İctimai fəal Bəxtiyar Hacıyev
Ermənistanın sabiq prezidenti Serj Sarkisyan Nikol Paşinyanın bir gizli səs yazısını yayıb. Səs yazısında Paşinyan danışır ki, 12 may 2018-ci ildə Soçidə Putin, Nazarbayev, Lukaşenko ona yaxınlaşıblar. Onlar deyiblər ki, Əliyev başa düşür ki, Dağlıq Qarabağ bir daha Azərbaycanın tərkibində olmayacaq, sənin əlində tarixi şans var, xalq səni dəstəkləyir, Lavrov planı ilə razılaş, Qarabağ ətrafındakı rayonları boşalt, ora rus sülhməramlıları yerləşdirək, oradan milçək də uça bilməyəcək, statusu da sonra müzakirə edərik. Paşinyan deyib ki, bunu sənədləşdirək, yazılı bir şey olsa, gedib xalqımla məsləhətləşərəm.
Bundan əvvəl də 17 noyabr 2020-də Putin müsahibəsində demişdi ki, İlham Əliyevi Şuşanın ermənilərdə qalmaq şərti ilə ora rus sülhməramlılarının yeridilməsinə razı salıb, amma Əliyev qaçqınların qayıtmasını şərt kimi qoyub. Bu danışıq isə müharibənin ortasında, 19-20 oktyabrda olub. Buradan da görünür ki, müharibənin hədəfi Dağlıq Qarabağın bütün ərazilərinin azad olunması yox, ətraf rayonların azad edilməsi olub.
2020-ci ilin dekabrında isə Lukaşenko ilə Serj Sarkisyanın köhnə gizli səs yazılarından biri yayılmışdı. Orada da Lukaşenko Sarkisyana deyir ki, Əliyev ətraf rayonların boşaldılması üçün sənə 5 milyard dollar təklif edir, razılaş, ora sülhməramlı yeridək, Əliyev ondan sonra “Dağlıq Qarabağa” qarşı müharibəyə başlaya bilməz, sülhməramlılar buna qarant olacaqlar.
Əliyev “cəhənnəmə getdi status, gorbagor oldu status” deyir. Ancaq danışıqların pərdə arxasındakı şəxslərin səsləri, Lavrovun son “Qarabağın statusu hələ müəyyən edilməlidir” bəyanatı, Xankəndi mərkəzində Arayik Arutyunyan kimi müharibə cinayətkarının oturub, İrəvandan dini liderləri, diplomatları, hərbçiləri qəbul etməsi, qondarma bayraq altında Rusiya sülhməramlılarının komandanı ilə qucaqlaşması, Tural Gəncəliyevin Bakıda oturub Xankəndi ofisi üçün yer axtarması, İlham Əliyevin ora gedə bilməməsi göstərir ki, Əliyev bağlı qapılar arxasında Qarabağın itirilməsi ilə razılaşmış ola bilər.
Əliyev susduqca, Xankəndi, Xocalı, Xocavəndin taleyi ilə bağlı Azərbaycan xalqı ilə açıq danışmadıqca, Xankəndi mərkəzində Azərbaycan bayrağının nə vaxt dalğalanacağını açıqlamadıqca bunu belə qəbul etməliyik. Həm ata Əliyev, həm İlham Əliyev çıxışlarında ətraf rayonların adını tək-tək çəkirlər, “Qubadlı Azərbaycandır, Zəngilan Azərbaycandır, Füzuli Azərbaycandır” və s. desələr də, bir dəfə də olsun “Xankəndi Azərbaycandır” deməyiblər. Ümumi “Qarabağ Azərbaycandır” deməklə söhbəti bağlayıblar.
Əgər Putin “rus sülhməramlılarının olduğu yerdə milçək uçmasına belə icazə vermərik” dediyi qüvvələrin olduqları yerdə yeni müharibə mümkün deyilsə, deməli, Dağlıq Qarabağın taleyi siyasi və diplomatik müstəvidə razılaşdırılıb. Razılaşdırılıbsa, Əliyev bir suala cavab verməlidir:
“Xankəndinə nə vaxt gedəcək?”
Getməyəcəksə, hakimiyyətdə olduğu müddətdə şəhidlərimizin qanı bahasına azad edilmiş torpaqlar üzərindən reklam edib, bu problemi gələcək nəsillər üçün miras qoyub gedəcək?