Hüquq müdafiəçisi Anar Məmmədli
Bu gün 30 avqust 1991-ci ildə Müstəqilliyin Bərpası üçün qəbul olunan ilk hüquqi-siyasi sənədin 30 yaşı tamam olur. Bu tarixi günün ərsəyə gəlməsində xidməti olanlara can sağlığı diləyir, vəfat edənlərin xatirəsinə ehtiramımı bildirirəm.
Ötən 30 ildə ölkə olaraq itirdiklərimiz oldquca çox, qazancımız isə çox cüzi olub. İtirdiyimiz torpaqların hələ də 3-4 faizi bu bölgəni öz “bağçası” sayan ölkənin nəzarətindədir.
İstiqlal və ərazi bütövlüyü uğrunda verdiyimiz qurbanlara görə keçmiş sovet məkanında bəlkə Ukraynadan geri qalarıq. Amma bütün qurbanlara rəğmən hələ də azad, demokratik və ədalətli cəmiyyətin həsrətindəyik.
Ölümündən cəmi bircə il öncə Rəsulzadə yazırdı ki, Azərbaycan istiqlalının bərpasından sonra atacağımız əsas addım seçkili demokratiyanı formalaşdırmaq olacaq. Onun inamı və arzusu hələ xalq olaraq bizim canımıza tam hopmayıb, ictimai dünyagörüşümüzə oturmayıb.
Yaşadığımız bölgədə supergüclərə qarşı müqavimət göstərmək üçün “yumşaq gücə” sahib olmalıyıq. Bu isə azadlıq, sosial ədalət və hüququn üstünlüyünə hörmətdən keçir. Məhz bu səbəbdən hakim siyasi rejimə hüquq və azadlıqlarımızı kobud şəkildə pozduğuna, korrupsiya və talançılıq siyasətinə görə müqavimət göstərməyən siyasətçilərin 4 il sonra Rusiyaya qarşı milli müqavimət təşkil edəcəyi absurd səslənir.
Qarabağda 3 min kv km-lik ərazidə sülhməramlı adı ilə Rusiya, ABŞ və ya Fransa əsgərinin yerləşməsinin indi heç bir önəmi yoxdur. Önəmli olan işğaldan azad edilmiş digər ərazilərin adil və hesabatlı şəkildə yenidən qurulması, məcburi köçkünlərin öz yurdlarına tezliklə qayıtması, etnik nifrətin tədricən aradan qalxmasıdı. Əgər yaxın 4 ildə bu yöndə ciddi uğurlar əldə olunmasa, ikinci Qarabağ savaşında əldə olunmuş mənəvi-psixoloji üstünlüyümüz itiriləcək.
Vətəpərvər və dürüst siyasətçilər ciddi şəkildə düşünməlidir ki, hakim siyasi qrup öz bərbat “tikinti-quruculuq” vərdişlərindən əl çəkməsə, növbəti 4 il münaqişənin həlli yönündə itirilmiş fürsətlər dönəmi olacaq. O zaman nəinki Rusiya və ya Ermənistan qarşısında, dəstək umduğumuz və ya dost saydığımız ölkələrin yanında da mövqeyimiz zəifləyəcək.