Milli Şuranın Koordinasiya Mərkəzinin üzvü Rafiq Manaflı
Avtokrat sistemlərdə ki, avtokratiyanın fundamenti seçki saxtakarlığında, insanların seçmək hüququndan məhrum edilməsindədir, seçki prosesinə nəzarət sistemin qorunmasının ən vacib elementidir.
Eləcə də əks tərəf üçün seçkilərin müşahidə missiyası demokratiya uğrunda avtoritarizmlə mübarizənin əsas cəbhələrindən biridir.
Biz ölkədə əliyevlər xanədanı qurulandan sonra çox seçkilərdə iştirak edib onların müşahidəçiliyini həyata keçirmişik. Dəfələrlə ölkənin baş seçki saxtakarı Məzahir Pənahovun təxminən 45-50 minlik falsifikator ordusu ilə sözün əsl mənasında mücadilə aparmışıq. Bu mücadilənin həta qapalı seçki məkanında, 12 saatlıq vaxt limiti çərçivəsində belə nə qədər çətin olduğunu bizdən yaxşı bilən yoxdur. Düzdür, sosial şəbəkələrin genişlənməsi, audio-video texnologiyaların inkişafı nəzarət prosesini çətinləşdirdiyi qədər də müşahidəçiliyi asanlaşdırıb. Azərbaycanda son parlament seçkilərində hətta institutlaşdırılmış müşahidə sisteminin olmadığı şəraitdə seçki saxtakarlığı dünya boyunca yayıldı.
Və onu da çox gözəl bilirik ki, zaman limitinin bir neçə gün uzadıldığı, qapalı məkanın baraklarla, çadırlarla, avtobus dayanacaqları, avtomobillərin dal oturacaqları ilə əvəz edildiyi, üstəlik böyük əksəriyyətin online səs verdiyi şəraitdə seçki prosesinin müşahidəsi, onun qanun çərçivəsində getməsinə nəzarət etmək mümkün deyil. Əlinə bir qutu alıb vertolyotlarla, traktorlarla, at arabaları, xizəklərlə yığılıb gətirilən bülletenlərdən nə çıxacağı heç kimdə şübhə doğura bilməz.
Rusiya artıq ötən referendum səsverməsindən etibarən seçkiyə seçki görkəmi verməyə ehtiyac duymayıb, seçkiyə seçki görkəmi verən elementlərdən, atributlardan imtina edib. Rusiyada srağagünkü Duma seçkilərinə ən gözəl qiyməti “Exo” portalının müxbiri, bloqçu Aleksandr Nevzorov verdi:
“Həyatda əbədi olaraq yuyulmamaq, təmizə çıxmamaq üçün orada sadəcə iştirak kifayət idi. Vacib deyil hansı keyfiyyətdə – təşkilatçı kimi, namizəd, müşahidəçi, seçici, süpürgəçi kimi, ya seçki qutusu düzəldən dülgər kimi. Hansı rolun daha məzəli və ya rüsvayçı olduğunu demək çətindir, mən saxtakara üstünlük verirəm. Çünki saxtakar fırıldaqçıdır, fırıldaqçıya isə fırıldaq etmək üçün ağıl elementləri lazımdır.
Saxtakarlar ağıl təqdim etdilər. Amma bu seçkilərə dəyişikliklərə, həqiqətə, ağıllı səsverməyə inanıb gedənlər təqdim edə bilmədilər.
Bu gün hətta ən kütlərə nəhayət aydın olmalıdır ki, bu ölkənin taleyini seçkilər həll etməyəcək.”
Bunu Nevzorov deyib. Xüsusi olaraq İlqar Məmmədov, Natiq Cəfərli və onlarkimilər üçün deyib.