Tarix elmləri doktoru, professor Solmaz Tohidi
Azərbaycan Ziyalılarına !
Bu gün Tarix yaranır!
Bu gün Tarix yazılır !
Son 3 günün təlatümü, həyəcanı bütün xalqı ayağı qaldırıb. 30 ilə yaxın məruz qaldığımız işğal, yaşamaqda olduğumuz müharibə və dözməkdə davam etdiyimiz “atəşkəs” rejimi özünün yeni mərhələsinə qədəm qoyub. Dövlət sərhədimizə təcavüz olunub. Ərazilərimizə atəş yağır, ordumuz generalından tutmuş 18 yaşlı əsgərinə qədər itkilər verib. Bir ailənin övladı, bir el-obanın fəxri sayılan oğullar ölümə qənşər gedib, qəhrəman olub, Şəhidə çevrilib. Amma neçə illərdir bu cür şəhidlərini qarşılamağa artıq sanki “alışmış” insanlarımız bu gün görünməmiş qəzəb, nifrət və qisas ehtirası ilə yaşadıqları şəhərlərin, rayonların, kəndlərin küçələrinə axışıb.
Azərbaycan gəncliyi yenə də meydandadır və “Qarabağ” hayqırır.
Nə baş verir ? Cavab bilmək istəyənlər səslənən şüarların arasından eşidərlər:
“30 ildir!” – “Bəsdir!”.
30 il əvvəlin hadisələri – 1988-ci ilin noyabrı yada düşür. Meydan hərəkatı Universitet tələbələrinin qarşısı alınmaz yürüşü ilə başlamışdı və onların önündə öz tələbələrini başsız qoymayan rektor gedirdi. 1988-ci ilin tələbə seli Elmlər Akademiyasının qarşısından keçərkən alimlər bağlanmış qapıları və rəhbərliyin canlı sipərini yararaq gənclərə qoşulub Azadlıq meydanına gəlmişdi. O vaxt Azərbaycan ziyalıları Meydanda idi! Tribunadan danışır, xalqın sözünü səsləndirir, Mərkəzin kommunist rəhbərliyinə çatdırırdı. Sonra hərəkatdan uzaqlaşdı. Hadisələri az qisim fəalların öhdəsinə buraxdı…
1990-cı ilin yanvarı gəldi. Milyonların arasında Azərbaycan ziyalısı da Qanlı yanvar şəhidlərini son mənzilə yola saldı. Və yenə öz müşahidəçi mövqeyinə çəkildi. Hadisələrin sonrakı gedişi və nəticələri məlum…
Bu gün ziyalılar – biz, bir zümrə olaraq, ümumiyyətlə ortalıqda yoxuq!
Gənclər isə “Azadlıq” meydanına axışır…
Bəli, indi fərqli vəziyyətdir. Artıq öz müstəqil Dövlətimiz var, Prezidentimiz var, Parlamentimiz var, Hökumətimiz var, Ordumuz var… Və 30 ildir silinməyən “Qarabağ” adlı ləkəmiz var.
Odur ki, gənclər “Azadlıq” meydanına axışır… Ali Baş Komandana “Mənə silah ver” – deyir. “Məni Qarabağa göndər” – tələb edir.
Və bu tələblər yalnız 30 ilin tükənən səbrindən gəlmir. O 30 il, əslində, bizim nəslin göstərdiyi səbrdir! Bu tələblər Azərbaycan gəncliyinin yüksək Vətənpərvərlik duyğusu, öz şəhid həmyaşıdları qarşısında Borc və hələ itirilməmiş Ləyaqət hissindən gəlir.
Bu gün qarşılarını kəsən yoxdur… Polislər onlarla bərabər addımlayır, yəqin ki, hisslərini bölüşür, bəlkə də gənc, coşqun qanlarının şəhidlərin dəfnindən sonrakı günlər soyuyacağını gözləyir, bəlkə də xalqının “tez alovlanıb, tez də söndüyünə” bələd olduğundan indiki şəraitdə münaqişə yaratmaqdan çəkinir, pandemiya dövrünün bütün qaydalarının pozulmasına belə göz yummalı olur…
Amma yalnız gənclərin deyil, bütün xalqın varlığına hakim kəsilmiş bu təlatüm, həyəcan və ən mühümü, yaşadığımız son 3 günün gətirdiyi təhlükə anlamı artıq “gərginlik” ötüşdükdən sonra həyatın yenidən “öz əvvəlki axarına” qayıdacağından xəbər vermir.
Yeni tarix başlayır, yeni tarix yazılır.
“Tovuz döyüşləri” uzun illər təlqin edilən “qarşı tərəfin” növbəti “təxribatı” deyildir. Bu müharibədir. Onun düşmən tapdağı altında olan torpaqlarımızda yox, düşmən dövlətlə sərhəddə başlaması təsadüfi deyildir. Döyüş bölgəsinə gəlmiş generalın və yüksək rütbəli zabitlərin az bir zaman içində birlikdə məhv edilməsi sadəcə “müharibə dövrünün hadisəsi” deyildir. Azərbaycan cəmiyyəti bu “sərhəd təxribatı” planlarının qonşu düşmən ölkənin qərargahında cızılmadığını, baş verənlərin arxasında daha qüvvətli, daha təhlükəli siyasi-hərbi gücün və daha məkrli, uzağa yönəlmiş niyyətlərin durduğunu anlayır.
