Demokratik Qüvvələrin Milli Şurası prezident İlham Əliyevin 15 iyul tarixində səsləndirdiyi üçüncü nifrət çıxışından hiddətləndiyini bildirir. Həmin çıxışda İlham Əliyev dövlət başçısına yaraşmayan, utancverici və son dərəcə məsuliyyətsiz bir şəkildə Azərbaycan xalqını, onun ən ülvi vətənpərvərlik duyğularını aşağılamış, Qarabağ uğrunda döyüşə atılmağa və canından keçməyə hazır olan yüz minlərlə azərbaycanlını təhqir etmişdir.
İşğalçı Ermənistanla savaşa yollanmaq üçün 14 iyul tarixində Bakıda meydanlara çıxan və Ali Baş Komandandan hərbi səfərbərlik tələb edən, eyni məqsədlə son günlər ərzində paytaxtda və digər bölgələrimizdə yerləşən hərbi komissarlıqlara müraciət edən on minlərlə həmvətənimizin həmin Ali Baş Komandan tərəfindən aşağılanması və qeyrətli, torpaq təəssübü çəkən oğullarımızın Vətən sevgisinin aşağılanması, heç şübhəsiz ki, müstəqil Azərbaycan dövlətçıliyi tarixinin ən utancverici hadisələrindəndir.
Hərbi komissarlıqlara cəmi 150 nəfərin müraciət etməsi ilə bağlı yalan və əsassız informasiyanı ictimailəşdirməklə İlham Əliyev ilk növbədə torpaqlarımızı işğal etmiş Ermənistana “Azərbaycan xalqı savaşıb torpaqlarını azad etmək istəmir, insanların Qarabağ tələbli çıxışları və etirazları şou xarakteri daşıyır, gerçək deyil” mesajını verib düşməni sevindirmiş oldu ki, buna görə o, ən azı Azərbaycan xalqından üzr istəməli və xəcalət çəkməlidir. Dünənki ümumxalq etirazı, orduya dəstək aksiyası bir daha göstərdi ki, işğal altında olan Azərbaycan ərazilərinə münasibətdə xalqın iradəsi ortadadır, problem xalqda deyil, onun bacarıqsız, korrupsioner və kleptokratik rəhbərliyindədir.
Milli Şura olaraq dəfələrlə hakimiyyətin düşmən obrazında ərzilərimizin 20 faizini 27 ildir işğalda saxlayan erməniləri deyil, millətimizin hüquq və azadlıqları uğrunda prinsipial və ardıcıl mübarizə aparan, fədakarlıqlar edən, məhrumiyyətlər yaşayan, rejimin korrupsiyasını, talançılığını, zorakılığını, işgəncələrini və s. cinayətlərini ifşa və tənqid edən gerçək müxalifəti- Milli Şuranı və AXCP-ni gördüyünü bildirmişik. Son nifrət çıxışında İlham Əliyev öz dililə “onlar ermənilərdən daha pis düşməndir” söyləməklə dediklərimizi doğruladı. 19 mart tarixli nifrət çıxışı kimi bu müraciət də müxalifətə qarşı yeni və daha amansız repressiya dalğasının anonsudur.
Milli Şura və AXCP 15 iyul aksiyasının təşkilatçısı olmayıb və həmin aksiyada iştirak etməyib. Bu, torpaqlarını azad etmək əzmini və iradəsini nümayiş etdirən xalqın etirazı idi. Bu, xalqın milli ruhunun diri olmasının, öz doğma torpaqlarını heç kimə güzəşt etmək məramından uzaq olmasının aydın bir ifadəsi idi. AXCP sədri Əli Kərimli bəyanat verərək bu çətin günlərdə dövlətin və ordunun yanında olduğunu bildirib və dövləti düşmənlə mübarizədə bütün qüvvələrini səfərbər etməyə səsləyib. Bu qədər dürüst və vətənpərvər mövqedən sonra Xalq Cəbhəsi Partiyasını, onun rəhbərliyini xain, satqın adlandırmaq və heç iştirak etmədiyi aksiyada təxribat törətməkdə suçlamaq hər gün artan sosial narazılıq, ictimai qəzəb və beynəlxalq etimadsızlıq fonunda rejimin çarəsizliyinin və psixoloji gərginliyinin etirafıdır. İlham Əliyev rejimi ölkənin müdafiə xərclərini müxtəlif əyri yollarla ofşor hesablara göndərib, Rusiya ilə silah alverindən “otkat” alıb. Xalqın dünənki Qarabağ dirənişi əlbəttə, belə natəmiz əməllərlə məşğul olan hökumətin bacarıqsız rəhbərliyini narahat etməlidir.
