Elnur Sadıqov
Əliyevlərlə Elçibəy siyasətinin toqquşduğu nöqtələrdən biri də İran siyasətiydi. Əliyevlər hesab edirdi ki, Elçibəyin Bütöv Azərbaycan siyasəti İrana ərazi iddiası irəli sürməkdir, bu da onları qıcıqlandırır və Azərbaycana qarşı aqressiv davranışa təhrik edir. Əliyevlər hesab edirdi ki, İrana münasibətdə mehriban qonşuluq siyasəti yürüdülməli, İranın maraqlarına toxunan addımlardan çəkinmək lazımdır və belə olan halda İran Azərbaycana dost münasibət göstərəcək, Ermənistana yardım etməyəcək. Buna görə də 1990-cı illərdə Elçibəyin başlatdığı Bütövlük hərəkatı beşiyindəcə boğuldu, İsraildə Azərbaycan səfirliyinin açılmasından imtina edildi. Nəticə isə göz qabağındadır. Azərbaycan İranın maraqlarına zidd olan heç bir addım atmadığı halda misli görünməmiş bir təhdidlə üz-üzə qalıb. Əliyevlərin bu siyasəti də iflasa uğradı.
İran Azərbaycana özünün inqilab ideyalarını ixrac edib. Bu zərərli ideyanın daşıyıcısı olan müəyyən bir təbəqə formalaşdıra bilib və bu vasitəylə daxildən ölkə siyasətini təsirləndirə biləcək alətə sahib olub. Buna qarşı da Azərbaycan əliyalın durumdadır, ideoloji boşluq yaranıb.
Təcili şəkildə cavab tədbirləri kimi aşağıdakı istiqamətlərdə işlər görülməlidir:
1)Bütöv Azərbaycan ideyası ictimai fikirdə aktivləşdirilməlidir;
2)Ölkənin dini mühiti İranın təsir dairəsindən çıxarılmalıdır;
3)İsraildə Azərbaycan səfirliyi açılmalıdır.
Əks halda İrandan gələn təhdidlər günü-gündən böyüyəcək.