Milli Şuranın Koordinasiya Mərkəzinin üzvü Gültəkin Hacıbəyli
Keçmiş Nəqliyyat naziri Ziya Məmmədov:
“Rayonda arpa, buğda, yonca əkirəm. Mal-qaram var, dolanmaq lazımdır. İndiki dövrdə dolanmaq asan deyil”.
Ziya Məmmədovun Ucar, Göyçay, Goranboy camaatına nə dağlar çəkdiyini mən bilirəm. Ucar camaatı deyirdi ki, burada soyadın Məmmədov deyilsə, sən adam sayılmırsan.
Goranboya icra başçısı təyin etdirdiyi Nizaməddin Quliyevin əli və tapşırıqlarını qeyd-şərtsiz icra etdiyi Ramiz Mehdiyevin təlimatları ilə camaata yaşatmadığı zülm qalmadı. Yeganə səbəb pul idi. İnsanlara zülm etməklə daha çox pul əldə etmək idi.
Seçicilərimin haqqını müdafiə etdiyim üçün mənə düşmən kəsilmişdi. Davamlı şəkildə əleyhimə hər yerdə “Nizaməddin müəllim rayonu inkişaf etdirir, deputat ona maneə olur” təbliğatını aparırdı. Nizaməddini Goranboydan sonra Ağstafanın “inkişaf etdirən” yerdə DTX qandalladı.
Ziya Məmmədov prorabı Qulam Ələkbərovu Goranboya “uçastkovıy” təyin etmişdi, başçı ona tabe idi. Qulam isə mənə “xalqın dərdini çəkmək sizə qalmayıb, qara camaat onsuz da qaragünlüdür, siz gül kimi karyeranızı camaata görə məhv etməyin, Ziya müəllimin işinə qarışmayın” məsləhətini verirdi. “Goranboyu prezident Ziya müəllimə verib. Buralar bizlikdir. İstəyərik, camaatın üstündən tankla, BTR-lə keçərik, sizlik deyil” deyirdi.
Artıq qeyd etdiyim kimi Ziya və bandasının işi rayondan mümkün qədər çox pul qoparmaqdan ibarət idi. İcra başçısına pul verməkdən imtina edən rayonun ən nümunəvi 3 saylı Goranboy şəhər orta məktəbinin direktoru Nüşabə Əhmədovanı hamıya görk olsun, heç kim qorxudan Nizaməddinə pul verməkdən imtina etməsin deyə şərləyib həbs etdirdilər, iki il həbsdə çürütdülər. Halbuki cəmi bir il öncə Goranboy Təhsil İdarəsində geniş yoxlama aparan Baş Prokurorluğun Korrupsiya ilə Mübarizə İdarəsi rayonda yalnız iki məktəbdə korrupsiya faktı aşkarlamamışdı və onlardan biri Nüşabə xanımın direktoru olduğu məktəb idi.
2010-cu ilin may ayında, Nüşabə Əhmədova şərlənib istintaqa cəlb ediləndə Ziya Məmmədovla görüşməyə çalışdım, lakin məndən qaçdı. Ziya Məmmədovdan da şəxsiyyətsiz Zakir Qaralovla görüşməkdən söhbət gedə bilməzdi, çünki Ramiz Mehdiyevin sadiq nökəri kimi onun mənə qarşı iyrənc planının əsas icraçısı boş prokuror özü idi. Nüşabə xanımı rəhbərliyə “mənim adamım” kimi təqdim etməklə mənə də zərbə vurmaq istəyirdilər.
2010-cu ilin 9 May günü Şəhidlər Xiyabanında Ziya Məmmədovu tuta bildim. “Siz bütün həyatını təmənnasız şəkildə təhsilə, gənc nəslin təlim-tərbiyəsinə həsr etmiş ləyaqətli bir xanımı şərləyirsiniz, bunu etməyin” dedim. Ziya Məmmədovun cavabı bu oldu: “Nüşabə Əhmədova korrupsionerdir, cinayətkardır, siz isə cinayətkarı müdafiə edirsiniz. Mən ölkə rəhbərliyinə bu barədə məlumat vermişəm”. Etiraz etdim: “Korrupsioner rayon yerində üçotaqlı bina evində yaşayar?! Gəlin birlikdə onun evinə gedək, evinin şəraitinə baxın, təmiri yoxdur, oturmağa stulu yoxdur, maaşını kasıb şagirdlərin əyin-başına xərcləyir, yoldaşının maaşı ilə dolanır, rayon üzrə ən yüksək qəbul onun məktəbindən olur”. Xalqın milyardlarını talayan Ziya Məmmədov kasıb bir müəllimə haqqında hökmünü çoxdan vermişdi: “Nüşabə Əhmədova cinayətkardır və cəzasını alacaq”.
Yeri gəlmişkən, böyük təzyiqlərə baxmayaraq birinci instansiya məhkəməsi Nüşabə xanıma qarşı irəli sürülən maddələrin çoxunu rədd etdi, ona yalnız Goranboy rayon icra hakimiyyətində şöbə müdiri vəzifəsində çalışan bir şəxsin dərslərini başqa müəllimə verdiyi üçün (maaşı dərs deyən müəllim alırdı) şərti cəza verildi. Təsəvvür edirsiniz?! Deputatların, PA əməkdaşlarının 70 faizi universitetlərdə “dərs deyir”, onların dərsləri də əvəzlənir, ancaq bu, nədənsə cinayət tərkibi yaratmır.
Ziya Məmmədov Gəncə Apellyasiya Məhkəməsinə Ramiz Mehdiyev vasitəsilə təzyiq etdirdi, nəticədə hökm dəyişdirildi və Nüşabə xanım həbs olundu.
İndi xalqın milyardlarını talamış, ən azı onun kurasiyasına verilmiş rayonların camaatına dirigözlü zülm etmiş, evlər yıxmış, günahsız, təmiz bir qadını şərləyib həbs etdirmiş (Ramiz Mehdiyev və Zakir Qaralovla cinayətkar işbirliyi qurmaqla) bu cinayətkar yonca əkib, çəpiş bəsləyir. Halbuki, həbslərdə çürüməlidir. Əlbəttə, bu ölkədə ədalətin Ə hərfi varsa…