Şulaverlə Noyanberyan arasındakı çayı üzərindəki köprünün partladılması əməliyyatı
Qobustan həbsxanasında saxlanan, ömürlük azadlıqdan məhrum edilən OMON komandiri Elçin Əmiraslanovun memuarı. 3-cü hissə (İlk dəfə yayımlanır)
Əvvəli burda
1ci yazı
2ci yazı
www.azadliq.info/235629.html
İkinci qrup həm də Yaşarın arvadı ilə xəstəxananın içinə sakitcə girib Yaşarı və Hamleti götürməli idi. İkinci qrupun birincidən xəbəri yox idi. Onlara belə başa salmışdım ki, heç bir müqavimətə rast gəlməyəcəksiniz; gedin və sadəcə götürün. Onların altı nəfəri silahlı idi. Biz birinci qrup olaraq xəstəxananın mühafizəçisini cəld və sakitcə “yığışdırdıq”. Ora əsas yolla yox, gizli dağ yolu ilə gəlmişdik.
İkinci qrup xəstəxananın həyətinə daxil olanda biz çıxdıq və mühafizəni təşkil etməyə başladıq. Onlar Yaşarla Hamleti götürdülər. Qapılarda bir-iki yerə mina qoyub çıxdıq. Elə alındı ki, biz ikinci qrupu “Qırmızı Körpü”də qarşıladıq. Yaşara ambulansda tibbi yardım göstərib vertolyotla Qazaxa, ordan da Bakıya xəstəxanaya yola saldıq.
Əsas məsələ-körpü qalmışdı… Sərhədi keçmək çox çətinləşmişdi. Bizdə bir incəli Mamed vardı. Dedi ki, Rustavidə yol tikintisində mühəndis işləyib, o minaları o taya keçirməyə köçək edə bilər. Uzun müzakirədən sonra o gürcü seriya nömrəli asfaltdaşıyan maşın gətirdi. Minaları maşına yükləyib üzərinə tam dolana qədrə şebel tökdü. Sonra sürücüyə və özünə “nakladnoy” yazdı. Bu üsulla sərhədi keçib, körpüyə yaxın yerdə minaları boşaltdıq. Allahverdi Gəncəliyevlə mən Azərbaycan Gürcüstan sərhədini Ermənistana yaxın ərazidən keçdik. Çayın kənarında şebelin altındakı minaları çıxarıb körpünün altına yerləşdirdik. Bu əməliyyat olduqca riskli idi, demək olar, minumum sığortamız belə yox idi. Buna baxmayaraq körpünü partlatmağı bacardıq. Yenə də əməliyatdan əvvəlki və sonrakı fotoları raportlarla birgə Rövşən Cavadov və Nizami Şahmuradova təqdim etdim.
1993-cü ilin qışında Cavadovun əmrilə mən və rəhbərlik etdiyim OMON-un bir rotası Agdərədə orta kənddə dislokasiya olduq. Bizi Ağdərənin rəisi gürcüstanlı Camal qarşıladı, vəziyyətin ağır olduğunu bildirdi. OMON-un 3-cü batalyonun komandiri Şahmuradov Vidadi və yerli könüllü batalyonlar Nəciməddin Sadıqovun rəhbərlik etdiyi ordu qüvvələri 3 istiqamətdən erməni-rus qüvvələrinin hücumunun qarşısını almışdılar. Kəşfiyyat məlumatlarına görə Ermənistan tərəfindən daxili qoşunlar və bir rus motoatıcı briqada hücuma keçib, Kasapet dağında hündürlük götürməli idi. Ermənilər oraya təzəcə dislokasiya olurdular. Hər axşam Tərtər batalyonun komandiri Sərdar Həmidov, Nəciməddin Sadıqov, Cəfər Cəfərov, Vidadi Şahmuradov və mən görüşürdük, kəşfiyyat məlumatlarını araşdırırdıq. Sabahkı əməliyyatı planlaşdırırdıq. Bir neçə gündən sonra rəhbərlik elədiyim OMON və Vidadi Şahmuradovun rəhbərliyi altında Kasapet dağının yüksəkliyini ələ keçirmək üçün qəfil hücuma keçdik. Yüksəkliyi tutduq. Mənim heyətimdən bir nəfər ağır yaralandı, bir nəfər İlqar İsmayılov şəhid oldu. Bir-neçə həftə döyüş davam elədi. DİN-in tapşırığı ilə mən Qazaxa qayıtmalı oldum. Mənim nəzarət elədiyim əraziyə sərhəd qoşunları və daxili qoşunlar yerləşdirildi.
İmir körpüsü bərpa olunmuşdu, Ermənistana dəmir yolu işləyirdi, yenidən dayandırmaq lazım idi. Bizim qrupun Gürcüstan ərazisinə daxil olması Qazaxın rəisi İsaxan Aşurova tapşırıldı. Aşurov bir-neçə gün çalışsa da bu mümkün olmadı, biz keçə bilmədik. Aşurov belə məlumat verdi ki, sizi Ermənistana keçən bütün körpülərdə gözləyirlər. Böyük risk eləmək lazım idi. Döyüşçülərimizi itirmək istəmirdim.
“Qaz-66” maşınının içərisinə dairəvi şəkildə qumla dolu kisələrlə zod düzəltdik, bütün icraçıları Xram çayının ( Qırmızı körpüdə) qırağına düzdüm. Bu işi görməli olduğumuzu hamısına dedim. Ən güclü silahlarla silahlanmışdıq. Gecə görüntüsü, RPQ-7, RPQ-9, SVD, arbalet, bir-birimizlə əlaqə saxlamaq üçün ratsiyalar, səsboğucu avtomatlar.
