Tarix elmləri doktoru, professor Solmaz Tohidi
Adil müəllimin yoxluğunun üçüncü günü zaman möhləti istəyib haqqında yazacağımı vəd etmişdim. Keçən həftələr ərzində Onun inanılmaz gedişi ilə bağlı sosial şəbəkələrdə yayımlanan fikirləri, xatirələri imkanım qədər izləmişəm, təəssüf və kədər dolu saysız şərhlərlə tanış olmuşam, dostlarının, həmkarlarının, yetirmələrinin dediklərini eşitmişəm. Cəmiyyətin yaxından-uzaqdan tanıdığı, özünün də olduqca geniş çevrəsi olmuş bu İnsan haqqında deyilənlər ən yüksək meyarlarla dəyərləndirilən bir həyat yaşamış, özündən sonra parlaq ad və dərin iz qoymuş bir Şəxsiyyət obrazı yaradır. Onunla cəmi beş aylıq tanışlığımızın nəticəsi kimi mənim yazacaqlarımın bu təsəvvürləri nə dərəcədə artıra, zənginləşdirə, yaxud müəyyən mənada dəyişə biləcəyi haqda düşünürəm. Düşünməyə haqqım var. Çünki müəyyən şərtlər daxilində başlanmasından, qısa bir zaman kəsiyində davamından və qəfil qırılmasından asılı olmayaraq yazdıqlarım artıq ömürlərinin böyük hissəsini yaşamış, cəmiyyətdə peşə və ictimai mövqelərini çoxdan təsbit etmiş, həyata öz baxışları, zəngin təcrübəsi, fəal yaşam tərzi olan, nəhayət bir-birinə “tanınmış…”, “nüfuzlu … ” kimi deyil, eyni dalğada düşünən və qarşılıqlı maraqlı gələn iki yetkin insanın ünsiyyət hekayəti olacaq.
Bədahətən işlətdiyim “hekayət” kəlməsi yazıma bir səciyyə, fikirlərimə düzən gətirir. Ayrı-ayrı görüşlər, söhbətlər, yazışmalar arxasında bu tanışlığın dostluğa keçidi və yeni Dostumun hissə-hissə toplanaraq bütövləşən surəti yaranır. Yazılarımın uzunluğundan şikayət edən Adil müəllimə artıq onsuz olaraq verdiyim vədə əməl edə bilmirəm. Hekayətim qısa alınmır… Əksinə, aramızdakı hansısa söhbət birdən-birə ictimai məzmun kəsb edərək öz şərhini istəyir, deyilən adi bir sözün arxasından bir xarakter təzahür edir. Özümü məhdudlaşdırmıram. Yazdıqlarımı silməyə, ixtisar etməyə sonradan əlim gəlmir. Adil müəllimin bir etirafı – bütün yazılarını ən əvvəl özü üçün qələmə aldığı – ilə hesablaşmağa çalışsam da, özümü aldatmaq istəmirəm. Yazdıqlarımın oxunmasını, düşündürməsini istəyirəm. Onun yaxınlarının, öz dostlarımın, oxucularımın dəstəyi məni ürəkləndirir, bir aya yaxın bütün varlığıma hakim kəsilmiş fikirlər sətirlərə, cümlələrə axışır, tədqiqatçı təcrübəm onları nizama salır və indiki halına – bir neçə hissədə toplum hekayətə çevirir.
Siz də dinləyin…
Tanışlıq
May ayının sonlarından Vəkil axtarmağa başlayıram. Səbəb – elmi mübahisədən yaranıb ictimai-etik məzmun alan bir münaqişədir. Ölkə başçısının 28 may tarixli çıxışında İrəvanın ermənilərə güzəştə gedilməsi məsələsi ətrafında söylədiyi bəzi fikirləri özünün siyasi ambisiyalarını ödəmək üçün vasitə kimi görən bir həmkarımız televiziya kanallarının birində tarixi sənədlərlə manipulyasiyalar edərək Cümhuriyyət liderlərini İrəvanı ermənilərə verməkdə günahlandırıb. Cəmi 3 həftə əvvəl başqa bir çıxışında həmin hadisəni obyektiv işıqlandırmış bu tədqiqatçının sürətlə dəyişmiş “mövqeyi” dərhal elmi dairələrdə, sosial şəbəkələrdə geniş əks-səda doğurub. İstisnasız olaraq bütün Cümhuriyyət dövrü tədqiqatçıları, eləcə də geniş oxucu kütləsi böyük elmdə ilk addımlarını atan və ümidlər verən bu adamın tarixi hadisəni bilərəkdən təhrif etmək cəhdlərini qınayıb. Bir həftə sonra həmin tədqiqatçı bir daha efirə çıxıb və onu qınayanlar arasından 5 nəfər nüfuzlu alimi seçərək onları Vətənə, Dövlətə xəyanətdə, qonşu düşmən ölkənin rəhbərini dəstəkləməkdə və s. ittiham edib. Mən bu 5 nəfərdən biriyəm və üstəlik 1918-ci il mart qırğınlarına dair kitablarıma görə də xalqa xəyanətdə günahlandırılıram.
