AXCP sədri Əli Kərimli
Rus dili Dağlıq Qarabağda erməni dili ilə yanaşı rəsmi dil elan olunur. Dağlıq Qarabağ Azərbaycandan daha da uzaqlaşır, Rusiyanın bu bölgəmiz üzərindəki nəzarəti daha da möhkəmlənir.
Rusiya informasiya agentliyi “RİA Novosti” xəbər yayıb ki, qondarma rejimin “parlamenti” qanunvericiliyə müvafiq təklifi artıq hazırlayıb. Dağlıq Qarabağda meydan sulayan separatçılar rus dilinə rəsmi status verilməsini onunla izah ediblər ki, Rusiya “sülhməramlıları” Qarabağda uzun müddət qalacaqlar. Ona görə də sosial, tikinti, səhiyyə, müdafiə və s. məsələləri həll etmək üçün rus dilinə rəsmi dil statusu vermək istəyirlər.
İlham Əliyevin Rusiya ordusunu ölkəmizə qaytarmasının ağır nəticəsi budur. Buna görəmi camaatı gecə ilə küçələrə töküb rus ordusunun ölkəmizə qayıdışını bayram etdirirdiz? Bəs deyirdiz, Azərbaycanın ərazi bütövlüyü tam təmin olunub? Erməni və rus dillərinin rəsmi dil elan olunduğu ərazilər Azərbaycan ərazisi deyil?
Dağlıq Qarabağda Rusiya nəzarəti gücləndikcə, paralel olaraq savaşda xalqımıza hərbi zəfər qazandırmış qazilərimizə, hərbçilərimizə haqsızlıq da artır. Təsadüfidirmi? Məncə, yox. Müdrik insanlar çoxdan deyib ki, öz ordusuna baxmayan xalqlar başqa – işğalçı orduları yedizdirməyə məhkumdur.