AXCP sədri Əli Kərimli
19 oktyabr 2019-cu il mitinqində son ana qədər məni tərk etməmiş bu cəsur igidi – ictimai əsaslarla mühafizəçim Niyaməddin Əhmədovu rejim 15 il müddətinə azadlıqdan məhrum etməyə hazırlaşır. Niyaməddin bəyə qarşı irəli sürülmüş terroru maliyyələşdirmə ittihamının tamamilə saxta olduğunu bu ölkədə hamı bilir. Əliyev hakimiyyəti Niyaməddin bəydən qisas alır. Ondan dürüst, ləyaqətli, əqidəsinə sədaqətli olmasının qisasını alırlar. Rejim Niyaməddin bəyə oğru və korrupsionerlərin yox, zalıma qarşı haqq davası aparanların sırasında, həm də ön cərgədə olmasını bağışlamır. Bütün qəzəb və nifrətlərini yönəldiblər bu günahsız gəncə qarşı.
Niyaməddin Əhmədov əgər erməni diversantı olsaydı, 6 aylıq azadlıqdan məhrumetmə ilə canını qurtarardı. Niyaməddin Əhmədov əgər özəl həbsxana saxlayan MTN generalı olsaydı, 3-4 illə canını qurtarardı. Niyaməddin Əhmədov milyardları oğurlamış oliqarx olsaydı, oğurladığının 80-90 faizini məlum hesablara keçirməyə razılaşıb, öz “fəxri pensioner oliqarx” həyatını davam etdirərdi. Niyaməddin Əhmədov 10 milyonlarla manat xalq sərvətini, o cümlədən yüzlərlə insanın son ümid yeri olan ünvanlı sosial yardımları mənimsəmiş icra başçısı olsaydı, uzaqbaşı 8-9 ay “burjuy” kamerada cəza çəkib, “səhhətilə bağlı” azadlığa çıxardı. Ancaq Niyaməddin bəy oğrular dəstəsindən deyil, oğrular dəstəsinə qarşıdır. Xalqını, həqiqəti, azadlığı, ədaləti çox sevir, ləyaqətini uca tutur. Ona görə də rejim ona düşməncəsinə yanaşır. Bu xalqın Niyaməddin bəy kimi ləyaqətli oğullarına nifrət püskürür, Niyaməddinlərin çox olmasından qorxur. Xalqın bir gün qorxusuna qalib gəlib, haqqını kütləvi şəkildə tələb edəcəyindən Niyaməddin Əhmədov, Əlizamin Salayev kimi cəsur oğulların da bu mübarizənin ön cərgəsində olacağından qorxur. Qorxduğu üçün qəddarlıq edir.
Rejim qanunsuz və anti-insani yolla olsa da, öz marağını müdafiə edir. Bəs biz xalq olaraq necə, hüquq və mənafelərimizi qorumağa çalışırıqmı? Fərqindəyikmi ki, Niyaməddin Əhmədov, Əlizamin Salayev kimi cəsur oğulları müdafiə etmək tək cəbhəçilərin, hətta tək müxalifətçilərin yox, xalq olaraq hər birimizin işi olmalıdır? Fərqindəyikmi ki, hazırda mübarizənin ön cəbhəsində mövqe tutan cəsarətli siyasətçilərin, vətəndaş cəmiyyəti fəallarının, jurnalistlərin həbsi, susdurulması bu gözəl Vətənimizi də Türkmənistanlaşdırar, Şimali Koreyalaşdırar? Bilirikmi? Fərqindəyimki? Biliriksə, fərqindəyiksə, susmayaq, bu rəzalətə göz yummayaq, rejim xalqın etiraz səsini eşitsin, məğrur iradəsini hiss etsin! Niyaməddin Əhmədova və şərlənərək həbs olunmuş bütün soydaşlarımıza azadlıq!