Bu mövzuda cəmiyyətdə başlanan geniş diskussiyalar artıq qalmaqal şəkli alır. Son nəticədə xaricdəki tarixçi həmkarımızdan başqa biz 4 nəfər alimin Şərəf və Ləyaqətini qorumaq məsələsi gündəmə gəlir. Bu işin hansı müstəvidə həll olunması sualı təcrübəli Vəkil məsələsini zəruri edir. Dostlarımız mülki işlər və hüquq müdafiəsi üzrə vəkil sorağındadırlar. Mən bu işin cinayət tərkibli olduğunu bildiyimdən bu sahədə mütəxəssis, həm də “ötkəm” və “dilli” vəkil haqda düşünürəm. Vəkil tanışlarım arasında beləsi var, amma neçə illərdir əlaqəmiz itib, yalnız adı yadımdadır və 1-2 kiçik məlumat. Axtarışlarım nəticə vermir, dostlar, tanışlar artıq başqa vəkillərə müraciət etməyi məsləhət görürlər. Və bu sırada Adil İsmayılovun adı çəkilir. Bütün epitetləri ilə. Bu adı eşitmişəm, amma şəxsən tanıdığım vəkillə “işləmək” istəyirəm. Axtardığım tanışımı isə hələ də tapa bilmirəm. Ən müxtəlif adamlardan üçüncü dəfə “Adil İsmayılov” adı gələndə, burada bir “rəmz” görərək “təslim oluram”. Ona telefon açıram, özümü təqdim edirəm. Asta, aram, bir qədər etinasız səslə: “bilirəm kimsiniz” – cavabı gəlir. Məsələni danışıram, deyəsən elə bir maraq göstərmir, məqsədimizlə bağlı müəyyən suallar versə də, heç bir münasibət bildirmir. Söhbətimiz ağır gedir, narahatam, amma əvvəldən ona vəkilimiz ola biləcəyi sualı ilə müraciət etdiyimdən sözümü dəyişə bilmirəm. Cavabını gözləyirəm, kiçik pauzadan sonra bir az təkəbbür qarışıq qeyri-müəyyən tərzdə: “Yaxşı da, fikirləşək, baxarıq”- deyir. Burada Adil İsmayılovun “köhnələrdən” olduğunu xatırlayaraq, axtardığım vəkil tanışımı ondan da soruşuram. Tanıyır, koordinatlarını verə biləcəyini söyləyir. Deyəsən təşəkkürümdə sevinc notları hiss etdiyindən söhbəti bitirmir, bizim işimizə çıxa biləcək daha iki vəkilin adını çəkir. Sadəcə “məsləhət” olmadığını tuturam və bu vəkillərlə digər həmkarımın danışıqlar apardığını bildirirəm. Əslində bir qədər “blef” edirəm. Çünki həmkarım onların seçimini mənim öhdəmə buraxıb. Müsahibimdə özünün bizim üçün “yeganə və ən istənilən” vəkil təsəvvürü yaranmaması üçün bir az da irəli gedirəm, bir neçə vəkilin, o cümlədən Aslan İsmayılovun da könüllü olaraq bu işə qatılmaq arzusunu bildirirəm. Bu, artıq “blef” deyil, həqiqətən vəkil tanışlarımızdan belə təkliflər gəlib, Aslan İsmayılova da bir dostum vasitəsi ilə axtardığım vəkil tanışımla bağlı müraciət olunanda, o adamı tanımadığını, amma bizim işdə yardımçı ola biləcəyini söyləyib. Dərhal imtina etmişəm.
