Rüfət Səfərov
Bəzi hüquqi məsələlər və Kamran Əliyevin tutduğu vəzifəyə, eləcə də özünə hörmət etməməsi barədə
Dostlar, təbii, əvvəlcə normaların dili ilə danışaq. Ki, Baş prokuroru və ətrafındakıları tənqid edərkən dilimiz uzun olsun. Zira mədəni və etik normaları aşmadan ağır və vəziyyətə adekvat olaraq sərt ifadələrə (haqq etdikləri) üstünlük verəcəyəm.
Hüquq ictimaiyyətinə bəllidir, lakin qeyri-hüquqçular məlumatlı olsunlar ki, Cinayət Prosessual Məcəlləsinin 215.3.1-ci maddəsinin tələbinə görə Cinayət Məcəlləsinin 308-ci (vəzifə səlahiyyətlərindən sui-istifadə etmə) və 311-ci (rüşvət alma-passiv rüşvətxorluq) masddələrində nəzərdə tutulmuş cinayətlər üzrə ibtidai istintaq prokurorluq tərəfindən aparılır.
“Prokurorluq haqqında” Qanunun 4-cü maddəsinə əsasən prokurorluğun çoxsaylı fəaliyyət istiqamətlərindən ikisini mövzu ilə birbaşa əlaqəsi olduğuna görə xüsusi qeyd edirəm:
-prokurorluq cinayət işi üzrə ibtidai araşdırmaya prosessual rəhbərlik edir və qanunlara riayət edilməsini təmin edir;
-təhqiqat və əməliyyat-axtarış orqanlarının fəaliyyətində qanunların icra və tətbiq olunmasına nəzarət edir.
Xatırladaq ki, qanunvericiliyin tələbinə görə daxili işlər, ədliyyə, gömrük, vergi, dövlət təhlükəsizliyi, fövqəladə hallar və sərhəd xidməti orqanlarının istintaq, təhqiqat və əməliyyat-axtarış fəaliyyətində qanunların icrasına nəzarəti prokurorluq həyata keçirir.
“Azərbaycan Respublikasının Baş prokuroru yanında Korrupsiyaya qarşı Mübarizə Baş İdarəsinin Əsasnaməsi”ndə təsbit edilmiş iki vəzifəni xüsusi qabartmaq istəyirəm:
- korrupsiya ilə əlaqədar hüquqpozmalara dair daxil olmuş məlumatlara baxır və araşdırma aparır;
- korrupsiya ilə bağlı cinayətlərlə əlaqədar cinayət işi başlayır və ibtidai istintaq aparır.
Və!
Keçmiş nazir Səlim Müslümovun timsalında biz növbəti dəfə müşahidə etdik ki, qanunların geniş səlahiyyət verməsinə baxmayaraq, misalçün, bir zamanlar Kəmaləddin Heydərovun, Ziya Məmmədovu qarşısında farağat duran üzQARAsı Zakirin xələfi Kamran Əliyevin də dövlət və hökumət rəhbərliyinin yanında etibarı, nüfuzu aşağıdır- formal nəzarət etdiyi hüquq mühafizə orqanları ilə müqayisədə.
Ədalətçün deməliyəm ki, hazırda həbsdə olan keçmiş Baş prokuror Eldar Həsənovun rəhbərliyi altında prokurorluq orqanları qanunvericiliyin imkan verdiyi geniş səlahiyyətlərdən istifadə etməkdə xeyli sərbəst idilər. Yəqin razılaşarsınız ki, hüquq mühafizə orqanları və rəhbərləri Həsənovun şəxsiyyəti, dövlət rəhbərliyi yanında rahat şəkildə təşəbbüskarlıq göstərib, kiçik və ya geniştərkibli müşavirələrdə parlaq nitqləri, dərin biliyi, ən əsası, sərbəst hüquqi iradəsi və düşüncəsi ilə hesablaşmaya bilmirdilər. (Şəksiz, E. Həsənov aydan arı, sudan duru deyil, bu rejimin ilk təməl daşlarını atan fiqurlardan biridir və xələfləri ilə müqayisədə az olsa da ciddi xətaları yox deyil.)
Amma üzQARAsının 20 illik fəaliyyəti nəticəsində prokurorluq orqanlarının nüfuzu polis və ya xüsusi xidmət orqanları ilə müqayisədə xeyli aşağı düşdü: bunun nəticəsidir ki, hazırda ixtiyari inzibati vahiddə rayon polis rəisinin sözünün çəkisi prokurorun özünün çəksindən ağır gəlir.
Təəssüflər olsun ki, Qaralovun “intellektual versiyası” Kamran Əliyev də ölkə həyatında cərəyan edən “hüquqi proses”lərin yedəyində sürünür: vəzifədən sui-istifadə etmə, rüşvət alma cinayətlərinin istintaq aidiyyəti prokurorluğa aid olsa da DTX-nin İstintaq İdarəsi cinayət işi başlayır, həbs edir, bu barədə rəsmi məlumatı cəmiyyətə çatdırır ki, bu da ilk deyil.
Bəs bu qanunları və normaları nə edək?
Kimin gözünə soxaq?
Oxutduraq?
Eşitdirək?
Nə edək? Nə edək də?
Ümumiyyətlə, belə dövlətmi olar?
Belə idarəçilik olarmı?
Kamran Əliyev elə Baş prokuror kimi Sizdən soruşuram:
Olarmı?
Əlbəttə, olmaz!
Məndən də yaxşı bilirsiniz ki, olmaz!
Məndən də gözəl anlayırsınız ki, hüquq qaydaları deyil, “oğru qaydaları” yeriyir!
Belə olan halda necə o kreslonu məşğul edirsiniz?
Özünüzlə o boyda vəzifəni bir araya nə cür sığışdıra bilirsiniz?
Niyə tutduğunuz vəzifəyə, ümumiyyətlə, özünüzə ehtiramla yanaşmırsınız, hörmət qoymursunuz, istefa vermirsiniz?
Ayıb deyil?
Utanmırsınız?
Oğlunuz yaşındayam.
Bu sözləri Sizə deyirəm.
Düz üzünüzə!
Çəkinmədən. Niyə də çəkinməliyəm ki? Haqlı olduğum, həqiqətləri yazdığım halda.
Siz isə heç nə baş verməyibmiş kimi sələfiniz tək deyilənlərə, yazılanlara reaksiya vermirsiniz, sadəcə, o boyda vəzifə məşğul etsəniz də hadisələrin yedəyində sürünürsünüz.
Sürünməyinizdə olun və yəqin ki, bu mətnlə tanış olsanız, dodaqlarınız qaçacaq, istehza ilə yanaşacaqsınız.
Amma əmin olun ki, gənclik olaraq bütün mövcudiyyətimizi səfərbər edib, bu ölkədə hüquq dövləti quracağıq!
Siz, yanında olduqlarınız və yanınızdakılar da bunu görəcək.
Amma haradan görəcəksiniz?
Bax bunu çox da uzaqda olmayan zaman göstərəcək…
P. S. Şübhəsiz, vəziyyətin belə şəkil almasında birbaşa dövlət rəhbərliyi maraqlıdır ki, bunun da səbəbləri barədə qismət olsa, yaxın günlərdə qeydlərimi paylaşaram.