Rüfət Səfərov
Hörmətli hüquq müdafiəçiləri-Anar Məmmədli, Rəsul Cəfərov və “Vətəndaş” ictimai birliyinin sədri, QHT-lərə Dövlət Dəstəyi Agentliyinin Müşahidə Şurasının üzvü Günel Səfərova ABŞ dövlət katibinin Avropa və Avrasiya işləri üzrə köməkçisi cənab Filipp Rikerlə görüşüblər. Görüş, təbii ki, qeyri-hökumət təşkilatlarının və vətəndaş cəmiyyətinin təmsilçilərinin ölkədəki vəziyyət haqqında rəylərini öyrənmək məqsədilə təşkil edilib.
Azad və sosial media üzərindən əldə etdiyim məlumatlara əsasən hörmətli həmkarlarım insan hüquqlarının gerçək durumu, vətəndaş cəmiyyətinin qarşısındakı əngəllər, hüquq-müdafiə təşkilatlarının fəaliyyətinin buxovlanması, müharibədən sonrakı dövrdə azərbaycanlıların və ermənilərin birgə yaşayış perspektivləri barədə söhbət açıblar, ələlxüsus, siyasi məhbusların azad edilməsində əməkdaşlıq təklifi irəli sürüblər.
Minnətdarlığımı bildirirəm.
Bununla belə, bir qədər əvvəl hörmətli jurnalist Kamran Mahmudovun aparıcılıq etdiyi “Çətin sual” verilişində hörmətli Günel Səfərovanın nitqini dinlədim, açığı, məyus oldum, qərara gəldim ki, “Çətin sual”dan sonra açıq suallarımı ünvanlayım.
Söhbət nədən gedir?
Hörmətli Günel xanım verilişdə hörmətli Kamran bəyin “cənab Filipp Rikerlə görüş zamanı “Tərtər işi” ilə bağlı məsələ qaldırdınızmı?” məzmunlu sualına “Xeyr, “Tərtər işi” bizim daxili, dövlətlə bağlı işimizdir. Birgə burada həll etməliyik. Açığı, sizə deyəcəm ki, hamı kimi mən də “Tərtər işi” ilə bağlı yayılan vidoalarla, ayrı-ayrı insanların ötürdükləri məlumatlarla tanışam. Hökumət bununla bağlı məlumat verməyib, istintaq gedirmi, nə yerdədir, bunu belə bilmirik… Həm də mən demirəm ki, bunu beynəlxalq auditoriya qarşısında müzakirəyə çıxarmayaq, sadəcə, məsələlər o qədər “kustar” formadadır ki… Və biz o qədər məlumatsızıq ki…” kimi cavablar verib. (Əgər kimsə hörmətli Günel xanımın sözügedən müsahibəsi ilə tam tanış olmaq istəsə, linki rəy bölməsində yerləşdirirəm, buyurub, baxa bilər.)
Öncədən qeyd edirəm ki, hörmətli Günel xanımla BİZ Vətəndaş Təşəbbüsləri Platformasında müəyyən əməkdaşlığımız baş tutub, vaxtaşırı birgə canlı yayında iştirak edib, gündəmin aktual mövzularını müzakirə etmişik, mükalimələrimiz olub ki, bundan da məmnunam. Çünki Günel xanım kimi bilikli və təcübəli hüquqşünasla eyni ortamı bölüşməyi əhəmiyyətli, xüsusilə də ictimai faydalı hesab etmişəm.
Lakin…
Hörmətli Günel xanım, “Tərtər işi”ni, daha doğrusu, qətliamı, neçə-neçə hərbçinin işgəncə maşınından keçirilərək edam olunmalarını, uzun illərə məhkum edilmələrini necə Azərbaycanın daxili işi sayırsınız, Siz Allah? Onlarla zərərçəkmişin kamera önündə qan donduran, tükürpədən etiraflarını, öldürülmüş hərbçilərin ailə üzvlərinin sosial şəbəkələrdə, azad mediada fəryadlarını, ah-nalələrini izləyəndən sonra, Siz Allah, necə diliniz gəlir ki, deyəsiniz: “Bu, Azərbaycanın daxili işidir”.
Hörmətli Günel xanım, əminəm, əsl cinayətkarların kimliyi Sizə aydındır, hökumətin siyasi, hüquqi və hərbi qanadında təmsil olunanların cəza təhdidi altında qadağan olunmuş ictimai təhlükəli əməlləri-hərəkət və ya hərəkətsizlikləri, yüksək rütbəli təqsirli subyektlərin dairəsi Sizə bəllidir. İnanıram: onu da bilirsiniz ki, Tərtər qətliamını məhz bu hökumət törədib. Belədə cinayətkar hökumətdən “Tərtər işi” ilə bağlı nə kimi məlumat gözləyirsiniz, Siz Allah? Hərçənd, bəziləri məlumat da verib: “nağıdır”, “cəfəngiyyatdır, “hoqqabazılıqdır”.
Hörmətli Günel xanım, “Tərtər işi” ilə bağlı BMT-nin İşgəncələr Əleyhinə Komitəsinin bəyanatı Sizin üçün Azərbaycan hökumətinin mövqeyinin hüquqi gücündən əskik deyilsə, bəzi çıxarışları diqqətinizə çatdırıram:
- dərhal işgəncələr və məhbusların ölümü araşdırılsın, günahkarlar məsuliyyətə cəlb edilsin;
- qurbanlara reabilitasiya, yardım təmin edilsin;
- onlara və ailələrinə dəyən zərəri ödənilsin, həmçinin cəsədlərin əldə edilməsinə imkan yaradılsın;
- bu iş üzrə həbs edilmiş şəxslərin yerləşdiyi yeri və sayı açıqlasın;
- işgəncə praktikasına son qoymaqla Azərbaycanda bu kimi halların aradan qaldırılması üçün tədbirlər görülsün.