Bu sonuncu adı eşidəndə Adil müəllim gözlənilmədən və bir qədər kəskin tərzdə: – Aslan İsmayılov bu işə qatıla bilməz. Onun vəkillik səlahiyyəti yoxdur – deyir. Aralarındakı münasibətlərdən hələ xəbərim olmasa da, reaksiyasından uğursuz ad çəkdiyimi anlayıram. Vəziyyəti aydınlaşdırıram, “qalmaqal adamı” saydığım Aslan İsmayılova münasibətimin heç də birmənalı olmadığını bildirirəm. Söhbətimiz bitib, sağollaşmaq istərkən, müsahibim birdən: – Sonda bir sualım var – deyir, və sualını verir: – Niyə Mən?
Oho!!! Axtardığım sözü dərhal tapmadığımdan cavabı rusca verirəm: “Мне нужен солидный адвокат”. O da ruscaya keçir. Əksinə, bizim işimizdə elə Aslan İsmayılov kimi qalmaqallı vəkilin olmasını daha münasib sayır. Öz dilimizə qayıdırıq. Mən qarşıdakı məhkəmə prosesinin elmi-tarixi məsələ üzərindən başladığına baxmayaraq ictimai məzmun daşıdığını bir daha vurğulayıram və məhz bu səbəbdən sanballı vəkillə işləmək niyyətimizi, “qalmaqala” ehtiyac olarsa onu 4 nəfər “danışan” alim kimi özümüzün də “yarada biləcəyini” əsaslandırıram. Deyəsən razı qalır, çünki astadan gülür, xudahafizləşirik.
İyunun 30-dur. Telefon tanışlığımız başladı. Az sonra axtardığım vəkil tanışımın koordinatlarını göndərir. Təbii ki, ona zəng vurmuram.
“Niyə Mən ?” Bu sual vəkil Adil İsmayılovla o qədər də rahat keçməyən ilk danışığımızda diqqətimi cəlb edən və onun şəxsiyyətinə maraq oyadan ən mühüm məqamdır. İnsanın öz “Mən”inə belə həssas yanaşması ən müxtəlif amillərdən şərtlənə bilər. İntriqa yaratdı. İndi görək bu “Mən”in təbiəti özünü necə göstərəcək… “Mənəm” formasında təzahür etməsini heç istəməzdim.
Bir neçə gün keçir, onu narahat etmirəm. Özü məktub yazır, görüşmək üçün yer və vaxt təyin edir. Şəhərdəki ofisinə gəlirəm. İş otağında, massiv yazı stolunun arxasında saçları tam ağarmış, bütün görkəmindən kübarlıq yağan, rəftarı, səsi, danışıq tərzi ilə də bu ilkin təəssüratı gücləndirən bir kişi əyləşib. Üzünü ilk dəfədir görürəm, telefon tanışlığımızdan sonra internetdə şəklinə baxmaq da ağlıma gəlməyib. Dərin, nüfuzedici baxışları var, sakit səslə, tələsmədən danışır. Deyəsən bizi 4 nəfər gözləyirmiş, tək gəldiyimdən bir qədər təəccüblənib. Mənim – “hələ qərar verilməyib” – sözlərimə diqqət yetirir, amma bu qərarı bizimmi, yaxud onunmu vermədiyini dəqiqləşdirmir. “Buyurun” – deyir. Mən artıq ona məlum olan məsələni və arqumentlərimi təkrarlayıram. Sözümü kəsmədiyindən yenidən bu haqda belə ətraflı danışmaq lazım gəldiyi üçün narahat olmağa başlayıram, nəhayət nitqimi bitirib susuram.
Kiçik pauzadan sonra bütün bu dediklərimə iki-üç cümlə ilə bildirdiyi münasibətin doğurduğu heyrət sözlə ifadə ediləsi deyil. Gözlərini azca qıyaraq, darıxırmış kimi bir əda ilə bu məsələyə belə önəm verməyimizə səbəb görmədiyi, bu növ işlərin adətən barışıqla bitdiyi, odur ki, vaxt, əsəb itkisini lüzumsuz saydığını söyləyir, zamanla öz-özünə unudulub gedəcəyi qənaəti ilə bu işi boş buraxmağı məsləhət görür. Sonra diqqətlə üzümə baxır.
İlk ağlıma gələn sualı – bu məsləhəti vəkilimiz olmaqdan imtina kimi qəbul etməliyəmmi ? – yalnız özümün heysiyyətimə toxunduğu üçün vermirəm. Hər halda yayın bu istisində bağdan şəhərə gəlişimin nəticəsiz qalmaması üçün heç olmasa konkret bir Vəkil məsləhəti almağı üstün tuturam. Dediklərinə heç bir münasibət bildirmədən: – Hazırda məni düşündürən məsələ iddiamızın məhkəmə icraatına götürülməsidir. Götürməyə bilərlərmi? Nüfuzlu vəkil axtarmağımın bir səbəbi bu məsələ ilə bağlıdır. Fikriniz nədir? – soruşuram.
