İctimai fəal Bəxtiyar Hacıyev
Bunu da yazım, bu günlük bu mövzunu bağlayaq. Mənim İlham Əliyevin Qarabağ danışıqları barədə, Xankəndinin taleyi barədə yazdığım postlar həm bir qrup tərəfindən maraqla, həm də bir qrup tərəfindən müqavimətlə qarşılanır. Mən də kütlənin eşitmək istədiyi “Ramin Bayramlı, toylara icazə ver! Azərbaycanlıların çoxalmasının qarşısını almaq istəyirsən?” kimi çıxışlar etsəydim, müqavimət olmazdı.
Amma Qarabağ mövzusu həssas mövzudur, müqavimətin olması normaldır. İnsanlar hakimiyyətin Xankəndinin taleyini bizim maraqlara zidd buraxmaq ehtimalını asanlıqla yaxın buraxa bilmirlər. Təbii olaraq ilk reaksiya “buna da şükür, keçən il Şuşa xəyal idi” kimi reaksiyalar gəlir. Ancaq ağıllı insanlar nə reaksiya verməklərindən, bu fikirləri kimin deməsindən asılı olmayaraq bir müddət sonra düşünməyə başlayırlar, məsələyə tənqidi pəncərədən baxıb, fikirləri həzm edirlər. İctimai rəy də beləcə formalaşır.
Azərbaycanın ərazi bütövlüyü hakimiyyətin iradəsi ilə olur, yoxsa ictimai rəylə? Bir misal üzərində izah edim:
Paşinyan Şuşaya gəlib Cıdır düzündə yallı gedəndə, Xocalı hava limanının açılışı olanda, Xankəndi mərkəzində seçkilər keçiriləndə fəal vətəndaşlar Azərbaycan hakimiyyətini sosial şəbəkələrdə tənqid etməyəndə ictimai rəy formalaşmayası idi, hakimiyyət də ağrımayan başını ağrıtmayacaqdı. O zaman bu xəbərləri erməni mənbələr yayırdılar, Azərbaycanda hakimiyyət mediası susurdu, ictimai fəallar etiraz edirdi.
İctimai rəy formalaşmayanda general-mayor Polad Həşimov şəhid olanda 15 iyul gecəsi insanlar sərt karantin rejiminə baxmayaraq küçələrə çıxıb “ya Qarabağ, ya ölüm”, “Qarabağa azadlıq” tələbi ilə mitinq etməyəcəkdilər.
Həmin mitinqdən sonra İlham Əliyev nə demişdi? Demişdi biz ermənilərin layiqli cavabını verdik, alınlarının ortasından zərbə vurduq. Demişdi ki, könüllü döyüşmək üçün cəmi 150 nəfər yazılıb, amma meydanda minlərə insan vardı.
Onun bu çıxışından hiddətlənən bir çox insan, hətta nazir övladları da gedib könüllü yazıldılar, tələblərin ardı-arası kəsilmədi. İlham Əliyev anladı ki, neft qiymətlərinin dibə endiyi, pandemiyanın zərərlərinin onun reytinqini aşağı saldığı bir vaxtda insanlar Qarabağa azadlıq tələbi ilə aksiya keçirirlərsə, buna getməyə məcburdur. Sonradan Türkiyədən mütəxəsislər gəldilər, ordumuzun problemlərini öyrəndilər, təlimlər keçdilər və 27 sentyabrda müharibə başladı.
15 iyul öncəsi tənqidlər, 15 iyul gecəsi olan on minlərlə insanın aksiyası olmasaydı, bəlkə də hakimiyyət yenə də xalqın başının altına yastıq qoyacaqdı.
Ona görə də bu gün Xankəndi barədə açıq tələblərin səslənməsini qəribsəmək lazım deyil. Şuşada Paşinyanın yallı getməsinə etiraz edəndə də, 15 iyul gecəsi “Qarabağa azadlıq” deyiləndə də “ortalığı qarışdırmayın” deyənlər çıxırdı.
Şuşada Paşinyanın etdiklərinə etiraz Şuşanın azad edilməsi ilə nəticələndi. Cəmiyyət olaraq Xankəndində Arayik Arutyunyanın və digərlərinin etdiklərini də gündəmə gətirib, Xankəndi barədə hakimiyyətin addım atmasına nail olmalıyıq. Əvvəlcə sosial şəbəkələrdə bəziləri etiraz edəcək, müqavimət göstərəcək. Sonra hakimiyyət “təxribatçı” adlandıracaq, təzyiq edəcək. Amma sonda ictimai rəy haqlı sualları həzm edəcək və bunu tələb edəcək.
Yoxsa, “prezidentimiz hər şeyi yaxşı bilir, Ramin Bayramlı toylara icazə vermir” kimi xətt seçmək ən asan məsələdir. Bunu edənlər az deyil. Baş dinc olur, etiraz edən yox, razılaşmayan yox. Onu etməyimiz isə xalqın başının altına yastıq qoymaq olacaq.
Biz “Xankəndində Azərbaycan bayrağını nə vaxt qaldıracaqsınız, cənab Əliyev?” soruşacağıq, bu tələb kütləviləşəcək, bir gün bu baş verəcək, Əliyevin zamanında baş versə, “mən Xankəndini azad etdim” deyəcək, bu gün onu dəstəkləyənlər də “gördünüz, hər şeyin öz zamanı var, siz isə boş yerə danışırdınız” deyəcəklər. Anlamayacaqlar ki, tənqid və açıq tələb olmayan yerdə ətalət, status-kvo, “business as usual” olur, dəyişiklik, iş, nəticə, nailiyyət, uğur olmur.