Milli Şuranın Koordinasiya Mərkəzinin üzvü Gültəkin Hacıbəyli
Türkiyə niyə azərbaycanlı müxaliflərin kabusuna çevrilib?!
2013-cü ilin may ayının 13-də mənə qarşı Azərbaycanda və yəqin ki, dünyanın heç bir ölkəsində rast gəlinməyən bir qarayaxma kampaniyası başladıldı.
Öncə Eynulla Fətullayevin saytında barəmdə iyrənc, əxlaqsız, təhqir və böhtan dolu yazılar yazıldı. Ardınca o zaman PA-nın şöbə müdiri olan Əli Həsənov ailəsinin şəxsi mülkiyyətində olan Mətbuat Mərkəzində televiziya kanalları da daxil onlarla KİV-inin iştirakı ilə mətbuat konfransı keçirildi.
10 il öncə (2003-2004) cəmi bir il ailəli olduğum və məndən sonra 7-8 qadınla rəsmi və qeyri-rəsmi nikah münasibətlərində olmuş şəxsin əlinə yazılı mətn verib mənim haqqımda hədyanlar dedirtdilər. Təsəvvür edin ki, mən AR Cinayət Məcəlləsində ağır cinayət kimi təsbit olunan 7-8 əməli törətməkdə ittiham edilirdim. Özüm, ailəm haqqında ən aşağılayıcı təhqirlər və böhtanlar səsləndirilirdi.
Hər şey bir yana, mənim üzümə durduğu üçün sonradan prokurorluqda vəzifə alan, insan alverçisi olan bacısını həbsdən qurtaran, bu günlərdə isə oğlumun təhsili üçün nəzərdə tutduğum 50 min dolları saxta məhkəmə yolu ilə əlimdən alan o məxluqat məni pis ana olmaqda ittiham edir və yeganə oğlumu əlimdən almaqla hədələyirdi.
Bir qadın və xüsusilə də, ana üçün bunun nə demək olduğunu təsəvvür etmək belə çətindir.
Oğlumun cəmi 9 yaşı vardı. 9 ildə həmin şəxsi bir dəfə görməmişdi, məktəbə gedirdi, çevrəsi vardı, bu rüsvayçılığı isə bütün ölkə öyrənmişdi. Mən bir yana, 9 yaşlı uşağın anasından ayrılaraq heç vaxt üzünü belə görmədiyi, tanımadığı birinə veriləcəyini düşünərkən yaşadığı qorxunu təsəvvür edin… Bunlara dözmək üçün dağ olmalısan…
Və bu zaman Türkiyədən dostlar dövriyyəyə girirlər. Tanıdığım və heç tanımadığım çoxsaylı insanlar tərəfindən Türkiyəyə köçməklə və ya heç olmasa müvəqqəti yaşamaqla bağlı dəvətlər, vəzifə təklifləri alıram. Tanımadığım bir vali gecə saat 3-dək israrla zəng edib məni Türkiyəyə dəvət edir. Sonda mənə məcburən “bizdə saat gecə 3-dür, sizcə bir bayana belə gec telefon açmaq uyğundurmu?” dedirdəndən sonra məni rahat buraxır.
Təbii ki, Türkiyədən dostlarımın çoxu səmimi olaraq mənə görə narahatlıq keçirir, mənə dəstək olmaq istəyirdilər. Ancaq onlarla ünsiyyət zamanı bunu da öyrənə bildim ki, onlara Bakıdan bəzi ortaq “dostlarımız” telefon açaraq mənim durumumun çox ağır olduğunu, “bütün ölkədə biabır” olduğumu, Azərbaycanda qalsam intihar edə biləcəyimi))) deyərək çıxış yolu kimi təcili olaraq Türkiyəyə getməli olduğumu göstəriblər.
Mən bütün təkliflərə israrla yox dedikdən sonra vaxtilə yaxın olduğum, əslində isə Ramiz Mehdiyevin mənə agent kimi təhkim etdiyi bir qadın millət vəkili mənə hörməti olan bir jurnalisti çağırıb deyir ki, Gültəkin xanım İlham Əliyevə qarşı getməklə çox böyük səhv etdi, onu istənilən halda məhv edəcəklər, indi də ona qarşı ikinci mətbuat konfransı keçiriləcək. Yaxşısı budur ki, çıxsın Türkiyəyə getsin, canını xilas etsin.
Həmin jurnalist qorxudan bənizi ağarmış şəkildə bunları mənə danışanda dedim ki, istəyir iki yox, on iki mətbuat konfransı keçirsinlər, özlərini rüsvay edirlər, millət üzlərinə tüpürür. Mənim alnım açıq, üzüm ağdır. Türkiyəyə də özləri getsinlər, hamısının orada biznesi, əmlakı, villası var. Mənim evim Bakıdadır və heç yerə getmirəm.
Mən şəxsimə qarşı hazırlanan planları anladığım üçün o zamandan bəri Türkiyəyə bir dəfə də olsun ayaq basmamışam. Türkiyə mənim canımdır, Azərbaycanı sevdiyim qədər sevirəm Türkiyəni, uf demədən canımı verərəm, ancaq getmək niyyətim yoxdur. Çünki Sevinc Babayevanın başına gələnləri gördüm. Rauf Mirqədirov və Hüseyn Abdullayevin yaşadıqlarına şahid oldum. Çünki SOCAR-ın Maltada nə etdiyini bilə-bilə Türkiyədəki imkanları ilə, PKK çetesinin dəstəyilə nə edə biləcəyini təxmin edirəm.
Bayramın ölümü ilə bağlı “şəpit” versiyası o qədər gülüncdür ki, onu yalnız ermənilərin Rusiyadan, “tolkuçkadan” “İskəndər-M” alıb, çemodanda gizlədib gizlincə Ermənistana keçirmələri nağılı ilə müqayisə etmək olar. Bu nağıllara mənim 11 yaşlı bacım oğlu da inanmaz…
Biz Almaniyada parlament, Maltada hökumət böhranı yaradan, Gürcüstanın imicini Avropada yerlə bir edən qorxunc bir mafiya ilə üz-üzəyik.
Bunu bir an belə unutmamalıyıq.
Allah Bayramın qatillərinə lənət eləsin!