Qənimət Zahid
Bəzi məlumatları dolaşıq salırlar. Səlim Müslümovun adı maliyyə qalmaqalında ilk dəfə 1995-ci ildə hallanıb. O zaman Bəşər Hacıyev, Səlim Müslümov və Səbayelin icra başçısının birinci müavini Hüseyn Hüseynov 50 milyon dolları mənimsəməkdə ittiham edilmişdilər. Bəşər Hacıyev getdi içəri, Hüseyn Hüseynovu qoydular Binəqədiyə icra başçısı, Səlim Müslümov da Gömrük Komitəsinə aparıldı.
2000-ci ildə (məncə hətta bir ik il də sonra idi) Bəşər Hacıyevin Beynəlxalq Bankın Xırdalan şöbəsində rəis işlədiyi məlum oldu. Həm də niyə məlum oldu ? Çünki, Abşeron rayonu ərazisindəki xarici şirkətlərin bank hesabları bu filialda idi və birbən – birə bəlli oldu ki, Bəşər Hacıyev babat bir dəstə yaradıb həmin iri şirkətlərin hesabından pulları çırpışdırır, əsasən Pribaltika bankları üzərindən xarici bank hesablarına ötürür. Bəşər Hacıyevi yenə də tutdular.
Amma Bəşər yenidən zühur etdi !
2016- cı ilin aprel ayının 5-də Bəşər Hacıyev prezidentin saytında görükdü və orda onun məktubu dərc edilmişdi! Həmin məktubda deyilirdi : «Cənab Prezident,
Xarici və daxili siyasətimizdə qazanılan uğurlara görə Sizi təbrik edirəm. Hər bir azərbaycanlı kimi mən də Sizin döyüş əmrlərinizi yerinə yetirməyə hazıram. Bizim birliyimiz və gücümüz qarşısında düşmənin tab gətirmədiyini gördük. Bu, yolun başlanğıcıdır. Sizə uğurlar arzulayıram.
Hörmətlə,
Hacıyev Bəşər Yaşar oğlu,
Azərbaycan Respublikası, Bakı şəhəri, Yasamal rayonu ».
O zaman əldə etdiyim qaynar məlumata görə Bəşər Hacıyev bu balaca məktubun həmin saytda dərc edilməsinə görə saytın admin heyətinə 50 min dollar vəsait ödəyib və başlıca məqsədi də Vətənimizin o ağır günlərində bəraət alaraq yeni ağır və məsul vəzifələrə təyinat almaq olub. Özünün də qeyd etdiyi kimi « bu, yolun başlanğıcı » idi və yəqin ki, ikinci aşırımdan sonrakı yolu nəzərdə tuturdu. İndi onun harda olduğunu bilmirəm.
Səlim Müslümova gəlincə, nazir vəzifəsindən qoparılandan sonra ondan 600 milyon manat vəsait alaraq söz vermişdilər ki, Azərbaycan Respublikasının baş naziri vəzifəsinə təyin ediləcək. Amma nəyə görəsə, onun yerinə Novruz Məmmədov təyin edildi və bu gözlənilməz döngədən hətta Novruz Məmmədovun özü də təəccüb etdi. Müslümovu yedəkdə saxladılar və aparıb qoydular Milli Aviasiya Akademiyasında Dünya iqtisadiyyatı kafedrasının müdiri. Bu o demək idi ki, sən Paşayevlərin kadr bankında olaraq qalırsan və sənə böyük ümiidlər bəsləyirik.
Böyük ümidlər də belədir : «səndən gözləntilərimiz yalnız həmin o 600 milyon manat deyildi, davamı gəlsin». Xüsusilə də indiki çətin sınaq dövründə, işğaldan azad edilmiş ərazilərimizin bərpası üçün dövlət büdcəsindən ayrılan 2,2 milyardı tapıb yerinə qoymaq lazımdır. Bu məqsədlə ölkədə Səlim ölçüsündə, ondan bir qədər aşağı və ya yuxarı ölçülərdə olanların hamısına böyük ümidlər bəslənilir… « Adamın barmağı yananda ağzına təpər » kimi atalar sözü var. Bəs milli oliqarxiyamıza da güvənməyib kimə güvənəcəyik ki?! Bu müqəddəs missiyanın icrası üçün uzun illər ərzində yığılan korrupsiya pulları və korrupsioner, iri buynuzlu dövlət məmurları son ümidgahımızdır və onlar da bu ümidləri doğrultmağın nə qədər vacib olduğunu, əlbəttə, dərk edirlər. Buna görə də təcridxananın soyuq divarları arasında bir- iki günlük, bəzən hətta bir neçə saatlıq düşüncə onları bu missiya üçün səfərbər edir və ümidləri doğrultmağa başlayırlar…