Milli Şuranın Koordinasiya Mərkəzinin üzvü Gültəkin Hacıbəyli
Şəhid ailələrinə 300 manat, I, II və III qrup əlili olan qazilərimizə 250, 230 və 210 manat müavinət veriləcəyinə dair xəbəri böyük təəssüf və hiddətlə oxudum.
Kaş ki, yalan ola. Kaş ki, “uğursuz bir zarafat idi” deyib üzr istəyələr, əks halda şəhidlərimizin ruhuna, qazilərimizin fədakarlığına yazıq olacaq…
Bu ölkədə sıravi məmurlar 1000-1500 manatdan başlayan əməkhaqqı alırsa, Prezident Administrasiyasında çalışan adi məmurun maaşı 3-4 min manatdırsa, müharibədə ən doğmasını- övladını itirən ata-anaya, həyat yoldaşını itirən xanıma, atasını itirən körpələrə 300 manat müavinət vermək nə deməkdir?!
Axı dövlət müəssisələrində, nazirliklərdə xadimələr belə bundan çox əməkhaqqı alır!
Vətən uğrunda canını qurban verib valideynlərinin də həyatını məhv edən, övladlarının, ailəsinin həyat sevincini gözündə qoyan şəhidin canı, qanı, qəhrəmanlığı nəinki məmurdan və deputatdan, hətta onlara xidmət göstərən xadimədən də əskik tutulur?! Bu nə ədalətdir?! Bu nə vicdandır?!
I qrup əlili bilirsinizmi nə deməkdir?! Adam fəaliyyət qabiliyyətini itirib! Özünü belə idarə edə bilmir! Ona yemək yemək, paltarını geyinmək, hətta su içmək üçün kömək edəcək xüsusi şəxs lazımdır. Hələ bu qazinin ailəsi var, uşaqları, valideynləri var. 250 manatla bu qayğıları necə qarşılamaq olar?! 250 manata heç ona qulluq edəcək adam tapmaq mümkün deyil. Kim 250 manata bu ağır yükün altına girər ki?!
Bəs qazinin ailəsi, balaları necə dolansın, nə yesin, nə içsin?!
Bu savaşda bir nəfər də məmur övladı iştirak etmədi, şəhid və qazi olmadı.
Məmur balaları savaş müddətində yalnız qaçıb gizləndikləri Londondan, Dubaydan sosial şəbəkələrdə trolluq edib “Şəhidlik hər kəsə nəsib olmayan böyük xoşbəxtlikdir”, “Vətən kasıbındır” kimi şərhlər yazırdı. Savaş bitən kimi də qayıdıb 200-300 minlik maşınlarını minib Rusiya bayrağı ilə “Qələbə” yürüşləri keçirdilər.
Heç olmasa bu savaşda tək bircə məmur övladının iştirak etmədiyindən utanıb şəhid ailələrinə, qazilərimizə və müharibə iştirakçılarına həmin məmurların övladlarının bir ayda xərclədiyi qədər demirəm, məmurların formal rəsmi maaşı qədər müavinət verməlidirlər.
Bu ölkənin ən şərəfli insanları olan şəhid ailələri, qazilərimiz və qəhrəmanlarımız ən ləyaqətli həyat yaşamağa layiqdirlər və onlara bu həyatı yaşatmaq Azərbaycan hakimiyyətinin borcudur!