Milli Şuranın Koordinasiya Mərkəzinin üzvü Rafiq Manaflı
Gözlədiyim kimi, “Paşinyanı iti qovan kimi” qovandan Paşinyanın yayılmış səs yazısına heç bir reaksiya gəlmədi. Ona görə gözləyirdim ki, Paşinyanın dedikləri ilə İlham Əliyevin özünün açıqlamaları arasında heç bir ziddiyyət yoxdur. İ.Əliyev Qarabağ deyəndə nə vaxt Xankəndinin adını çəkib ki. Əksinə, Xankəndini nəzərdə yutaraq “biz də onların torpaqlarını vura bilərdik, vurmadıq” deyib.
Putin, Lukaşenko və Nazarbayevin “İ.Əliyev Dağlıq Qarabağın itirilməsini qəbul edib” deməsinə heç bir şübhəm yoxdur. Hara qədər gedə biləcəyinin də Əliyevin qabaqcadan öz suvereni ilə razılaşdırdığı şübhəsizdir. Yoxsa müharibənin ilk həftələrindən sonra düşmənin müqavimətini, Şuşanın fəthindən sonra bütün əzmini qıran ordunu niyə dayandırmalı idi? Niyə ildırım sürəti ilə hərəkət edən ordumuza Laçın şəhərini azad etməyə icazə verilmədi, Xankəndinə girmiş hissələrimiz geri qaytarıldı, Xocavənd boşaldıldı?
Dağlıq Qarabağ hansı adlasa verilməli idi və guya erməniyə verilməyib deyə ikinci dövləti bir cinayətə, rus ordusunun ölkəmizə soxulmasına imza atıldı.
Şuşanın işğaldan azad edilməsinin bu qədər qabardılması, Şuşa ətrafında bu qədər səs-küy salmaq, Şuşadan bir qiblə düzəltmək bir məqsədə xidmət edir edir: diqqəti Xankəndidən yayındırıb Şuşada cəmləmək. Biz də qoşulmuşuq İlham Əliyevə, onun zurnasına züy tuturuq.
Şuşa əlbəttə ki, bir çox yerlər kimi tariximizin bir parçasıdır, amma vətən torpağı kimi, şəxsən mənim üçün Kəlbəcərdən, Laçın, Qubadlı, Zəngilandan heç nə ilə fərqlənmir. Tarixi, mədəni irs isə hakim ailə üçün boş şeydir. Şuşada bu soxasoxda ilk əvvəl “Bravo” marketinin açılması ailənin canavar acgözlüyünün hədd-hüdud bilməməsinin göstəricisidir, elə Bakıda tarixiliyindən əsər-əlamət qoyulmamış “İçərişəhər” kompleksinin göstərdiyi kimi.
“Sülhməramlı” adı ilə ölkəmizə soxulmuş rus ordusu yuxarı Qarabağda rus-erməni dövləti qurur. Bu ordunun hər bir hərəkəti məqsədyönlü, qəsdlə bütün xalqımızın mənliyini təhqir edir, qürurunu sındırır, bircə İlham Əliyevə toxunmur.
Dünyanın tanıyıb qəbul etdiyi ərazi bütövlüyümüzə qəsd edən, onun 4000 kv. km-lik bir parçasını rus bayrağı altında erməniyə güzəştə gedən, bağışlayan oğlan, Rusiya imperiyasının içindən 114 min kv. km ərazidə sərhəd cızıb yoxdan bir dövlət qurub da onu həmin sərhədlər daxilində dünyaya tanıtdıran kişilərə İrəvanı bağışlaya bilmir. Necə atasının ləğv edib dağıtdığı ləl-cəvahirat fondunu, özünün vaxtında sökülüb metalloma satılmış tramvay xəttlərini Xalq Cəbhəsinə “bağışlamır”.
Amma hələ baxarıq, görək bu xalq sizə nələri bağışlamayacaq.