Onsuz, ya onunla, məhkəməyə gedəcəyimizin təsdiqi olan bu sualın əsl mənasını anladığını yüngülcə diksinməsi və dodaqlarını bir-birinə sıxması ilə büruzə verir. Sonralar dəfələrlə gözləmədiyi bir sözə, fikrə bu ani reaksiyasını görəcəyəm.
- Onun problemi yoxdur, götürərlər – deyir, sonra birdən soruşur: – Siz mənim haqqımda deyilənlərlə tanışsınız ? Bahalı vəkil olduğumu, pulsuz məhkəməyə çıxmadığımı…
Sözünü yarımçıq kəsirəm: – Narahat olmayın, zəhmət haqqınız ödəniləcək.
Belə cəld reaksiyamdan deyəsən pərt olur, udqunur və nəzərlərini qaçıraraq, bir az sərt: - O məqsədlə demirdim. Hər eşitdiyinizə inanmayın.
Bu sonuncu cümləni sonralar mənə başqa səbəblərdən bir neçə dəfə təkrar edəcək. İndi isə yaranmış vəziyyəti dəyişmək üçün qarşısındakı qanunlar məcəlləsini açır, iddiamıza aid olacaq maddələri nəzərdən keçirir. Mənə izah edir. Nəhayət ayağa qalxır, yenə: “Yaxşı, hələ danışarıq” – qeyri-müəyyən qərarı ilə bu görüşümüzə yekun vurur. Ofisdən birlikdə çıxırıq. - Hara gedirsiniz? Maşınla aparaq, – təklif edir, minnətdarlığımı bildirib ayrılmaq istəyəndə, etirazımın qəbul edilmədiyi aydın olur: – Dedim ki, maşın var!
Cavabımı gözləmədən sürücüsünün ardınca yollanır və bu zaman birdən, əlini havada yelləyərək, astadan, sanki öz-özünə:- Heç nəyə həvəsim qalmayıb… Neçə vaxtdır bir dənə iş götürmürəm…- deyir.
Bu cümlələr ilk görüşümüzün “açar” ifadəsidir. Vəkilin bütün bayaqkı süst, biganə ovqatının bizim məsələmizlə bağlı olmadığını başa düşürəm. Şəhər mənzilimə qədər yolda dediyi bəzi fikirlər bu təxminimi təsdiq edir. Bağa qayıdan kimi FB-da “Adil İsmayılov” profilinə daxil oluram. Son günlər yazdığı statuslarını oxuyuram. Ruhiyyəsini tuturam. Haqqında olan məlumatlardan biri diqqətimi çəkir və xoş əhval yaradır: eyni məktəbi bitirmişik, məndən 3 ya 4 sinif aşağı oxuyub.
Daha bir neçə gün keçir, özü zəng vurur, məhkəmə işi ilə bağlı iddiamızın mümkünlüyünü və müsbət nəticə ilə bitəcəyi ehtimalının yüksək olduğunu bildirir. Beləliklə, qənaətimizdə əmin oluram. Bu zəngi həm də Adil İsmayılovun bizə Vəkil olmaq razılığı kimi qəbul edirəm.
FB-da “dostluğumuz”, sosial şəbəkələrdə yazışmamız başlayır. Eyni məktəbi bitirməyimiz haqda məktubumu oxuyan kimi zəng edir, gümrah, şad səslə danışır, hansı müəllimlərdən dərs aldığımızı, ortaq tanışlarımızı dəqiqləşdiririk. Sonralar bu məqam münasibətlərimizə daha bir çalar verəcək, tanışlığımıza eyni nəslə mənsubluğun yaratdığı yaxınlıq gətirəcək, ünsiyyətimizə uşaqlıq dövründən qalma bir təmizlik, istilik, səmimiyyət notları qatacaq.
Tarixçi həmkarımıza qarşı məhkəməyə getmək niyyətimizi, bununla belə, səhvini etiraf edərsə, özündən yaşca böyük, müəllimləri olmuş, elmi əsərlərinə rəylər vermiş alimlərdən üzr istəyərsə bu münaqişəni bitirməyə hazır olduğumuzu nümayiş etdiririk. 4 nəfər alimin adından Bəyanat yayırıq. Onu ictimailəşdirməzdən əvvəl mətnini Vəkilimizə də göndərirəm. Bəzi düzəlişlər edir.
