Milli Şuranın Koordinasiya Mərkəzinin üzvü Rafiq Manaflı
Nəsimi rayon İH başçısı Yusif Əsgərov müharibədə şəhid olmuş qəhrəman övladımızın ruhuna, onun ailəsinə əndazəyə sığmayan hörmətsizlik nümayiş etdirərək şəhidimizin dəfn mərasimini pozmuş, mərasimi öz prezidentinə yalaqlanmaq və yalaq obyektinin iradəsinə uyğun olaraq müxalifəti söymək üçün fürsət bilmişdir. Təbii ki, öz səviyyəsinə, daha doğrusu səviyyəsizliyinə münasib şəkildə.
Müxtəlif ranqlı məmurların və deputatların havadan bir səbəb tapıb İlham Əliyevə yarınması, yalnız xəstə fantaziyaların məhsulu olan epitetlərdən istifadə etməsi bizdə təəssüf hissi keçirməyə səbəb olsa da, təəccüblənməyə səbəb olmamalıdır. Çünki bunun özünün çox sadə səbəbi var.
Biz çox gözəl bilirik ki, ölkədə heç bir səviyyədə seçki yoxdur, seçkili adlanan bütün məqamlar təyinatlıdır. Yəni istər seçkili olsun, istərsə də seçkisiz, bütün yerlərə, postlara, vəzifələrə adamlar təyin edilirlər. Və bu gün təyinatlar əvvəlki illərdən fərqli olaraq istiblişment daxili güclərin, qrupların arasındakı kompromislərin nəticəsi deyil, bir nəfərin iradəsi ilədir.
O iradə üçün isə təyinat meyarı nə yararlılıq, kompotetlik, savad, nə də dövlətçilik maraqlarıdır. Meyar həmən o epitetlərdir. Kim daha eksklyuziv epitetlər fikirləşib tapa bilirsə daha şanslıdır. Rəqabət isə çox böyükdür və bu səbəbdən hətta ikrah doğuran epitetlər belə ayıb deyil, kreativlikdir. Ona görə təyinatlı məmur və təyinatlı deputatların işləri doğurdan da biz fikirləşdiyimizdən qat-qat ağırdır.
Adi halda öz təbliğin üçün seçki öncəsi ayrılmış təbliğat müddəti kifayət edirsə, ölkədəki mövcud şəraitdə bu bəs eləmir. Təbliğat müddəti sonsuzdur, daim fikirləşməlisən, dayanmadan epitetlər icad etməlisən. Özü də sıravi epitetlər yox, elələri olmalıdır ki, ünvanına gedib çatsın, ətrafındakıları iyrəndirsə belə.
Bu isə doğurdan da çox çətindir, xüsusilə o halda ki, epitet sahibi o epitetlərdən 5 əsr uzaqda olsun.