AXCP RH üzvü Fuad Qəhrəmanlı
Bu gün Xalq Cəbhəsinin yaranmasının 31 ili tamam olur.
Bu 31 illik tarix, milli azadlıq, vətənin bütövlüyü və demokratiya uğrunda mübarizənin şərəf tarixidir. Bu tarixi dünən və bu gün öz cəsarət və fədakarlıqları ilə yaradanlar, yazazanlsr isə Xalq Cəbhəsinin köhnə və yeni üzləridir.
Bu fədakar isanlar üçün cəbhəçi adı, zülmə boyun əyməmək, haqsızlıq qarşısında susmamağın adıdır.
Cəbhəçi olmaq xalq üçün azadlığından vaz keçə bilmək, gülə- gülə həbsxana qapısı aça bilməkdir.
Cəbhəçilik alınmayan, satılmayan əqidənin əsgəri olmaq, təmənna, qarşılıq güdmədən sevməyi, fədakarlıq etməyi bacarmaqdır.
Cəbhəçi kimi yaşamaq, özün çətinliklər, problemlər məngənəsində sıxılırkən tanımadığın, adını bilmədiyin insanların xoşbəxtlik xəyallrını qurub özünü ovutmaq, özündən öncə xalq üçün arzulamağı bacarmaqdır.
Cəbhəçilik mübarizədən vaz keçmək müqabilində təklif olunan komfort, təminatlı həyat təkliflərindən imtina edib, qürurunu, ləyaqətini müqəddəs əmanət kimi qorumaqdır.
Cəbhəçiyəm demək, insanlıq bazarında ləyaqətini, şəxsiyyətini piştaxta üzərinə atmamaq, insan mənliyini qiymətsiz bilməkdir.
Cəbhəçilik bir partiyanı deyil, insanları, insanlığı sevmək, Vətənə aşiq olmaq, xalqa sevgi və sədaqət andı içməkdir.
Cəbhəçilik bitməyən, tükənməyən bir inama sarılıb, pərvanə kimi mübarizə oduna yanmaq, qaranlıqlar içində bir ümid közərtisini üfləyib aydınlıq həsrətində olanlara işıq saçan məşəl bəxş etməkdir.
Cəbhəçi olmaq bir xalqın zülm və istibdada qarşı mübarizə tarixini yazmaq, gələcək nəsillərə öyünə biləcəkləri, örnək alacaqları şərəf səlnamələrini ərmağan etməkdir.
Cəbhəçilik bir sevda yolçuluğudur, “getməsək də, varmasaq da, o yol bizim yolumuzdur” deyə bilməkdir.