Milli Şuranın sədri Cəmil Həsənli
Ölkənin keçmişinə və gələcəyinə işıq tutan bir liderin daha bir doğum günü, təvəllüd tarixi müstəqil Azərbaycanda sönük keçir. Söhbət Rəsulzadə Məhəmməd Əmin bəydən gedir. Rəsulzadə başda olmaqla o dövrün liderləri param-parça olmuş dağınıq ərazilərdən vətən, ayrı-ayrı məzhəbə qulluq edən dağınıq bir toplumdan millət yaratdılar, yoxdan bir bayraq ucaltdılar, milləti ucaltdıqları bayrağın kölgəsinə topladılar, Azərbaycan adında dövlət qurdular, millətə və onun yaşadığı ərazilərə sahib çıxan bir dövlət.
Bu böyük xidmətlərinə görə ideoloji postulatlar üzərində qurulan Sovet dövləti Rəsulzadəni və onun mücadilə arxadaşlarını, əqidə çiyindaşlarını millətin yaddaşından silə bilmədi, bir ilin azadlıq sevdasından sonra Əliyev xanədanı da onu tarixin pedeystalından salmaq üçün min bir fitnə-fəsada əl atdı. Amma əlləri yetmədi, çünkü Məhəmməd Əminin adı və əməlləri çox yüksək, çox uca yerdə idi, millətin ruhunda, qəlbində, milli yaddaşında idi. Artıq emalatxanada tamamlanmış heykəlini qoymağa pul “tapmadılar”, amma millət onun heykəlini qəlbində ucaltdı. Və onun qoyulmayan heykəli “heykəlləşmiş” ölkədə daha əzəmətli, daha diri, daha canlı təsir bağışlayır. Çünki bu ölkə onun ölkəsidir, bu vətən onun vətənidir, bu millət onun millətidir.
Rəsulzadə vətənə, millətə, dövlətə xidmətin maraqlı bir örnəyini yaradıb. Böyük Atatürkün dili ilə desək millətin əfəndisi olmaq ona xidmətdən keçir. Rəsulzadəni millətin əfandisi edən və bu gün yaddaşına hopduran məhz həmin xidmət idi. Onun öz dili ilə desək “Cəmaətə qədr bilməyi fədakarlığın ilə gərək öyrədəsən. Əvəzsiz heç nə alınmaz. Fəda ol, qədr gör!”. Fəda oldu və qədr gördü. Budur onun böyüklüyü, səmimiliyi, milli yaddaşlarda qalmağının səbəbi.
Rəsulzadə ideya adamı idi. Onun parlaq şəxsiyyəti tarixi prosesin içində formalaşdı. Qələmi həm mətbuatı, həm ictimai fikri, həm də onun təkrarsız şəxsiyyətini cilaladı. Onu heç kim önə çıxarmadı, o, tarixin dolanbaclarında bu millətin yükünü-çəkə-çəkə siyasət səhnəsinə çıxdı, milli idealların öncülünə, milli etiqad və inam yerinə çevrildi. Məhəmməd Əmin bəy bütün həyatı və mübarizəsi boyu millətin istək və arzuları üzərində qurulmuş öz ideallarına sadiq qaldı, ən çətin məqamlarda belə milli iradədən bir addım da geri çəkilmədi.
O, heyrətamiz dərəcədə ardıcıl, bütün fəaliyyətində xalqçı, ədalət meyarına görə bərabərçi idi. Millətin və millətlərin bərabərliyi, xalqın, toplumun və fərdin bərabərliyi. Qurduğu partiyanın adını “Müsavat” qoyması da bu ədalət meyarından irəli gəlirdi. Millət işinə, xalq işinə həddən artıq sədaqətli idi. 1928-ci ildə Əlimərdan bəy Parisdə Rusiya Dumasındakı keçmiş köməkçisi Zəki Vəlidi Toğanla görüşəndə çox kövrələrək ona vəsiyyət etdi ki, mən yaşlaşmışam, yəqin kommunist Rusiyasının dağılmasın görməyəcəyəm, Rusiya türklərinin istiqlal mücadiləsin sizə, Azərbaycanın istiqlal mücadiləsin də Məhəmməd Əmin bəyə əmanət edirəm.
