Bir müddət idi ki, Azərbaycanda həbsxanalarda koronavirus pandemiyasının yayıldığı iddia olunurdu.
“Toplum TV” həbsxanalardakı vəziyyətin necə olması ilə bağlı araşdırma aparıb.
Bununla bağlı həbsdən yeni çıxmış bir neçə keçmiş məhbusa pandemiya şəraitində həbsxanaladakı durumla əlaqədar suallar ünvanlayıb.
FOTO: mikroskopmedia
Azərbaycan Xalq Cəbhəsi Partiyasının (AXCP) Gənclər Komitəsinin İdarə heyətinin üzvü Fuad Əhmədli deyib ki, pandemiya ilə bağlı həbsxanalarda da məhduiyyətlər tətbiq edilir: “Martın 6-da COVİD-19 pandemiyasının ölkəyə gəlişi artıq cəzaçəkmə müəssisəsində hiss olunurdu. Belə ki, görüşlər dayandırılır, məhkumların ailələrindən gələn ərzaq qəbulunun qarşısı alınırdı. Yalnız maddi vəsaitin və siqaretin (tütün məhsullarının) içəriyə daxil olmasına icazə verilirdi. Sonrakı dövrlərdə bir müddət üçün ərzaq qəbulu bərpa olundu. Mən avqustda azadlığa çıxanda yenidən məhdudiyyətlər qoyulmuşdu. Nəzərə alaq ki, məhkum ailələrinin hamısı Bakıda yaşamır, onların əksəriyyəti, regionlardan olan məhkumlar idi. Paytaxta giriş-çıxış qadağaları olduğu vaxtlarda, ümumiyyətlə, ailələri gələ bilmirdi. Poçt vasitəsilə pul göndərə bilirdilər”
AXCP üzvü Fuad Əhmədli 2016-2020- ci illərdə məhbəs həyatı yaşayıb.
Məhbus həyatının 2017-2020-ci illərini əhatə edən hissəsini 16 saylı Cəzaçəkmə Müəssisəsində keçirib.
Fuad Əhmədli deyir ki, həmin dövrlərdə həbsxanalara koronvirus testi aparılmırdı: “Testin qiyməti çox bahadır, bəlkə də, həmin dövr üçün ehtiyac görülmürdü deyə koronavirusun ixtisaslaşmış testi cəzaçəkmə müəssisəsinə aparılmırdı. Həkim yoxlaması 4 ay ərzində 2 dəfə keçirilirdi. Böyük bir maşın – rentgen maşını gəlirdi. Ciyərləri yoxlayırdı, ondan sonra məhkum tələb edərsə, gedib qan analizi verirdi. İstəməyən isə analiz vermirdi. Rentgen vasitəsilə COVİD-19-un təyin edilməsi mümkündürmü? Bunu bilmirəm”.
Fuad Əhmədli həmin vaxt müalicə müəssisəsindən gələn 2 nəfər məhkumda koronavirusa yoluxmanın əlamətlərinin hiss olunduğunu, lakin onların tibb məntəqəsinə deyil, cərimə təcridxanasına yerləşdirildiyini söyləyir: “Cərimə təcridxanası isə yalnız kobud rejim pozuntusuna yol verən məhkumların saxlanıldığı bir yerdir. Onlara heç bir test aparılmadı. Sadəcə, standart qızdırmanın və qripin müalicə proseduru tətbiq olundu. Sonradan digər məhkumların arasına qaytarıldılar”.
Onun sözlərinə görə, yoxlanış zamanı meydança balaca olduğu üçün 600-700 məhkum 10-15 sm ara məsafəsiylə dayanır: “Çünki faktiki yoxlama meydançası balaca, məhkum sayı isə çox idi. Hər kəsə yer çatması üçün sıx-sıx dayanmağa məcbur idik. Tibbi maskadan istifadə olunurdu. Yoxlanışa çıxılan vaxtlarda maskadan istifadə olunurdu. Digər zamanlarda məhkumlar üçün nəzərdə tutulmuş kafelər və biliyard salonlarında, hamamda maskadan istifadə olunmurdu”.
Fuad Əhmədli deyir ki, sözügedən cəzaçəkmə müəssisəsində məhbuslara fərdi sabun verilməsə də, tibbi maska paylayıblar: “Sonrakı dövrlərdə ticarət maskaları köşklərdən əldə etməli olduq. Çünki daha müəssisə tərəfindən verilmirdi. Tibbi maska standart qiymətə idi. Mən orada olduğum müddətdə digər yoluxma hallarına rast gəlinmədi”.