Bu çıxışdan həm də İlham Əliyevin Milli Şuranın ZOOM toplantılarının daimi təqibçisi olması üzə çıxdı. Kibercinayət yolu ilə əldə edilmiş həmin iclasların az qala hər təfərrüatına bələd olsa da, prezident istisnasız olaraq bütün çıxışlarında yalnız bir detalı dönə-dönə, yana-yana xatırladır: bu, neftin qiymətinin 14 dollara düşməsi ilə bağlı epizoddur. Prezident Əliyev heç vaxt öz çıxışlarında Azərbaycan torpaqlarının 20 faizinin işğal edilməsi, işğalın 27 ildir davam etməsi, hətta qəhrəman generalımızın, əsgərlərimizin şəhid olmasından belə yanğı ilə danışmayıb. Çünki, Azərbaycan nefti kleptokrat Əliyevlər ailəsinin şəxsi sərvətidir, onun Azərbaycan xalqına aidiyyəti çox azdır və neftin ucuzlaşması ailənin şəxsi gəlirlərinin azalması deməkdir.
Milli Şuranın sədri, professor Cəmil Həsənlidən ABŞ-ın ən nüfuzlu tədqiqat mərkəzlərindən birində keçirdiyi 10 aylıq yaradıcılıq ezamiyyətinin hesabatını tələb edən İlham Əliyev 17 illik prezidentliyi dövründə ölkəyə daxil olan və artıq əksəriyyət etibarilə talan edilmiş 200 milyard dollar həcmində neft sərvətinin hesabatını doğru-dürüst şəkildə təqdim etsəydi onun aylardır 14 dollarlıq neft söhbətindən niyə belə yanğı və qəzəblə danışmasının “sirri” açılardı.
Demokratik Qüvvələrin Milli Şurası olaraq bəyan edirik ki, Azərbaycan xalqının döyüş əzmini, öz torpaqlarını son qarışınadək işğaldan azad etmək qətiyyətini və iradəsini heç bir daxili və xarici qüvvə məhv edə bilməz. Xalqımız qəddini dikəldib, daxili resurslarını səfərbər edib bütün işğal olunmuş ərazilərimiz üzərində Azərbaycanın suveren hüquqlarını və ərazi bütövlüyünü bərpa edəcək. Buna heç kimin, xüsusilə də, İlham Əliyevin və ermənilərin şübhəsi olmamalıdır.
17 illik idarəçiliyi dövründə İlham Əliyev ölkəni çökürdüb, büdcə vəsaitləri talanıb, ölkənin müdafiə xərcləri mənimsənilib. Bu illər ərzində o, işğal altında olan əraziləri almaq əvəzinə Dubay mülklərini alıb, onun ailə üzvlərinin korrupsiyası dünyanın ekzotik adalarını fəth edib. Azərbaycan xalqı qlobal Covid təhdidi qarşısında tibbi sığortasız, karantin şəraitində sosial yardımsız qalıb. Ölkə iqtisadiyyatı çöküb, idarəçiliyi dövründə o, iqtisadiyyatı şaxələndirmək əvəzinə korrupsiyanı şaxələşdirib. Məhz bunların hesabatın vermək lazımdır. Ölkə sosial-iqtisadi və siyasi sarsıntılar məngənəsində boğulur. Ən dəhşətlisi odur ki, ölkə sərhədində döyüş əməliyyatının getdiyi günlərdə öz xarici işlər nazirini tapa bilməyən bir prezident 17 il ərzində ölkəni bu günə düşməsinin günahını müxalifətdə – Milli Şura və Xalq Cəbhəsində axtarır.
Milli Şura olaraq bildiririk ki, İlham Əliyev son nifrət çıxışında anonsunu verdiyi ağır repressiyaları gerçəkləşdirərək müxalifəti tamamilə məhv etsə belə, bu onun ən yaxın zamanda bütün hüquq və azadlıqlarını əlindən alaraq neft və milyardlar sahibiykən yoxsul və iztirablı həyata məhkum etdiyi Azərbaycan xalqı ilə üz-üzə qalaraq ona hesabat vermək məsuliyyətindən xilas etməyəcək.