Azərbaycan-Ermənistan dövlət sərhədinin Tovuz istiqamətində iyulun 13-nə keçən gecə gərginlik davam edib. Azərbaycan Ordusunun hərbi qulluqçusu baş leytenant Rəşad Mahmudov həyatını itirib. Bu haqda Müdafiə Nazirliyinin xəbərində deyilir. Beləliklə, son bir gündə həlak olan hərbçilərin sayı 4 olub.
İyulun 12-də günorta saatlarından başlayaraq Ermənistan silahlı qüvvələrinin bölmələri Azərbaycan-Ermənistan dövlət sərhədinin Tovuz rayonu sahəsində atəşkəs pozulub, Artilleriya qurğularından istifadə etməklə mövqeləri atəşə tutublar.
Qeyd edək ki, cəbhə xəttində insident baş verən gün Tovuz istiqamətində atışmada həlak olanların sayı 3 nəfər idi – Vüqar Sadıqov, baş əsgər Elşad Məmmədov. Ağır yaralanan əsgər Xəyyam Daşdəmirov da vəfat edib. Müdafiə Nazirliyinin məlumatına görə, yaralıların sayı 5 nəfərdir.
MN bildirir ki, artilleriya, minaatan və tankların tətbiqi ilə gedən gecə döyüşlərində qarşı tərəfin dayaq məntəqəsi, artilleriya qurğuları, hərbi hissəsində avtomobil texnikası və canlı qüvvəsi məhv edilib. Bununla bağlı Azərbaycan tərəfi videogörüntü də yayıb.
Nazirlik Ermənistanın itkilər barədə məlumatları gizlətdiyini iddia edir.
Azərbaycan tərəfi Ermənistan Silahlı Qüvvələrinin cəbhənin müxtəlif istiqamətlərində sutka ərzində atəşkəs rejimini 70 dəfə pozduğunu bildirir.
Ermənistan müdafiə nazirliyindən
Ermənistan müdafiə nazirliyi isə vəziyyətin gərginləçməsində Azərbaycanı ittiham edir.
Nazirliyin mətbuat katibi Shushan Stepanyan:
« Azərbaycan hərbçiləri saat 12:30 radələrində bizə məlum olmayan səbəbdən UAZ markalı avtomobillə Tavuş rayonu istiqamətində sərhəddi pozmağa cəhd ediblər. Ermənistan tərəfinin xəbərdarlığından sonra hərbçilər öz mövqelərinə geri dönüblər. 13:45 radələrində isə Azərbaycan hərbçiləri artilleriya atəşindən istifadə edərək bizim müdafiə punktumuzu ələ keçirməyə çalıçıblar. Canlı itki verən qarşı tərəf geri çəkilib, ermənilər tərəfindən itki yoxdur” deyə Ermənistan müdafiə nazirliyinin mətbuat katibi vurğulayır.
Azərbaycanın müdafiə nazirliyi isə təxribatın Ermənistan silahlı bölmələr tərəfindən törədildiyini bildirir.