Bəyanatımız sosial şəbəkələrdə görünməmiş əks-səda doğurur, cəmiyyətdən çox güclü dəstək gəlir. Prosesi diqqətlə izləyən Adil müəllim yazır: – “İnşallah, hüquqi dəstəyə ehtiyac olmaz”.
- Heç nəyə həvəsim qalmayıb… Neçə vaxtdır bir dənə iş götürmürəm…- deyir.
- “Siz bu qarşı tərəf haqda çox yaxşı düşünürsünüz. Odur ki, hələ bizdən çox aralanmayın”.
- “ Paylaşdım yazınızı. FB-də olduğum 10 il ərzində bəlkə 10-cu dəfədir ki, başqasının yazısını paylaşıram. Minnət qoymuram, sadəcə nəzərə alın”.
- “Təşəkkür edirəm, sizin də əməyiniz var. Maraqlı proseslər başlayır. Görək hələ nə sürprizlər olacaq”.
Adil müəllim təkcə Bəyanatımızın mətnini paylaşmaqla kifayətlənməyib, ona açıq münasibət bildirib və belə bir məhkəmə prosesi başlayarsa bizə Vəkil kimi dəstək verməyə hazır olduğunu bəyan edib!
Bütün bu günlər yazışırıq. Arabir telefon açır: – “Sizi tanımaqda davam edirəm” – deyə tanışları ilə söhbətlərində mənim barəmdə söz düşdüyünü bildirir. Sual vermədiyimi görəndə, dərhal: “Narahat olmayın, tərif edirdilər”- deyir. Başqa bir zəngində özünün yaxın qohumu, tanınmış bir şəxsin mənə ehtiramını çatdırmaq xahişini yetirir. Qiyabi tanıdığım və çox hörmət bəslədiyim həmin adamın mənim haqqımda söylədiklərini ifadə etmək istəyir, sonra elə bil fikrini dəyişir: “Nə isə, tərifləyirdi sizi” – deməklə kifayətlənir.
Mənim dostlarım da bu məşhur vəkillə tanışlığımıza böyük maraq göstərirlər. Haqqında ara-sıra bəzi məlumatlar vermək istəyirlər. Belə söhbətlərin qarşısını dərhal alıram. Təkcə ona görə yox ki, haqqında deyilənlər bəzən heç də birmənalı deyil. Bu adamla artıq münasibətlərimiz yaranıb və onu öz müşahidələrim əsasında tanımaq istəyirəm.
Mənim “sürprizlər” barədə ehtimalım düz çıxır. Müqabil tərəf hələ ki, üzrxahlıq təşəbbüsü göstərmir. Bu yay fəslinin ən isti və gərgin iyul ayı isə digər, daha mühüm hadisələrlə zəngindir. Tovuz döyüşləri, gənclərin 14 iyul yürüşü… Mənim bu hadisələrlə, ziyalıların, millət vəkillərinin mövqeləri ilə bağlı FB yazılarım yenə də cəmiyyətdə geniş əks səda doğurub, amma bu dəfə artıq bəzi deputatlar və bir özəl telekanalın tanınmış rəhbəri tərəfindən çox kəskin qarşılanıb. Adım hallanır, nələrdəsə ittiham olunuram, verdiyim cavablar gərginliyi daha da artırır. Cəmiyyətdən mənə güclü dəstək gəlir.
Adil müəllimin özünəməxsus dəstəyi var və bu “məxsusluğunu” sonralar daim müşahidə edəcəyəm. Bütün şərhləri diqqətlə oxusa da, bir qayda olaraq nə özüm, nə yazılarım haqda hər hansı fikir söyləmir. Ən yaxşı halda: “Mən sizin yazıya “sizinləyəm” işarəsi qoymuşdum”. Yaxud, bir cümlə ilə, əks tərəfin haqqımda dediklərini və cavablarımı oxuduğunu yazır və: “Yəqin münasibət bildirəcəyəm”.
Həqiqətən adımı çəkmədən mənim tənqidçilərim haqda qısa, lakin dəqiq əsaslandırılmış yazılarla bölüşür. Fikrini lakonik, səlis ifadə etmək məharəti göz qabağındadır. Bu sıradan “Yazmasam olmur” başlıqlı statusu artıq fərqlənir. “İstəmədiyi halda uzun alınan” bu yazısında konkret adlar göstərməklə “ziyalı” kimi təqdim olunan bəzi məqam sahiblərinin cəmiyyətdə gərginlik yaratmaq cəhdlərinə diqqət çəkir və sözünü birbaşa hakimiyyətə ünvanlayır.
