“Heykəl məhbusu” kimi tanınan Bayram Məmmədovun dostları və yaxınları onun ölümünə inanmaq istəmirlər. Sosial şəbəkə istifadəçiləri #bayrammammadov həştəqi altında onu “enerjili və potensiallı” biri kimi xatırlayırlar.
Bayram Məmmədovun İstanbulda meyiti tapılıb. Onun İstanbulda yaşayan dostları hadisənin təfərrüfatını, “intihar və ya qəsd olduğunu öyrənməyə çalışdıqlarını” bildiriblər.
“Azərbaycana qayıtmaq, gənclər üçün iş görmək,istəyirdi”
İstanbulda yaşayan, əvvəllər siyasi məhbus kimi tanınmış Elgiz Qəhrəman deyir ki, Bayram Məmmədovu 5 ildir ki, tanıyıb.
O, Bayram Məmmədovla Türkiyədə sonuncu karantin günlərinədək tez-tez görüşdüyünü, son günlər isə telefonla əlaqə saxladığını söyləyir.
“Bayramla daha çox həbsxanada dostlaşmışdıq, ondan sonra da dostluğumuz davam edib. Bayram Avropada təhsil üçün hazırlaşırdı, ona görə də bir müddət sosial şəbəkələrdən uzaqlaşmışdı. Beynəlxalq əlaqələr ixtisası üzrə oxuyub Azərbaycana qayıtmaq, orada gənclər üçün iş görmək, nələrisə dəyişmək istəyirdi. Həmişə deyirdi ki, özümü inkişaf etdirib qayıdacağam.”
“Bayramı intihara meyilli insan kimi görmürəm”
İctimai fəal Ülvi Həsənli Bayram Məmmədovla dostluğunun həm onun həbsindən əvvəl, həm də sonra yaxın olduğunu söyləyir.
O, dostunu “təmkinli və səbirli insan” kimi xatırlayır.
Ülvi Həsənli Bayram Məmmədovun gələcəklə bağlı planlarının olduğunu, Böyük Britaniyada təhsil almaq istədiyini sadalayır.
“Xaricdə təhsil almaq istəyirdi. Səhv etmirəmsə Böyük Britaniyada bir universitetə qəbul olunmuşdu. Bakıda olanda da təhsili üçün hazırlaşırdı. Dostlarına deyirdi ki, təhsil alıb Azərbaycana qayıtmaq istəyir. Onun intiharı ilə bağlı düşünə bilmirəm. Türkiyədə Bayramla mütəmadi əlaqədə olan dostlar deyir ki, onun əhvalında hər hansı dəyişiklik yox idi, depressiyada deyildi. Ümumiyyətlə, Bayramı intihara meyilli insan kimi görmürəm. Hər şey ola bilər, amma mənim versiyalarım arasında inanmıram ki, olsun”.
“Həbsdə necə döyülməsi barədə yumorla danışırdı”
Müstəqil jurnalist Sevda Səmədova Bayram Məmmədovla sonuncu dəfə bir ay əvvəl görüşdüyünü deyir.
O, Bayram Məmmədovun təhsili üçün aktiv hazırlaşdığına görə, intihar ehtimalına inana bilmədiyini deyir.
“Londonda iki universitetə maraq göstərdiyindən danışırdı. İntiharının gözlənilən olması ilə bağlı deyilənlər ona görə təəccüblü gəlir ki, Bayram hətta gününün saatlarını belə plan üzrə bölüşdürüb ingilis dilini oxuyurdu, universitetə hazırlaşırdı. Payızda Londona getməyi düşünürdü.”
“Həbsxanadan çıxan bütün siyasi məhbuslar kimi bir az psixoloji problemləri qalırdı. Bəzən həddən artıq qapalı, bəzən həddən artıq şən, bəzən əksinə, aqressiv olurdu. Onu həbsdən əvvəl tanıyanlar deyirdi ki, belə deyildi, çox sadəlövh, uşaq kimi adam olub,” – o əlavə edib.
