AXCP Rəyasət Heyətinin üzvü Fuad Qəhrəmanlı
Dünən yenə Şəhid xəbəri aldıq.
Yadıma qalereyada saxladığım bu şəkil düşdü.
Bu şəkildə Şəhid olan əsgərlə Xarıbülbül bir araya gətirilib. Və bu birgəlilkdən də ölümün sirli məna çalarları ilə süslənmiş rəsmi, gözlə görünür əksi yaranıb.
Şəkildə Şəhidin baxışlarının ecazkar sirri, hikiməti insanı öz məchul mənası ilə sanki büyüləyir. Hər dəfə bu şəklə baxanda insan ömrünün bitişini son nəfəslə deyil, son baxışla, son nəzərlə olduğuna əmin oluram.
Bu nəzərlərərdə oxunan səssiz vida şərqisinin nisgilli musiqisini duymaq, qəlbin gözlərdə haray çəkən nakam sızıltısını hiss etmək, ölüm mələyinin addım səslərini eşitmək insan ruhunu sanki buza döndərib, damarlarda axan qanı dondurur.
Bu baxışların əzəməti, əlçatmaz möhtəşəmliyi, iki dünya arasındakı keçidin gizəmli yolunu əks etdirən sehri, büyüsü ölümü incəsənət səklində ifadə edən ilahi bir əsər, rəsm tablosu a çevirir sanki.
Bu tabloda həyatla vidalaşan baxışların dünya ilə vidalaşərkən son anda boynu bükük bir Xarıbülbülə dikilməsi, onu seyr edən insanın içində bütün varlığını qəhr edəcək bir kədər burulğanı yaradır. Bu zaman içimdən kimsənin duymayacağı bir səs mənə deyir ki, “ağla, ağlaya bildiyin qədər, ancaq göz yaşlarını yanağına deyil, içinə axıt ki, yanan qəlbinin içini qarsıb qovuran atəşini söndürə bilsin”.
Döyüşlçü ilə qənşər duran Xarıbülbül , son anında şəhid əsgəri tək buraxmayıb matəmli ana kimi boyununu bükərək onu son mənzilə yola salır. Əsgər də bir ana kimi matəmə batıb ona yas saxlayan bu gülün hüznünü xəyalındakı anasının dalğın, kədərli surəti kimi ağır bir sükutla seyr edir.
Bu səhnə nə qədər paradoksal görünsə də bu balaca, ürkək və küskün görünüşlü Xarıbülbülün qalibiyyət görüntüsüdür həm də. Çünki, bu baxışlarda müharibə vəhşətinin amansız qanunları ilə öldürən və ölən bir insanın qəlbinin dərinliklərində, ruhunun məchulluğunda gizlənmiş zərafət, kövrəklik, gözəllik qarşısındakı səsiz təslimiyyət duyğusu son anda – dünya ilə vida məqamında bu zərif gülün qarşısında səcdəyə qapılıb, məsum gözəlliyə ibadət edir.
Şəhidi bu dünyadan əbədiyyətə yola salan Xarıbülbül bəlkə də o anda öna dikilmiş Şəhid baxışları ilə kimsənin duymayacağı, hiss edə bilməyəcəyi bir danışıq içindədir. Nə şəhid əsgərin dili var, nə də ki, bu matəmli çiçəyin. Ancaq şəhid əsgərin dili yerinə danışan baxışları var və bu baxışlarda tədirginlik yerinə, açıq görülən bir aramlıq, məmnunluq onu göstərir ki, Şəhid öz həmsöhbətinin ona pıçıldadıqlarından məmnundur.
Kim bilir, bəlkə də Musa ilə Tur dağı vasitəsi ilə danışan Tanrı, əziz qıldığı Şəhidlər də bu gülün dili ilə danışır, ona varacağı yerin gözəlliyini anladır. Bu üzdəndir ki, ölümün pəncəsində dünyadan köçən əsgərin üzündə nə qorxu, nə də ki, bir təlaş var, əvəzində hikmətini dərk etməkdə, mənasına vaqif olmaqda aciz olduğumuz bir eşqi öz məmnun təmkini, hüzurlu ifadəsi ilə kimsənin eşidə bil ədiyi əbədiyyət nəğməsini gedəcəyi yerə götürməkdədir.