Milli Şuranın sədri, professor Cəmil Həsənli
Yurd nisgili silsiləsindən indi növbə Laçınındır. 28 ilin işğalından, həsrətindən, ayrılığından sonra Laçına döndük. Millətin gözü aydın olsun. Bu müddət ərzində Laçına qarşı çox həqarət etdi işçalçılar. Onun Laçın kimi adını dəyişib özlərinə bənzər Berdzor adını verdilər bu gözəl yurda. Məskunlaşdırmağa başladılar. Livandan, Suriyadan, hətta uzaq Amerikadan erməni köçləri gətirdilər ora. Özlərinə məxsus olmayan evləri, həyətyanı sahələri, torpaqları, tikililəri böyük səxavətlə xaricdən gətirilimiş erməni ailələrinə verdilər. Bir gün bu yurdun əsl sahiblərinin öz evlərinə, öz vətənlərinə, öz yuvalarına, Laçın yuvasına dönəcəklərini çoxdan unutmuşdular, xəyallarına belə gətirmirdilər. Azərbaycan əsgərinin müzəffər yürüşü Laçın yuvasına da çatdı, işğalçılar Laçını tərk etdi, eybəcər Berdzor kəlməsini də özləri ilə apardılar. Çünki Laçında yurda-yuvaya sığımayan bu kəlmədən başqa onlara aid bir şey yox idi.
Laçın qədim yurd yeridir. Antik dövrdə Qafqaz Albaniyasının hüdudlarında olan dağlıq ərazilər Zəngəzur silsiləsinin bir hissəsini təşkil edir. Rayon ərazisində Qızılboğaz zirvəsi, Dəlidağın güney baxarları, Qırxqız yaylaqları təkrarsız təbiət hadisələridir. Azıx-Tağlar mədəniyyətinin izləri Laçında da var. XVIII əsrə aid məşhur Həmzə Sultan sarayı, tarixi ilk orta əsrlərə gedib çıxan məzarlıqlar, qəbirüstü abidələr, at və qoç heykəlləri, Soltanbaba, Şeyx Əhməd türbələri, Ağoğan monastrı və digər çoxsaylı abidlər Laçının bəzəyidir. Hər dağı, hər daşı, hər qayası, bol sulu çayların üzərindəki tağlı körpüləri, məbəd və qəsrləri, dini ayin yerləri bu yurdun qədim tariixindən xəbər verir. Azərbaycan xanlıqları ləğv edildikdən sonra indiki Laçın ərazisi Qarabağ əyalətinin tərkibində olub. Ötən əsrin ortalarından isə Gəncə (Yelzavetpol) quberniyasının Zəngəzur qəzasının tərkibində olub.
Laçın Azərbaycana böyük tarixi şəxsiyyətlər bəxş edib. Sultan bəy Sultanov, Xosrovpaşa bəy Sultanov, Nurməmməd Şahsuvarov və digərləri. Sultan bəy Türkiyə və Azərbaycanda, xüsusiylə Naxçıvanda çox qırğınlar törətmiş qaniçən Andronikin Zabuz dərəsində burnunu ovan bir el qəhrəmanıdır. Azərbaycan milli hökumətinin ilk hərbi naziri Xosrov bəy Sultanov Qarabağın general-qubernatoru kimi bütün regionda sülhü və sabitliyi, milli hökumətin suverenliyini təmin edən bir siyasi xadim idi. Minkənddə doğulmuş Nurməmməd Şahsuvarov Cümhuriyyətin Maarif naziri olmuş, ana dilində, türk dilində təhsilin təşkilində böyük rol oynamışdı.
Birinci Qarabağ müharibəsində vətən uğrunda döyüş rəşadətinə görə Ələsgər Novruzov, Fazil Mehdiyev, İsrafil Şahverdiyev, Kamil Nəsibov, Qorxmaz Eyvazov və digər vətən oğulları öz sinələri ilə vətəni qoruyub Milli Qəhrəman adına layiq görülmüşdülər.
Laçının mənəvi dünyası, söz, sənət, elm, mədəniyyət və ədəbiyyat aləmi çox zənngindir. Böyük söz ustası Sarı Aşıqdan, Aşıq Abbasdan, Mir Həmzə Nigaridən keçir yurdun ruhu, fikir və mənəvi dünyası. Xalq Rəssamı Nadir Əbdürrəhmanovun fırçasından keçir Laçının sənət lövhələri, Hüseyn Kürdoğlunun, Ağa Laçınlının, Malik Fərruxun şeirlərindən keçir Laçının poetik düşüncələri. Malik Fərruxu universitet illərindən tanıyırdım, Ağa Laçınlını BDU-da müəllim işləyərkən tanıdım və tanışlıq sonra dostluğu çevrildi. Hər ikisinin özünəməxsus yaradıcılıq üslubu, ədəbi deyimləri, poetik tapıntıları var idi. Və yeri gəlmişkən hər ikisinin güclü yumor hissi vardı. Bu əziz gündə ruhları şad olsun! Çoxlu dostlarım, tanışlarım, tələbələrim var Laçından, yaddaqalan qonşularım olub Laçından. Hamısına gözaydınlığı düşür!
Laçının işğalda olduğu illərdə mənim Laçınla bağlı həsrətim, nisgilim, ruhum, bu yurda xəyalisəyahətlərim Məhəbbət Kazımovun “ Laçınım mənim” fəryadından keçirdi. Yaxşı tanıdığım və şəxsiyyətinə böyük hörmət bəslədiyim gözəl müğənni Məhəbbət Kazımov bütün varlığını, hislərini və həyəcanlarını bu sənət əsərinə təslim etmişdi. Bu təkrarsız bir ifa idi. İndi doğrudan da Laçın onundur. Ruhu şad olsun!
P.S. Məhəbbət Kazımovun “Laçınım mənim” yanğısını şərh bölümündə yerləşdirirəm. Sizi də bu gözəl əsərin sözündə, səsində, yanğısında Laçına səyahət etməyə çağırıram.