Mən bu yazıya ətraflı münasibət bildirirəm: “Çox dəqiq diaqnoz, konkret təhlil və xəbərdarlıq. Ziyalı mövzusu ətrafında yenicə başlanan ehtiyatlı müzakirələri daha geniş anlamda yeni müstəviyə keçirdiniz”… Cavabında adlarını çəkdiyi tanınmış şəxslərlə canlı yayımda bu məsələləri müzakirə etməyə hazır olduğunu yazır. Televiziya kanallarında çoxdan canlı yayımlar olmadığı kimi təəssüfümə: “demək ki, qalacaq yaxşı vaxtlara”.
Sonralar belə fikir mübadilələrimiz artıq mütəmadi olacaq və əsasən tənqidi xarakter daşıyacaq. Amma hələ bir-birimizlə tanış oluruq. Avqust ayı başlayıb. “Cavabdeh” tərəfə bizlərdən üzr istəmək şansı verdiyimizdən hələ onsuz da bağlı olan məhkəmələrə müraciət etməyə tələsmirik. Vəkilimizlə cəmiyyətimiz, ziyalı mühitimiz üçün mühüm saydığımız məsələlər ətrafında yazışırıq. Mənə əvvəlki illərdə mətbuata verdiyi müsahibələrini göndərir, müzakirə edirik.
Yazmağı, xüsusilə ətraflı yazmağı sevmir, hövsələsi yoxdur. İri həcmli yazılardan, o cümlədən mənim yazılarımdan şikayət etməsi də buradan gəlir, oxumağa da səbri çatmır. Yazışmamız artıq bir qədər sərbəst şəkil alandan sonra: – “Yazılarınızın razmerini görəndə oxumaq həvəsim ölür” – iradının qarşısında mənim: – “Bəs cildlərlə istintaq işlərini necə oxuyursunuz?” – sualıma cavabı: “Məcburiyyətdən”. Növbəti iradından sonra “həvəsinin qatili” olmaq istəmədiyim üçün öz yazılarımda bir də onun adını “taq” etməyəcəyimi bildirəndə dərhal sərt reaksiya verir: “Şantaj edirsiniz? …. Narahat olmaya bilərsiniz”. Deyinsə də bütün yazılarımı sonadək oxuyur, hərdən özünəməxsus şəkildə “tərifləyir” də: – “Çox uzun olsa da, yaxşı yerləri vardı”. Heç xətrimə dəymir, əksinə nə üçünsə xoşuma gəlir.
Günlərin birində: “Müzakirə edəcək çox məsələlər var” – deyə görüşməyi təklif edir. Təyin etdiyi vaxtlarda alınmır, bir neçə dəfə “təcili deyilsə” təxirə salmağı xahiş edirəm, səbəbləri göstərirəm. Təcili deyil, bəzi məsələlərə mənim münasibətimi bilmək istəyir. Sonra birdən yazır: “Get-gedə əlim hər şeydən soyuyur, bir çıxılmaz dalanda olmağımız qənaətinə gəlirəm”.
Ovqatını hiss edərək dərhal: “Nə zaman münasib bilsəniz görüşək”- , sonra əlavə edirəm: “…Darıxmayın. Hər şeyin bir sonu, hər sonun bir başlanğıcı var”. Cavab vermir.
Nəhayət ofisində görüşürük. Qarşımda tamam başqa bir adam görürəm. Gülərüz, xoş əhvallı, iltifatlı. Öz yerinə keçir. Mən yazı masasının qarşısındakı iki kreslodan birinə oturanda: – Gəlim sizinlə qarşı-qarşıya əyləşimmi ? – soruşur. – Mənim burada oturmağımdan narahat deyilsiniz ki?
Sualını anlamadığımı görəndə, təbəssümlə: – Xədicə İsmayıl deyir ki, Adil müəllim qonaqlarına öz yazı masasının arxasından – yuxarıdan aşağı baxır.