Bu plan və niyyətlərin birbaşa ölkəmizin Ərazi bütövlüyünə, Müstəqilliyimizə və Dövlətçiliyimizə qarşı yönəldiyi göz qabağındadır. Dövlətimiz bu təhlükənin qarşısında təklikdə davam gətirəcəkmi? Hakimiyyət qurumları bu təhlükəyə nə dərəcədə hazırdır? Son illər Azərbaycan cəmiyyəti ilə itirilmiş əlaqələr, yaranmış problemlərin polis vasitəsilə həlli, dili qısa Milli Məclis və… artıq meydanlara axışan Azərbaycan gəncliyi…
Yeni “Meydan” bu gün xaricdən gözlənilən təhlükəni daha da dərinləşdirə, ərazilərimiz və dövlətçiliyimiz üçün arzu olunmaz nəticələrə gətirə bilər. Biz bu yolu artıq keçmişik…
Azərbaycan ziyalıları, bu gün daha üzərimizə düşən məsuliyyətdən kənara çəkilə bilmərik. Buna haqqımız yoxdur!
Bundan sonra hadisələrin istənilən inkişafı üçün biz hamimiz cavabdeh olacağıq.
Ən əvvəl, gənclərimizin mübariz ruhunun qırılmasına yol verməməli, cəmiyyəti dövlətimizin və ordumuzun Qarabağı, işğal olunmuş bütün torpaqlarımızı qaytarmaq əzmində və gücündə olduğuna inandırmalı və buna səfərbər etməliyik. Gənclərin Vətən yolunda vuruşmaq tələbinin şəhər meydanlarında öz polisi ilə üz-üzə deyil, döyüş meydanlarında düşmən qarşısında yerinə yetirməsinə nail olmalıyıq.
İndi hər hansı vətəndaş qarşıdurmasına qətiyyən yol vermək olmaz. Müvafiq dövlət qurumları da bunu nəzərə almalıdırlar.
Özünü ziyalı zümrəsinə aid edən bütün vətəndaşlarımız bilməlidirlər ki, üzləşəcəyimiz hər hansı siyasi, ictimai, hərbi və digər təhlükələr qarşısında bizlərin məsuliyyəti daha böyükdür, çünki biz bu təhlükəni görürük, anlayırıq, anlatmalıyıq və bütün imkanlarımızla onun qarşısını almağa çalışmalıyıq. Bu təhlükə hansı tərəfdən və kimdən gəlirsə gəlsin…
Milli Məclisin deputatları, hakim və digər siyasi partiyaların, ictimai təşkilatların üzvləri, özünüzü hər hansı əlahiddə səlahiyyətlər daşıyıcısı deyil, həm də ziyalı hesab edirsinizsə, dövlətimizin üstünü alan bu təhlükələr qarşısında daha məsuliyyətli olduğunuzun fərqinə varmalısınız.
Yaranmış ağır şəraitdə Ölkə başçısı öz yanında yalnız rəsmi qurumların deyil, həm də geniş Azərbaycan cəmiyyətinin nüfuzlu nümayəndələrini – xalqın etibar və hörmət etdiyi ziyalıları görmək, onları eşitmək, onlara arxalanmaq, onların vasitəsilə xalqın ən müxtəlif təbəqələri ilə danışmaq imkanı əldə etməlidir.
Bu yolda ilkin addım kimi, yaxın günlərdə ictimaiyyətin dəstək verdiyi ziyalıların iştirakı ilə Milli Məclisin fövqəladə geniş iclası çağırıla, ölkədə və cəbhədə yaranmış vəziyyət ən ciddi və səmimi şəkildə müzakirə oluna, qarşıdakı vəzifələr və işlər aydınlaşdırıla bilər. Xatırladaq ki, Azərbaycanın müasir tarixində, 2001-ci ildə Qarabağ probleminin ən mühüm dönəmində belə bir toplantı baş tutmuşdu və onun çox mühüm beynəlxalq əhəmiyyəti olmuşdu.
Ziyalıların cəmiyyətin həyatında fəal iştirakını təmin edəcək başqa təkliflər, rəylər, fikirlər də irəli sürülməlidir.
Ümid edək ki, yaranan bu mürəkkəb, ziddiyyətli və qeyri-müəyyən şəraitdə öz yeni tariximizi biz özümüz yazacağıq. Azərbaycan xalqının öz müstəqilliyini qorumaq, dövlətçiliyini möhkəmlətmək, işğal olunmuş ərazilərini ən yaxın zamanlarda azad etmək əzmini ortaya qoyacağıq. Cümhuriyyət Qurucularımızın bizlərə əmanət etdiyi dövlətə və rəhbər tutduqları dəyərlərə – Millət olaraq Müstəqil yaşamağa Qadir və Layiq olduğumuzu bir daha bütün dünyaya nümayiş etdirəcəyik.