesə zəhər qatmağa və dolayısıyla düşmənə xidmət etməyə başladılar. Dinc, səmimi insanların arasına təxribatçı qrup salaraq, prosesi gözdən salmağa, iyrənc rəng verməyə çalışdılar. Axırda da təbliğatı bu istiqamətdə qurdular ki, qeyri-qanuni cəhdlərə yol verənlər müxalifət imiş və bu qüvvələr əsayişi pozmağa çalışırmış. Belə bir görüntü yaratmaqla, dinc insanlara su şırnağı tuşlamağa, zorakılıq tətbiq etməyə əsas yaratdılar.
Bir daha bəyan edirik ki, aparılan təbliğat yalandı, rejimin ssenarisinin nəticəsidi. Biz Qarabağı tələb edirik, şəhidlərimizin qisasının alınmasını istəyirik. Təxribat törədənlər, bunu ssenariləşdirənlər isə Qarabağı unutdurmağa çalışanlar, milli ruhu öldürmək istəyənlərdi.
Hər şey göz qabağındadı. Cəsarətli, vətənpərvər, qürurlu vətəndaş qisas istəyir.
İndi hökumət də sübut etsin ki, müstəqilliyimiz Rusiyaya qurban verilməyib, dövlətin qətiyyəti var və şəhidlərin qisası alınacaq.
Azərbaycan xalqı isə dünənki hadisədən siyasi şou düzəldilməsinə imkan verməməli, bu istiqamətdə təbliğat aparanlar xalqın ciddi qınağıyla üzləşməlidi.
Hamı bilsin ki, bu xalqı, dövləti, vətəni sevənlər təxribatçı ola bilməz. Kim ki, xalqa, dövlətə, vətənə qənim kəsilib, təxribatı törədən də odur.