Xədicə xanımı tanıdığımı və çox hörmət bəslədiyimi bildirirəm. “Vəkili olmuşam” – deyə məmnunluqla cavab verir və əsas mətləbə keçir. Hüquqşünas fəaliyyətinə müstəntiq kimi başladığı, maraqlı işləri olduğu, sonra prokurorluq orqanlarından niyə çıxdığı, vəkilliyi seçdiyi və artıq 30 ildir bu peşə ilə məşğul olduğu haqda çox canlı tərzdə söhbət açır. İllər boyu üzləşdiyi gerçəkliyə, hadisələrə, insanlara münasibətinin necə dəyişdiyi, daxili narahatlığının artdığını söyləyir. Arada yumor notları qatmaqla özünü “tərif” etməkdən də çəkinmir. Nitqi çox cəlbedicidir. Söz ehtiyatı zəngin, müqayisələri səlis, fikirləri dəqiq ifadə olunmaqla açıq-aydın yüksək danışıq qabiliyyəti nümayiş etdirir. Sözə həssas olduğumdan dediklərinin yalnız məzmununa deyil, bu məqamlara da diqqət yetirirəm və hətta yaxşı mənada bir qədər təəccüblənirəm də. Tək-tək suallar istisna olmaqla sükutla dinləyirəm, onu özünün təqdim etdiyi kimi tanımağımı istədiyini anlayıram. Sonra söhbət yaşadığımız gündəmə gəlir.
Tovuz hadisələrindən bir ay keçib, ölkədəki ictimai-siyasi durum gərgindir, cəmiyyətin əsəbləri gərilib, Qarabağ məsələsi, arzu edilən və gözlənilən müharibənin perspektivləri… Ən kiçik bir siyasi təbəddülat ölkə üçün, dövlətçilik üçün arzuolunmaz fəlakətlərlə nəticələnə bilər. Buna yol vermək olmaz. Amma ölkədaxili vəziyyət dəyişməzsə nə qədər davam gətirər? Belə bir şəraitdə müşahidəçi kimi qalmaq mümkündürmü? Nə etməli ?
Müsahibimin mövcud siyasi partiyalara münasibəti mənfidir, müxalifət düşərgəsi ilə yaxından tanışlığı və münasibətləri olduğuna baxmayaraq – bir çox nümayəndələrini məhkəmələrdə müdafiə edib – indiki halda onların ölkə qarşısında duran problemləri həll edə bilmək qabiliyyətinə inanmır. Burada mən zarafatla: – Bəlkə özünüz bir partiya yaradasınız ?” – təklif edirəm. Zarafatımı tutur: – Niyə də yox, 50-dən artıq partiya var, biri də olar mənimki.
Bir tarixçi kimi, bizim bu kiçik ölkəmizdə çoxsaylı partiya sistemini, həm də əsasən ayrı-ayrı fərdlər ətrafında yaradıldığından, ciddi qəbul etmədiyimi, əsl partiya quruculuğunun mürəkkəb, bir çox amillərlə şərtlənən uzun proses olduğunu izah edirəm. Deyəsən, siyasi ambisiyaları yoxdur, amma çox diqqətlə qulaq asır.
Sözümə davam edirəm. Onun özünü də nəzərdə tutmaqla bizim kimi insanların – siyasətə müdaxilə etməyən, müxtəlif yönlü fürsətçi çıxışlardan uzaq, dövlətçilik və xalqın maraqları mövqeyində duran, az-çox nüfuz sahibi olan ziyalıların bilavasitə Cəmiyyətin təmsilçisi olmasını üstün tutduğumu bildirəndə, müsahibim fikirlərimi dəqiqləşdirməyə yönəlik suallar verməyə başlayır. Keçmiş müstəntiq ilə danışdığımın yalnız indi fərqinə varıram. Bəzi müddəalarımı qəbul etmir, öz baxışlarını söyləyir, sonra birdən: – Sizinlə danışmaq çox xoşdur,- deyir. – Razılaşmadığım fikirlərinizdə də bir məntiq var. Bu çox mühümdür.
Söhbətimizin arxa mənasını bilirəm. Öz elmi çevrəmizdə bunu “ideyaların sınaqdan keçirilməsi” adlandırırıq. Peşəkar hüquqşünasla belə fikir mübadiləsi isə yeni və fərqli düşüncə tərzi ilə tanışlıqdır, mənim üçün də maraqlı və xoşdur.
Bu zaman sürücüsü qapıdan boylanır: – …… gəlib.
