AXCP Rəyasət Heyətinin üzvü Fuad Qəhrəmanlı
Dünən Türkiyənin Milli Müdafiə naziri Hulusi Akar Azərbaycana səfərə gəlib. Nümayəndə heyətinə Türkiyə Silahlı Qüvvələrinin Baş Qərargah rəisi Yaşar Güler, Quru Qoşunları komandanı Ümit Dündar və Hərbi Dəniz Qüvvələri komandanı Adnan Özbal daxildir.
Hərbi baxımdan nümayəndə heyətinin tərkibinin belə geniş olması, bu səfərin mühümlüyünü və məqsədini göstərir.
Atəşkəs haqqında üçtərəfli Bəyanat imzalandıqdan sonra, Azərbaycan və Türkiyə tərəfi Türkiyə sülhməramlılarının Dağlıq Qarabağa gələcəyini dəfələrlə bildirsələr də bu gerçəkləşmədi. Əvəzində isə, Rusiya bu məsələdə Azərbaycanın çəkingən mövqeyindən istifadə edərək, təktərəfli qaydada Qarabağa daxil oldu və işğalçı rejimi himayəsinə aldı. Türklərə isə bunun müqabilində, Ağdamda yerləşəcək müşahidə məntəqəsində 35 nəfərlik heyətlə yalnız qərərgahda təmsil olunmaq hüququ verildi. Beləliklə də bütün savaş dönəmində ölkəmizə birmənalı dəstək verən qardaş dövlətin, sahəyə buraxılmaması üçün Rusiyanın Azərbaycana göstərdiyi təzyiqlər nəticə verdi.
Azərbaycanın Rusiyanın təzyiqlərinə bu şəkildə tabe olması, Rusiyanın münaqişə zonasında hərbi nəzarəti bir tərəfli şəkildə əla alması ilə qalmayıb, həm də separatçı rejimi himayə etməsinə şərait yaratdı.
Görünən odur ki, Azərbaycan rəhbərliyi bu durumla barışmış kimi görünsə də, Türkiyə belə bir vəziyyətdən məmnun deyil və razılaşmır. Bir neçə gün öncə Hulusi Akar açıq şəkildə bildirdi ki, “Azərbaycanın işğaldan azad olunmuş torpaqlarına təhlükə yaranarsa Türkiyə o torpaqları qorumağa hazırdır.”
Onun bu bəyanatı, əslində, Azərbaycana Rusiyanın təzyiqlərinə boyun əyməmək üçün təhlükəsizlik qarantiyası təklifi hesab oluna bilərdi.
Bu bəyanatdan dərhal sonra Hulusi Akarın başçılığı ilə geniş tərkibli nümayəndə heyətini Bakıya göndərmək, İlham Əliyevə Rusiyanın təzyiqlərinə qarşı Türkiyənin hərbi dəstəyini və geniş hərbi əməkdaşlıq təkliflərini çatdırmaq məqsədi daşıyır. Azərbaycan tərəfi Türkiyənin bu təhlükəsizlik qarantiyasına güvənib, təktərəfli qaydada öz suveren ərazisində Türkiyənin Dağlıq Qarabağda hərbi iştirakını təmin edə bilər. Bu təminat qarşısında “biz ruslarla razılaşmasaq, Qarabağda onlara gücümüz çatmaz” əks arqumenti keçərsiz qalır.
İndi söz və mövqe ortaya qoymaq növbəsi Azərbaycanındır.
Dağlıq Qarabağda separatçı rejimi hərbi siyasi baxımdan himayə edən və ölkəmizin suverenliyini hər gün tapdayan Rusiyaya qarşı hərbi strateji balansı dəyişmək üçün Türkiyənin təkliflərini qəbul edib, qardaş ölkənin ordusunu ölkəmizə dəvət etməliyik.