Milli Şuranın sədri professor Cəmil Həsənli
Gələn aydan Azərbaycanda qadınların pensiya yaşı daha 6 ay artırılır. 2027-ci ilə qədər bu artım hər il davam edəcək və həmin il qadınlar 65 yaşına çatdıqda pensiyaya çıxa biləcəklər. 2015-ci ildə qadınların pensiya yaşını 60-a çatdırdılar. İndi də mərhələ-mərhələ, hər il 6 ay qaldırmaqla 65-ə çatdırırlar. İlham Əliyevin göstərişi ilə 2017-ci ilin iyulun 1-dən etibarən pensiya yaşının hər il mərhələli şəkildə 6 ay artırılması haqqında qərar qəbul edilib. DSK-nin məlumatına görə həmin eybəcər dəyişiklikdən sonra ölkədə əmək pensiyası alanların sayı 100 min nəfər azalıb. Bütün oyun buna görədir.
2017-ci il dəyişikliliyi ilə kişlərin pensiya yaşı bu il 65-ə çatdırılıb. Rusiyada isə hələ 2028-2035-ci illər arasında kişilərin pensiya yaşı 65-ə çatdırılacaq. Qadınlara münasibətdə vəziyyət daha acınacaqlıdır. Azərbaycan qadınlarının pensiya yaş həddi daha 6 il davam edib, yalnız 2027-ci ildə 65 yaşa çatacaq. İlham Əliyev rejimi gender bərabərliyinin maraqlı bir simbiozunu tapıb. Əliyevin idarəçiliyi dövründə əvvəl qadınların pensiya yaşı 55-dən 60 yaşa qaldırıldı, 2017-ci ildən isə 60-dan 65-ə doğru “yüksəliş” xətti götürdü.
Hazırda qadınların pensiya almaq hüququ 62 yaşdan başlanır. Əmək və Əhalinin Sosial Müdafiəsi Nazirliyi bunu bütün dünyada pensiya yaşının qaldırıması ilə izah edir. Amma bu belə deyil. Məsələn, sosial siyasət baxımından Azərbaycana yaxın olan Rusiyanı götürək. Bu il Rusiya qadınları 56,5 yaşa çatdıqda pensiyaya çıxmaq hüququ əldə edir, Azərbaycan qadınları isə 62 yaşa çatdıqda. Göründüyü kimi rus qadınlarının pensiya yaşı ilə Azərbaycan qadınlarının pensiya yaşı arasında 5,5 il fərq var. Bu halda nazirlik hansı dünya təcrübəsinə istinad edir?
Bütün artımlardan sonra 2028-2030-cu illər arası Rusiyada qadınların pensiya yaşı 60-a çatdırılacaq və bu son hədd olacaq, lakin Azərbaycan qadını 2027-ci ildən 65 yaşında pensiyaya çıxa biləcək. Əgər buna da bir tələ qurmasalar, əgər işsizlik girdabında boğulan Azərbaycan qadını pensiya hüququ əldə edə bilsə. Hələ pensiyanın həcmi qalsın bir tərəfə, pensiyaya çıxmaq hüququ baxımından rus qadını ilə Azərbaycan qadını arasında 5 il fərq yaranır. Görən Azərbaycan qadınının günahı nədir? Məsələn, Sosial Nazirliyimiz bunu nəylə izah edir? Bəs İlham Əliyev deyirdi ki, Azərbaycan sosial dövlətdir. Bu sosial dövlətdə əvvəlcə uşaq pulunu kəsdilər, indi isə uşaqların analarının ömründən kəsirlər. Bir zamalar deyəcəklər ki, Əliyevlərin sosial istibdadına qədər Azərbaycan qadınları 10 yaş tez, yəni 55 yaşında pensiyaya çıxa bilirdilər.