Sevda Səmədova onu da deyir ki, “İstanbulda görüşəndə əvvəl danışmadığı şeyləri, həbs ediləndə necə döyüldüyünü, harada, hansı şəkildə uzanıqlı formada qaldığını, niyə möhkəm döyüldüyünü yumora salaraq, gülə-gülə detallarla danışırdı. Bayram çox “açıq kitab” deyildi ki, tez tanıyasan, amma intiharla bağlı eşitməmişəm”.
“Həmişə deyirdi ki, yaxşı təhsil lazımdır”
Toğrul Vəliyev Bayram Məmmədovla onun həbsindən sonra tanıdığını, 2019-cu ildən daha çox dostlaşdığını deyir.
O söyləyir ki, Bayram Məmmədov “solçu” olduğu üçün onunla fikirləri “üst-üstə düşürdü”.
“Seçki vaxtı komanda qurub dəstək verən şəxslərdən biri idi. Onu çox iradəli və işində sonadək gedən bir insan kimi tanıyırdım. “Tanıyırdım” demək belə çox çətindir. Əsas istəyi o idi ki, təhsil alıb Azərbaycana qayıtsın və burada fəaliyyət göstərsin. Həmişə deyirdi ki, yaxşı təhsil lazımdır”.
“Bu ölüm ona heç yaraşmadı”
Müsavat partiyası və Milli Şuranın üzvü Tofiq Yaqublu deyir ki, Bayram Məmmədovu “tarixi şəxsiyyət” hesab edir.
“Bu, xırda bir cəsarət deyildi, əqidə, inam, ideologiya ilə bağlı idi. Hər kəs belə bir qərar verə bilməzdi ki, Heydər Əliyevin doğum günündə onun oğlunun prezidentlik etdiyi ölkədə, düz şəhərin mərkəzində bir nömrəli abidənin üzərinə o cür haqlı fikirləri yazmaq və ondan sonra onların başına nə gələcəyini bilə-bilə o addımı atmaq böyük iradədən və ideoloji əminlikdən irəli gəlirdi. Buna görə, onu çox böyük qiymətləndirirəm. Heç bir siyasi partiyanın üzvü deyildi, fərdi düşüncələri var idi, fərdi hərəkət edirdi. Mənim üçün onun itkisi çox ağır oldu. Bu ölüm ona heç yaraşmadı.”
Tofiq Yaqublu Bayram Məmmədovun ölümündə hakmiyyəti günahkar sayır:
”Gedib, indi bilmək olmaz nə şəkildə ölüb, öldürülüb, intihar edib, bilə bilmərik. Amma aydın görünür ki, bu hakimiyyətin ucbatından istədiyi kimi öz həyatını qura bilməyib. Azərbaycan normal dövlət olsaydı mülki şəraitin verdiyi imkanlardan istifadə edərək öz həyatını qurardı. Onun Türkiyəyə getməsi artıq məcburi addım olub, ona görə də bu hakimiyyətin onun ölümündə siyasi məsuliyyəti var”.
Azərbaycan hakimiyyəti və hüquq-mühafizə orqanları ölkədə “siyasi məhbus” olması və işgəncə iddialarını təkzib edir.
Bayram Məmmədov “Heykəl məhbusu” kimi tanınıb və 2019-cu ilin martında Novruz bayramı qabağı İlham Əliyevin imzaladığı əfv sərəncamı əsasında azadlığa çıxıb.
O, 2016-cı ildə siyasi fəal Qiyas İbrahimovla birlikdə, mərhum Prezident Heydər Əliyevin heykəlinə “Qul bayramınız mübarək” şüarı yazdıqdan sonra həbs edilib.
Ona narkotik dövriyyəsi ilə bağlı maddə üzrə ittiham elan edilib 10 il həbs cəzası verilib.
Bayram Məmmədov rəsmi ittihamı rədd edirdi.
Bbc Azəri