Bəxtiyar Hacıyev
Hansısa rayonda, tutaq ki, Ucarda bir vətəndaşa mənzilinin çıxarışını verməyən məmurla bağlı problemdən ölkə prezidentinin xəbərsiz olması normaldır.
Amma Hebib Müntezir 3-4 min kilometr məsafədən öyrəndiyi və üzə çıxardığı, paylaşdığı, Mehman Huseynovun dronla görüntülərini çəkdiyi, Khadija Ismayilın sənədlərini tapdığı və üzə çıxardığı, Ganimat Zayidovun keçmişdə baş verənləri arxivdən çıxararaq yazdığı məmur-oliqarx mülkləri, varidatları, biznesləri, macəraları haqqında prezidentin xəbərsiz olması inandırıcı deyil.
Prezident son çıxışında da bildirdi ki, məmurlar əksər addımları atanda ondan icazə alırlar. Mərkəzi Bankın Şuşada idarə açmağını ondan soruşurlarsa, Mərkəzi Bankın Bakıda 450 milyon manata bina tikməsindən xəbərsiz ola bilərmi? Fövqəladə Hallar Nazirliyinin regional idarə açmaq istəyini orada haranısa mənimsəyib, hasarlayıb, iqamətgah tikmək istəyi ilə əlaqələndirirsə, digər rayonlarda tikilmiş iqamətgahlardan xəbərsiz olması mümkündürmü? Azərsu, Azərbaycan Avtomobil Yolları, AZAL-ın bir idarəsinin orada açılması ilə bağlı icazəni özü verir, yaxud imtina edirsə, bu qurumların rəhbərlərinin Bakının mərkəzində hektarlarla bağ sahəsində dəyəri on, yüz milyonlarla ölçülən villalarından xəbərsiz ola bilərmi?
Prezident Administrasiyasında prezidentə kim “məmurları tənqid edin, özünüzü onlardan uzaq, xəbərsiz kimi təqdim edin” deyirsə, prezidentə ciddi zərbə vurur. Çünki bu çıxışlardan sonra Administrasiyanın əlində oynatdığı 5-10 partiya sədri, 10-15 QHT rəhbəri, 20-30 jurnalist qışqıra-qışqıra “görürsünüz, prezidenti işləməyə qoymurlar, mənfur məmurlar dağıdırlar ölkəni” çıxışı edə bilərlər.
Cəmiyyət isə artıq ayıqdır. Onlar “Mehmanın, Həbibin, Xədicənin bildiklərini prezident 18 ildə bilməyibmi? İctimai nəzarət istəyirsə, QHT-ləri, medianı dağıtmaq nəyə lazım idi? Məmurlar bu qədər yırtıcıdırlarsa, dövlət büdcəsini prezidentdən xəbərsiz dağıdırlarsa, iqamətgahları, milyardlıq biznesləri onillərlə prezidentdən xəbərsiz qurublarsa, indi niyə tədbir görülmür onlarla bağlı? Əvəzində universitetdə haqqını tələb edən gənc, sosial şəbəkədə tənqid yazan fəal, normal suallar soruşan jurnalistlər həbs olunurlar” və s. kimi suallar soruşurlar.
İctimai nəzarəti sizdən yaxşı heç kim həyata keçirə bilməz, cənab prezident. Siz isə hər şeydən xəbərdarsınız. Bu gün yüz minlərlə gənc kirayələrdə sürünürsə, on minlərlə gənc ailə ipoteka yükü altında qalıbsa, yüz minlərlə gənc normal iş axtarışındadırsa, hansısa məmurun övladının təkcə bir binası bir neçə milyard dəyərindədirsə, digər məmurun övladının təkcə bir saatı 2 milyon dəyərində, digərinin bir qarajı 15-20 milyon dəyərində avtomobillərlə doludursa, bu qeyri-bərabərliyə və ədalətsiz idarəetməyə siz rəvac vermisiniz.