Milli Şuranın Koordinasiya Mərkəzinin üzvü Rafiq Manaflı
Dövlət təqaüdçü Vidadi Mirkamalı siyasi baxışlarına görə 103 min manat məbləğində cərimə edib. Vidadi bəy özü bu haqda geniş açıqlama verdi. Sonra sosial şəbəkə bununla bağlı 3-4 gün dalğalandı və təəssüf ki , bir az sakitləşdi. Amma əslində heç sakitləşməməliydi, bu vəhşət durdurulana qədər getdikcə artan amplituda ilə dalğalanmalı, fırtınaya çevrilməli idi. 103 min manatla imtahana çəkilən bu gün Vidadi Mirkamaldır, bu pul onun cibindən çıxacaq. Susub məlalla baxacağıqsa sabah hər birimizin cibini kəsdirəcək.
Dövlətin bir təqaüdçüyə ödədiyi təqaüdə, özü də bütün həyat fəaliyyəti ilə qazandığı, haqq etdiyi təqaüdə göz dikməsi, bir insanı öz düşüncələrinə görə elmlər doktoru, ədliyyə generalı, I dərəcəli hakim statusunda Azərbaycan dövlətçiliyinin möhkəmləndirilməsi naminə əməyi ilə qazandığı təqaüdlə cəzalandırması, qazandığı təqaüddən başqa heç bir gəlir mənbəyi olmayan yaşlı bir insanı yaşam sınağına çəkməsi rəzalətdir. Bu rəzalət durdurulmalıdır və durdurulana qədər susmaq olmaz.
Vidadi Mirkamal yüksək dövlət vəzifələrində fəaliyyət göstərib və həmin vəzifələrə uyğun təqaüd ona verilməlidir.
Vidadi Mirkamal ədliyyə generalıdır və general rütbəsinə görə nəzərdə tutulan təqaüdü almalıdır.
Vidadi Mirkamal I dərəcəli hakimdir və bu statusa görə ona ödənilməli təqaüd ödənilməlidir.
Bunu Qanun tələb edir. Əgər qanun işləmirsə, dövlət yoxdursa, cəngəllikdə yaşayırıqsa desinlər, işimizi bilək.