Xəqani Cəfərli
“Putinin sarayı. Ən böyük rüşvətin tarixçəsi” filminin youtebe-da baxış sayının 100 milyonu keçdiyi haqqında məlumata münasibət bildirən Rusiya müxalifətinin lideri Aleksey Navalnı bildirmişdir ki, əgər filmi izləyənlərin 2 faizi küçlərə çıxsa, saray əhlinin ağlını başına gətirəcək. Rusiyalı politoqlar hesab edir ki, müxalifət lideri inqilab etmək üçün 2 milyon nəfərin fəal dəstəyinə ehtiyacı olduğuna işarə edir.
Harvard Universitetinin professoru Erika Çenovet (Erica Chenoweth) XX əsrdə baş vermiş 100-dən artıq dinc etiraz aksiyasın təhlil etdikdən sonra belə nəticəyə gəlib ki, əhalinin 3.5 faizi etiraz aksiyalarında fəal iştirak etsə siyasi dəyişiklik qaçılmaz olur.
Dünyanın ən nüfuzlu sosioloqlarından biri hesab olunan professor Erika Çenovet dinc etirazların zorakı müqavimətdən daha effektli olduğunu da müəyyən edib. Mahatma Qandi və Martin Lüter Kinqin fəlsəvi görüşlərini öyrənən professor Erika Çenovet dinc etirazların nə qədər böyük qüdrətə malik olduğunu sanballı təhqiqatlarla sübut edib.
Professor Erika Çenovetin dinc yolla siyasi dəyişikliklərə nail olmaq düsturundan çıxış etsək Rusiyada 2 milyon nəfərin küçələrə çıxması inqialb üçün yetərli olmaya bilər. Rusiyanın əhalisinin 146 milyon olduğunu nəzrə alsaq siyasi dəyişikliklərə nail olmaq üçün etiraz aksiyalarında ən azı 5 milyon insan fəal iştirak etməlidir.
Rusiya müxalifətinin təmsilçiləri 23 və 31 yanvarda 250-300 min insanın razılaşdırılmamış etiraz aksiyalarında iştirak etdiyini bəyan ediblər. “Bəyaz sayğaç” təşkilatı isə etiazçıların sayının 200 min nəfərə yaxın olduğunu açıqlayıb. Uzun illərdir Rusiyada etiraz aksiyalarının iştirakçılarının sayını hesablamaqla məşğul olan “Bəyaz sayğaç” təşkilatı 23 yanvar aksiyasını Sovet İttifaqının dağılmasından sonra Rusiya tarixinin ən kütləvi razılaşdırılmamış aksiyası olduğunu açıqlayıb. “Bəyaz sayğaç”ın məlumatına görə böyük şəhərlərdə etiraz aksiyalarına əhalinin 0.3 faizi ilə 0.7 faizi qoşulub.
Ən yüksək göstərici Yekaterinburqda qeydə alınıb. Burada şəhər əhalisinin 0.7 faizi aksiyaya qoşulub. Müşahidəçilər bunu Yekaterinburqun sabiq meri Yevgeni Royzmanın aksiyanı dəstəkləməsi ilə izah edirlər. Aleksey Navalnın yaxın tərəfdarlarından hesab olunan Royzman Yekaterinburqda yüksək nüfuza malikdir. Tatarıstanın paytaxtı Kazanda əhalinin 0.6 faizi aksiyada iştirak edib. Moskvada əhalinin 0.3 faizi, Sankt-Peterburqda isə əhalinin 0.5 faizi aksiyada fəal iştirak edib.
Ancaq istər “Bəyaz sayğaç” təşkilatı, istərsə də digər müşahidəçilər aksiyaçılarla həmrəy olanların fəal iştirakçıların sayından dəfələrlə çox olduğunu bildirirlər.
Aksiyalarla bağlı müşahidə aparan sosioloqlar isə böyük şəhərlərinin əhalisinin hətta bir faizinin iştirak etmədiyi aksiyaların qarşısını almaqda polisin və qvardiyanın çətinlik çəkdiyinə diqqət çəkiblər. Müşahidəçilər onu da qeydə alıblar ki, paytaxt Moskvada 2 minə yaxın şəxsin aksiyada iştiraka görə saxlanılması bütün müvəqqəti saxlama təcridxanalarının tamamilə dolmasına səbəb olub. Təcridxanaların yetərli olmamasına görə həbs olunların bir hissəsini “avtozak”larda saxlamağa məcbur olublar.
Rusiya hakimiyyətinin böyük şəhərdə əhalinin 0.3-0.7 faizinin iştirak etdiyi aksiyaların qarşısını almaqda çətinlik çəkdiyinə diqqət çəkən müşahidəçilər siyasi dəyişikliklərə nail olmaq üçün professor Erika Çenovetin müəyyən etdiyi kimi əhalinin 3.5 faizinin deyil, hətta 2 fazinin iştirak etməsinin yetərli ola biləcəyinə diqqət çəkirlər. Yəni, 23 və 31 yanvar mitinqləri ilə müqayisədə 7 dəfə artıq insan iştirak etsə, siyasi dəyişikliklər qaçılmaz olacaq. Çünki, Rusiya hakimiyyətinin 2 milyon insanın fəal iştirak edəcəyi aksiyaların qarşısını almağa resursu çatmayacaq.