Əsgərimiz 44 günlük əfsanəvi qələbəsiylə təkcə düşmənin nələrdə zəif olduğunu və bizim millətin nədə güclü olduğunu göstərmədi. Onlar həm də bizim zəif nöqtələrimizə nəzəri çəkdilər.
Etiraf edək ki, müharibədən əvvəl çoxumuz millətimizin bu qədər sağlam ruhla birləşəcəyini gözləmirdi. Ya da belə deyək, hər şey gözləniləni ötdü. Sağçı, solçu, millətçi, ya liberal olsun, dindar olsun, darvinist olsun, möhtəşəm bir birlik nümunəsi göstərildi. Gənclərimiz sosial şəbəkələri rusca, ingiliscə, fransızca və digər dillərdə silkələdilər. İsterika, üzcıranlıq və vay-şüvənlik üzrə çoxəsrlik “milli” təcrübə sahibi olan ermənilərlə boybaboy, sənədlə, tarixlə, arqumentlə, faktla yarışdılar, dalaşdılar. İstər xaricdəkilər olsun, istər ölkənin özündəkilər, insanların sırf könlündən gələn maddi və mənəvi dəstəyi heyrət doğuran idi. Spontan, pərakəndə də olsa, öz-özünə əmələ gəlmiş təşəbbüslərin hamısı həm göz qamaşdırır, həm göz yaşardırdı.
Heyhat, bir detal gözdən qaçmadı. İnformasiya müharibəsində qeyri-mütəşəkkillik və bunun xüsusilə xaricdə açıq hiss olunan təsirləri. Başqa dillə desək, diasporanın (xaricdə yaşayan azərbaycanlıların) maddi və mənəvi dəstəyi, canfəşanlığı alqışa dəyər olsa da, plan, proqram, koordinasiya, orientasiya, yəni bir sözlə deyək, Diaspora komitəsinin etməli olduğu bütün şeylər, yumşaq deyək yarımçıq idi (bu milli barışıq ərəfəsində könül sındırmaq istəmirik, mesaj vermək istəyirik – müəllif).
Bunu gördük : Diasporalarla İŞ üzrə Dövlət komitəsi həmin İŞə lazımınca yanaşmayıb. Məsələn, Fransada açıq məğlubiyyət yaşandı. Aydındır ki, Fransanın Səlib yürüşlərindən bu yana ermənilərə minillik münasibəti var. Fransada hər 100 nəfərdən biri ermənidir. Sosial dayaqları möhkəmdir o cəmiyyətdə, erməni imici, “qurban, qorunmağa dəyər, məzlum xalq” şəklindədir. Üstəlik, Fransa ermənilər vasitəsilə Türkiyəyə də mesaj ötürməli idi. Yəni, Fransada baş verənlərin obyektiv səbəbləri də vardı.
Fəqət, illərdir Fransaya diasporanın təşkili üçün fondlar ayrılır, əlaqələr qurulur, pullar xərclənirsə, bunun da müsbət nəticələri olmalı idi. Belə işlərin, barı erməni diasporasının “ağır artilleriya”-sı qarşısında yumşaldıcı effekti hiss edilməli idi, axı ? Olmadı. Fransızlardan kimlərə ki pul yedirilmişdi ya sakit durdular (Rəşidə DATİ), ya da bir-iki istisnayla, gücsüz qaldılar. Təsəvvür edin, Fransada adicə pensiyanın artırılması ilə bağlı səsvermədə deputatlar bu qədər həmrəy olmazkən, erməni məsələsində yekdilliklə bizim ələyhimizə səs verən çağırışa qatıldılar.
Çox səbəbi var və bunların arasında diaspora ilə işlərin düzgün qurulmamış olması, şəxslərin doğru ayırd edilməməsi, strategiya boşluğu, hədəfsizlik və nəhayət, yeyintilərlə bağlı qulaqbatıran söz-söhbətlərin itələyici, bölücü effektlərini də sadalamaq gərəkdir.
Diaspora yenidən təşkil edilməlidir. Əsgər işini görür, diplomatlar görür, diaspora təşkilarlarının isə hələ uzun müddət meydanda qalması lazımdır.
Azad Akifoğlu