Adil müəllim üzr istəyərək cəld yerindən qalxır, əlini cibinə salıb otaqdan çıxır, tez də qayıdır. Hər ay bir neçə adama maddi yardım göstərir: “Sayları artıb, əvvəlki gəlir yox, məbləğləri azaltmalı olursan”. Bu sözləri gizlədə bilmədiyi dilxorçuluqla deyir. Qanının qaralması göstərdiyi səbəbdən deyil, onu doğuran amildən – ehtiyacdan ofisinin qapısını döyən insanlarla mütəmadi üzləşməkdəndir. Əvvəlki şad ovqatlı, söhbətcil müsahibimdən əsər-əlamət qalmayıb. Birdən-birə etdiyi etiraf isə mənim üçün tam gözlənilməz olur: prokurorluq orqanlarında işləmək istərdi!
Bu istəyin sadəcə peşəni dəyişmək, daha doğrusu, əvvəlki peşəsinə qayıtmaqdan gəlmədiyi göz qabağındadır. Müasir Azərbaycan gerçəkliyində 30 il məşğul olduğu və həqiqətən sevdiyi Vəkillik sənətinin özünün Ədalət axtarışlarında gücsüzlüyünün və bununla barışmağın artıq qeyri-mümkünlüyünün etirafıdır və gözlərində peyda olub dərhal itən ağrı bunu aydın büruzə verir. Ədliyyə sisteminin daha əvvəlki mərhələsində hələ nəsə dəyişməyin mümkünlüyünə inanmaq istəyir.
Qarşımdakı adamın yaşadığımız cəmiyyətin mənə və çevrəmə məlum olmayan tərəflərini dərin qatlarına qədər bildiyi, anladığı və bu anlamından da əzab çəkdiyini duymağa başlayıram. Mənimlə görüşməyə can atması da bəlkə elə buradan irəli gəlir: elm adamı kimi onun peşəkar mühitindən uzaq, lakin meyarlarını bölüşən bir həmfikirlə ünsiyyətə olan ehtiyacdan.
Onu öz dostlarımla tanış etmək istəyirəm. Özünə deyirəm. Çox məmnun olur, əhvalı düzəlir. Gənc jurnalistin onu gözlədiyini biləndə içəri dəvət edir: – Gəl qonağımla tanış ol, görək tanıyacaqsan …
Jurnalist xanım məni tanıyır və haqqımda çox yüksək sözlər deyir. Narahatlıqla Adil müəllimə baxıram, gözlərində oynaq təbəssümlə, “mən demədim ki, o dedi” – mənasında əllərini yana açır. Sonra xanımla danışırlar, deyəsən radio jurnalistlərinin hüquqları ilə bağlı məsələdir. Mən qalxmaq istəyirəm. Əslində görüşümüz bitmək üzrədir. - Yox, tələsməyin – deyir, qıza qonşu otaqda sənədlərlə tanış olmağı tapşırır.
Bu vaxt telefonuna zəng gəlir və eşitdiklərindən bütün üzünün ifadəsi dəyişir. Onu Vəkil qismində təcili olaraq harasa çağırırlar. Söhbətini qurtardıqdan sonra, vəkili olacağı tanınmış şəxsin adını açıqlayır və ilk dəfə diqqətimi çəkmiş sualı bir də səsləndirir: – Niyə Mən? Belə hallarda adətən öz vəkillərini işə qoşurlar.
Yəqin ki, bu sualı ilk növbədə özünə verir, amma elə bil məndən də cavab gözləyir. - Bəlkə özü sizi istəyib ? – ehtimal edirəm.
Başının hərəkəti ilə “Ola bilər, yəqin ki, elədir” – təsdiqləyir və bu məlumatın hələ yayılmamasını arzulayır.
Ayağa qalxırıq: – Sizi maşınla aparacağam, – deyir.
Jurnalist xanım əlində telefon gəlir və tanınmış şəxsin həbsi barədə artıq medianın yaydığı xəbərləri Adil müəllimə çatdırır.
Ertəsi gün mənə yazacaq: “Çoxdandır belə ciddi işlərlə məşğul olmuram”.
İlk görüşümüzdə “heç nəyə həvəsim qalmayıb” sözlərini yada salaraq ona zarafatyana “Şahzadə Florizelin macəraları” adlı bir bədii filmi xatırladıram. Bu Şahzadə hər darıxanda şəhərə çıxır, bir cinayətin izinə düşür və onu açırdı. Cavabında mənə artıq vəkili olduğu şəxsin haqqında çəkilmiş “kinoya” baxmağı tövsiyə edir. Dediyi filmə baxmasam da vəkillik məsuliyyətini boynuna aldığı işin həqiqətən nə qədər ciddi olduğunun fərqinə varıram.
Bu, Adil müəllimin Vəkil kimi başa çatdıra bilməyəcəyi sonuncu ciddi iş olacaq…Ardı var...