Hörmətli Günel xanım, bəyanatda “Tərtər işi” üzrə işgəncələr nəticəsində ölənlərin adları da qeyd olunub:
- Mehman Hüseynov – mayın 7-də saxlanılıb, cəsəd 16 may 2017-ci ildə dəfn edilib;
- Səxavət Bünyadov – mayın 7-də saxlanılıb, cəsəd 17 may 2017-ci ildə dəfn edilib;
- Saleh Qafarov – mayın 4-də saxlanılıb, cəsəd 14 may 2017-ci ildə dəfn edilib;
- Elçin Quliyev – mayın 11-də saxlanılıb, cəsəd 18 may 2017-ci ildə dəfn edilib;
- Təmkin Nizamioğlu- mayın 12-də saxlanılıb, cəsəd 21 may 2017-ci ildə dəfn edilib;
- Dayandur Əzizli – mayın 12-də həbs edilib, cəsəd 20 iyul 2017-ci ildə dəfn edilib;
- Süleyman Kazımov – mayın 4-də saxlanılıb, cəsəd 7 may 2017-ci ildə dəfn edilib;
- Elxan Ağazadə -mayın 1-də saxlanılıb, cəsəd 10 may 2017-ci ildə dəfn edilib;
- Elçin Mirzəliyev – mayın 7-də saxlanılıb, cəsəd 25 may 2017-ci ildə dəfn edilib.
- Ruslan Ocaqverdiyev – 16 may 2017-ci il səhər saxlanılıb, cəsəd isə həmin gün axşam ailəsinə təhvil verilib.
- Adil Sabirli – 5 may 2017-ci il tarixində ölənədək döyülüb.
Hörmətli, Günel xanım, “Tərətər” işi üzrə hansı işgəncələrin tətbiq edildiyini dövlət başçısı İlham Əliyevin facebook səhifəsini etiketləyərək tirajlamışdım. Düşünürəm ki, burada da yaymaqda, Sizin də yüksək diqqətinizə çatdırmaqda fayda var:
- əl və ayaq barmaqlarının dırnaqları çıxarılıb;
- çıxarılan yerdən elektrik cərəyanı keçirilib;
- əllərindən asıb, ayaqlarına elektrik cərəyanı ötürülüb;
- damaq, diş və qulaqlara elektrik cərəyanı verilib;
- lüt bədənə dayanmadan su tökərək yaş bədənə elektrik cərəyanı verilib;
- dəmir çarpayı və sulu döşəkdə lüt uzandıraraq bədənə elektrik cərəyanı verilib;
- klyonka və plastik yandıraraq kürəyə basılıb;
- yanan yerə duz, istiot, araq tökülüb;
- bütün dişlər tikintidə istifadə edilən kəlbətinlə çıxarılıb;
- cinsiyyət orqanı məngənə ilə sıxılıb;
-cinsiyyət orqanına elektrik cərəyanı verilib;
-arxa keçəcəyə armatur yeridilib;
-ağızdan qulaq dibinədək cırılıb, sonrasa əli-qolu bağlı yuxarı qatdan yerə atılıb;
-ata ilə oğulu bir otağa salıblar, oğulu məcbur ediblər ki, atanın başına sidik ifraz etsin;
-“vətənə xəyanət edənlərin” həyat yoldaşları, hətta hamilə xanımlar gətirilib, ərlərinəsə deyilib ki: ya biz deyən ifadələri verəcəksən, ya da arvadlarınıza qarşı zorakılıq tətbiq ediləcək.
Hörmətli, Günel xanım, yuxarıda göstərilənlər Azərbaycanın daxili işidir, eləmi? Ölkənin daxilində yüzlərlə hərbçinin işgəncə maşınından keçirilməsi, hətta erməni əsirliyində göstərilməyən işgəncə növlərinin tətbiq edilməsi, ən azı 11 əsgər və zabitimizin edam edilməsi Azərbaycanın daxili işidir, eləmi?
Hörmətli Günel xanım, təcrübəli hüquqşünas kimi yüksək səviyyədə mənimsədiyiniz Azərbaycan Konstitusiyası, İnsan hüquqlarının və əsas azadlıqların müdafiəsi haqqında Konvensiya, İnsan hüquqları haqqında Ümumi Bəyannamə, Mülki və siyasi hüquqlar haqqında Beynəlxalq Pakt nəzərdə tutur ki, ölkənin daxilində sözün müstəqim anlamında insanın özü və hüquqları yerlə sürünsün və bu, daxili iş hesab edilsin, eləmi?
Hörmətli Günel xanım, son olaraq, yaranmış fürsəti fövtə verməyib, QHT-lərə Dövlət Dəstəyi Agentliyinin Müşahidə Şurasının üzvü təyin olunmağınız münasibətilə Sizi təbrik edirəm, fəaliyyətinizdə uğurlar diləyirəm və ilk növbədə özümə, sonrasa sizə bir daha xatırladıram:
VİCDAN ərəb sözüdür, qəlblə hiss etmə, dəruni duyğu, insaf, ədalət duyğusu, mənəvi məsuliyyət hissi, sufilərə görə-daxili şüur və coşqunluq, qızğın şövq duyğusu anlamına gəlir…
Hörmətli Günel xanım, ümid edirəm ki, səmimi və qərəzsiz qeydlərimdən sonra məni dostluqdan çıxarmayacaqsınız, qonşu kimi qarşılaşanda salamımı alacaqsınız…