AXCP sədri Əli Kərimli
İlham Əliyev hökuməti artıq neçə illərdir ki, xalqın problemlərini həll etməklə yox, köhnə dərdləri yeni dərdlə unutdurmaqla məşğuldur. Məsələn, xalq elliklə uşaqpulu istəyən bir vaxtda bunlar götürüb 200 mindən artıq (186 min nəfər yaşa görə, 18 min əlilliyə görə) insanı pensiya və müavinətdən məhrum etdilər. Beləliklə, yeni gündəmə gələn pensiya tələbi uşaq pulu tələbini qismən unutdurdu.
İnsan haqqları və müxalifətə qarşı repressiyalar sahəsində də vəziyyət eynidir.
10 gün bundan əvvəl Milli Şura Koordinasiya Mərkəzinin üzvü, ədliyyə generalı Vidadi Mirkamalın indiyə qədər aldığı qanuni pensiyasına görə 103 min manat cərimələnməsi gündəmin əsas məsələsi idi. Ancaq elə ki, prokuror günahsız və əqidəli cəbhəçi gənc Niyaməddin Əhmədova 15 il azadlıqdan məhrumetmə tələb etdi, təbii olaraq gündəm dəyişdi. Hökumətin Vidadi müəllimdən 103 min manat almaq cəhdi də, 17 saylı CÇM-nin rəisi Şakir Qəniyevin AXCP fəalı, siyasi məhbus Əlizamin Salayevə şəxsən işgəncə verməsi də, Əlizamin bəyin 22 gün ərzində davam etdirdiyi aclıq aksiyası da, İlham Əliyevdən ac uşaqlarına uşaqpulu tələb etdiyi üçün şərlənib həbs olunmuş AXCP üzvü Aqil Hümbətovun acınacaqlı durumu da avtomatik keçdi arxa plana. Necə ki, Əlizamin Salayevin, Niyaməddin Əhmədovun, Aqil Hümbətovun qanunsuz həbsləri, Milli Şura KM üzvləri Gültəkin Hacıbəylinin 91 min manat (artıq ödətdiriblər), Vidadi Mirkamalın 103 min manat cərimə olunması Saleh Rüstəmlinin, Aqil Məhərrəmlinin, Paşa Umudovun, Tale Bağırzadə başda olmaqla çoxsaylı inanclı məhbusların həbsini gündəmdə nisbətən arxa plana keçirə bilmişdi. Bütün bu sadaladıqlarım hamısı birlikdə isə demokratik düşərgənin diqqətinin daha dəhşətli olan Tərtər işinə tam cəlb edilməsinə zaman-zaman mane olmuşdu. Hökumətin məkri, hiyləsi, “təzə dərdlə köhnə dərdi unutdurmaq” siyasətinin mexanizmi aydın oldumu?
Bəs çarə nədir? Necə edək ki, hakimiyyət təzə dərdimizlə köhnə dərdlərimizi “unutdurmaq” yolu ilə bizi yola verə bilməsin? Əvvəla, qısayaddaşlı olmayaq. Unutmayaq ki, xalq olaraq başımıza gələnlərin əksəriyyəti yaddaşımızın qısa olması səbəbindəndir. Heç bir qanunsuz həbsi, işgəncəni, cəriməni, başqa repressiv hərəkətləri unutmayaq. Kimsəni tək və diqqətsiz qoymayaq. Sosial şəbəkələr bizə məhdudiyyət qoymur nə qədər yazmaq, danışmaq, yazılanları paylaşmaq olar. Biz də özümüzə o məhdudiyyəti qoymayaq. Çalışaq, hüququ pozulan hər kəsi diqqətdə saxlayaq. Çox yazaq, paylaşaq, müzakirə edək.
İkincisi və daha vacibi, ölkənin bu rejimdən xilasını hər gün düşünməliyik. Rejim dəyişikliyindən sonra xalqımızın önündə açılacaq imkanları təsvir etməklə, rejimin ictimai rəyi aldatmasına imkan verməməklə və təşkilatlanmaqla ölkədə köklü dəyişiklikləri tezləşdirməliyik! Unutmamalıyıq ki, rejim davam etdikcə gündəmimiz hər zaman hüquqsuzluq, ədalətsizlik və repressiya olacaq. Belə olmaması üçün daha çox çalışmalı, daha fədakar olmalıyıq.