Məhəmməd Əmin Rəsulzadənin mühacirət həyatı çox keçməkeşli olub. İstər tarixi, istərsə də çağdaş əleydarları çox cılız, təsadüfü adamlar olub. 1920-ci ildə Bayıl həbsxanasının birinci mərtəbəsində yatanlar, ikinci mərtəbədə ölümünü gözləməyi ona çox görür, bunu ona yaradılmış imtiyaz kimi şərh edirdilər. Bu ölkəni korrupsia, rüşvət, talançılıq girdabına çevirənlər, dəvəni yüküylə, sarbanı ipi ilə udanlar ona qarşı ip ucu verir, onu guya ölkənin “qızıllarını” aparmaqda ittiham edirdilər.
Məhəmməd Əmini Stalin keçmiş münasibətlərə xatir Moskvaya apardı. Amma o, orada qala bilmədi. Amma tatar teoloqu Musa Cərullah Biqiyevin yardımı ilə o, Finlandiya üzərindən 1922-ci ilin sonlarında Türkiyəyə gələ billdi və oradan Stalinə bir məktub yazdı, həmin məktubda dedi ki, yüz il bundan öncə olduğu kimi ətrafına müstəmləkələr “toplayan” Rusiyada qalmaq onun üçün mənasız idi. Millətlərə münasibətdə Sovet Rusiyasının Çar Rusiyasından fərqlənmədiyini və daha betər olduğunu Stalinə yazdı Məhəmməd Əmin.
1923-cü ildə onun Əli bəy Hüseynzadənin öz sözü ilə çıxan “Azərbaycan Cümhuriyyəti” kitabı Sovet milli siyasətinin ifşası baxımdan bir manifest idi. İzmir kitab sərgisində mükafat almış kitabın nüsxələrini Qafqazda işləyən tanınmış bolşeviklər cantalarında gəzdirirdilər. Təcili onu tərcümə edib Stalinə verdilər. O tərcümənin səhifələrində Stalinin üzünə möhkəm milli bir şapalaq dəydi. Rəhbərlik etdiyi Millətlər Komissarlığının milli əsarət yuvası olduğunu Stalinin üzünə deyirdi Məhəmməd Əmin.
Ona görə Rəsulzadənin “ifşasına” Millətlər Komissarı özü rəhbərlik etməyə başladı. 1923-cü ilin sentyabrın 16-da o, Qafqazdakı əlaltılarına Rəsulzadənin məlum kitabının müsəlman xalqlarına təsirini azaltmaq üçün ona qarşı hücuma keçməyə göstəriş verdi. Göstərişlə yanaşı onu nələrdə ittiham etməyim planını da Musabəyova, Mirzoyana, Axundova, Kirova, Orexalaşviliyə göndərdi. Nə deyirdi Stalin: O, yazırdı ki, Rəsulzadəni xəanətdə ittiham etmək. O, əvvəl bolşevik idi, bizə xəyanət etdi; Türkiyəyə xəyanətdə ittiham etmək. Beləki, o, özü və onun rəhbərlik etdiyi “Müsavat” partiyası Qırmızı ordunun Azərbaycandan keçib türklərə kömək etməsinə və Bakını tutmasına mane olurdu; Azərbaycan xalqına xəyanətdə: Torpağın kəndlilərə verilməsinə və bəy mülklərinin ləğv edilməsinə mane olub; Bütün Şərq xalqlarının maraqlarına xəyanətdə: ingilislərin müsəlmanlar üzərində müstəmləkə ağalığının saxlanmasına kömək edib; Erməni-tatar qırğının təşkilində ittiham etmək və onu Azərbaycanın Pruşkeviçi adlandırmaq. Bax, Məhəmməd Əminə qarşı qlobal, dövlət səviyyəsində kampaniya belə başladı və bu kampaniya 70 il davam etdi və indi də davam etməkdədir.
Lakin Rəsulzadə ideya, məslək adamı olduğu üçün ona qarşı kampaniya aparananlardan daha güclü çıxdı. Ona qarşı olanların çoxu diriykən öldü, Məhəmməd Əmin bəy isə milli diriliyin simvoluna çevrildi. Fərq bunda idi, dünyagörüş fərqi vardı aralarında. Çünki o, milli taledə təcəlla tapan milli dirilik fəlsəfəsinin baş memarı idi. O, yazırdı ki, Avropalılar ölürlər dirilmək üçün, biz isə dirilirik ölmək üçün. Uzun əsrlər boyu davan edən bu cəhaləti, bu düşüncəni dəyişdi Məhəmməd Əmin bəy. Bu gün ona qarşı duranlar da, onu “təqib” edənlər də, heykəlinin emalatxanadan vətəninə ayaq açmasına mane olanlar da bu dirilik fəlsəfəsindən qorxurlar, Rəsulzadənin milli dirilik təlimindən qorxurlar.