O vurğulayır ki, cəzaçəkmə müəssisəsi tərəfindən qəbul edilmiş qaydaya görə, həftədə bir dəfə təxminən, 600 nəfər məhkuma cəmi 16 ədəd sabun verilirdi: “Müəssisədə tutaq ki, 4 əl-üz yuyulan yer var və sabunlar yalnız onların üzərinə düzülürdü. Hər məhkuma fərdi qaydada sabun verilmir. Sabunu istəyən məhkum ticarət köşkündən öz vəsaiti hesabına əldə edə bilər. Digər gigiyenik vasitələrdən isə ümumiyyətlə, söhbət gedə bilməz. Ticarət köşklərində olan gigiyenik vasitələr, məsələn, sabun limitli şəkildə mövcud idi. 2 çeşiddə sabun var idi. Qiyməti isə olduğundan bir qədər baha satılırdı. Müəssisə tərəfindən təqdim olunan sabunun isə keyfiyyəti mübahisələndirilməlidir. Məhkumlar arasında buna “payka” sabun deyirlər. Duş qəbul edən zaman həmin sabundan istifadə etmək, faktiki olaraq, mümkün deyil. Məhkumlar məcbur qalıb öz vəsaitləri hesabına köşkdən sabun əldə edirdilər”.
F. Əhmədli müəssisə əməkdaşlarının etinasız davranışlarından gileylənir:“Müəssisə əməkdaşları özləri evlərinə gedirlər. Növbəti gün yenidən işə qayıdırlar. Hər hansı bir müəssisə əməkdaşı infeksiyanı gətirib məhkumları yoluxdura bilərdi. Yaşayış ərazisində də müəssisə əməkdaşları maskanı çıxararaq siqaret çəkirdilər, axşam vaxtları məhbusların gəzdikləri yerlərdə tibbi maska istifadə etmədən dolaşırdılar”.
Penitensiar Xidmətin ictimaiyyətlə əlaqələr şöbəsinin rəisi Mehman Sadıqov isə “Toplum Tv” yə məlumatları təkzib edib.
FOTO: faktxəbər
O bildirib ki, məhkumlar bütün gigiyenik vasitələrlə tam şəkildə təmin olunur: ”Heç bir cəzaçəkmə müəssisəsində və yaxud istintaq təcridxanasında dezinfeksiya və gigiyenik vasitələrlə bağlı hər hansı bir qıtlıq yoxdur.
Nazirlər Kabineti tərəfindən xüsusi təsdiq olunmuş normalar üzrə bütün cəzaçəkmə müəssisəsiləri gigiyenik vasitələrlə təmin olunur və lazımi tədbirlər həyata keçirilib. Kimsə sabunların keyfiyyətindən razı qalmırsa, hər bir müəssisədə dükanlarımız, köşklərimiz fəaliyyət göstərir. Məhkumlar oradan ilkin təlabat mallarını ala bilərlər. Dövlət tərəfindən gigiyenik vasitələr verilir, kimsə bəyənmirsə, köşkdən digər çeşidləri əldə edə bilər”.
Həkim yoxlanışı ilə bağlı suala isə Mehman Sadıqov: “Gündə 2 dəfə məhkuların say yoxlanılması keçirilərkən həkimlər hərarətölçən cihazlarla onların qızdırmasını ölçür, hər hansı bir fəsad olarsa, mütləq həkim nəzarətinə götürülür və lazım gəldikdə testdən keçirilir”, – deyə cavab verib.
AXCP üzvü Baba Süleymanov isə deyir ki, xəstələr özlərini narahat hiss edəndə həkim çağırılırdı: “Ora düşdüyüm gün karantinə alındım və korona testi verdim. Karantində tək idim və testin cavabları 3 gündən sonra çıxdı. Neqativ olduğuna görə məni hamı kimi korpusa, digər dustaqların olduğu yerə apardılar. Kameralarda təmizlik normal idi. Çünki dustaqlar özləri hər gün öz kameralarını təmizləyirlər. Bu, məcburi deyil, amma təmiz olması üçün vacibdir. Kameradan bayıra çıxmadığımıza görə hər gün və ya hər həftə həkim müayinəsinə də ehtiyac yox idi. Lakin özünü narahat hiss etsən, həkim çağrılırdı”.
FOTO: mikroskopmedia
Baba Süleymanov 2016-ci ildən AXCP üzvüdür.
O, Qarabağ yürüşündə iştirak etdiyinə görə iyulun 20-si həbs edilib.
Deyir ki, barəsində 3 aylıq həbs qərtimkan tədbiri seçiləndən sonra uzun müddət Kürdəxanı Təcridxanasında saxlanılıb.
O, təcridxanada olduğu 4 ay müddətində 3 dəfə koronavirusdan testdən verdiyini deyir: “Hər 3-ü də neqativ çıxıb. Ümumiyyətlə, əgər Kürdəxanıdan çıxıb, məsələn, xəstəxanaya gedirsənsə, orada da karantinə alınırsan və test verirsən. Geri Kürdəxanıya qayıdanda yenə karantinə alınırsan və yenə test verirsən. Bu barədə görülən tədbirlər ciddidir. Kameralar hər həftə dezinfeksiya olur. Əgər bir nəfərdə koronavirus aşkarlanarsa, onu dərhal hamıdan təcrid edib müalicə edirdilər”.
Toplum.tv