İki qrupa bölünmüşdük, həm döyüşməli idik, həm də körpünü partadmalı idik. Belə döyüşlərə gedəndə mən belə əmr verirdim, məni qabağa keçənə söyəcəyəm – qabaqda mən getməliyəm. Bu əmrə mənim rəhbərlik elədiyim OMON alışmışdı. Biz bir-birimizə ailədən də əziz idik. Beləliklə, maşınla Ermənistan-Gürcüstan sərhədinə QAZ-66 ilə soxulduq. OMON-çular adi şəkildə növbəti qəhrəmanlıq edirdilər. Yüngül müqavimət və sərhəddən keçdik. I qrup çox yüngül şəkildə körpünün mühafizəsini yığışdırdı. İkinci dəfə idi ki, İmirin dəmiryolu körpüsünü partladırdıq. Bu əməliyyatda iştirak edənlər: Rüstəmov Rəhman, Həsənov İlham, Ə.Nadir, Vəliyev Babək, Məmmədov Yaşar, Gəncəliyev Allahverdi, Hüseyn, Təhsin, Şahin və mən. Sabahı axşam Moskva xəbərlərində “Vremya”da Gürcüstan – Ermənistan arasında olan dəmiryolu körpüsünün partlaması haqqında veriliş getdi. Şəxsən özüm qulaq asdım. Əvvəllər olduğu kimi mən Bakıya məruzə etdim. Əməliyyatdan qabaq və sonrakı fotoşəkillərin bir nüsxəsini Nizami Şahmuradova və Rövşən Cavadova raportla birlikdə təqdim etdim. İsgəndər Həmidov hamımızı mükafatlandırdı.
1993-cü ilin qışında Noyanberyana və Kalinonaya gedən qaz kəmərini partlatmaq lazım idi. Sərhədi keçmək getdikcə çətinləşirdi. Yenə də böyük risklə Ermənistan – Gürcüstan sərhədinə QAZ-66 ilə soxulduq. Xram çayının üzərində hər 10 metrdən bir qaz kəmərini minaladıq. Müqavimətə rast gəlmədik. Heç kimin ağlına gəlməzdi ki, çayın üzərində kəməri gəlib minalaya bilərlər. Çünki, 1 km-lik yaxınlığında Kirəşli-Muğanlı kəndi var. Biz isə bunu gecə etdik. Briqada komandiri Sadıqov bizi “Qırmızı körpü”də gözləyirdi. Ona da maraqlı idi ki, biz bunu necə etdik. İsa Sadıqov qürurlu zabitdir, yəqin ki, o da öz sözünü deyə bilər. Partlayış-yanğın təxminən 4-5 saat davam elədi. Kalininoda-Noyanberyanda aylarla qaz olmadı. Bu partlayış Moskva xəbərlərində ORT 1-də yayımlandı. Raportları Rövşən Cavadova, Nizami Şahmuradova təqdim etdim.
1993 – 1994-cü illərdə Noyanberyanın sərhədində Sadoxlu tərəfə bazar körpüsünü partlatdıq. Əməliyyatda eyni adamlar iştirak edirdi: Rüstəmov Rəhman, Həsənov İlham, Əhmədov Nadir Vəliyev Babək, Əhmədov Şahin, Kalenkənd Şahin, Salahlı Mehman, Şəmsi, Gəncəliyev Allahverdi, Məmmədov Yaşarvə mən.
Bu qrup illərlə praktika ilə hazırlanmış, ağır döyüşlərdən keçmiş professional bir qrup idi. Ekstremal vəziyyətlərdə sağ qalmağı yaxşı bilirdilər, bütün növ silah və minalardan istifadə etməyi yaxşı bilirdilər. Neçənci il olmağı yadımda deyil, DİN Vaqif Novruzov məni qəbuluna çağırdı. Mən nazirin otağına daxil olanda Nərimanov rayonunun polis rəisi Hilal Əsədov da orada idi. Uzun illər idi ki, Hilal Əsədovla biz möhkəm dost idik. Novruzov bizim işləri yüksək qiymətləndirdi.
O, çox güclü kadr idi, SSRİ-nin DİN-də idarə rəisi işləmişdi. SSRİ-də ən yaxşı əməliyyatçılardan biri idi. Bizə apardığımız işləri dayandırmamağı əmr etdi. Müavini Rövşən Cavadovla müzakirələr aparmışdı. Biz DİN-nin əmrilə Gürcüstan-Ermənistan sərhədində Sadoxlu kəndi yaxınlığında çayın kənarında dəmir yolunun və şosse körpüsünü partlatdıq. O yadımdadır ki, qış idi. Əməliyyatda iştirak edənlər ağ masxalatlarda idi. Əməliyyat nazirə məruzə olunda, mənə növbəti rütbə verildi.
DİN Vaqif Novruzovun təqdimatı ilə Milli Qəhrəmanlığa rəsmən təqdim olundum. Bu ikinci dəfə idi ki, mən Milli Qəhrəmanlığa təqdim olunurdum. Hər iki halda mən imtina eləmişdim. Hətta Cavadov əsəbiləşdi ki, nəyə görə belə edirsən. (Bu barədə prezident adminstrasiyasında və DİN-nin arxivində sənədlər var ).