Milli Şuranın Koordinasiya Mərkəzinin üzvü Gültəkin Hacıbəyli
Bu şəklə diqqətlə baxın! Çox diqqətlə baxın! Öz taleyinizə, gələcəyinizə, hətta övladlarınızın gələcəyinə baxırmışsınız kimi baxın. Çünki, gerçək budur. Çünki bu şəkil Azərbaycanın və bizim taleyimizin şəklidir.
Biz “Azərbaycan Türkmənistan deyil, ola bilməz”-i bu şəklə güvənərək demişik həmişə. Bu şəkildəki müqavimətə, dirənişə, qətiyyətə güvən bir çox hallarda cəmiyyəti də arxayın salıb ki, müxalifət onsuz da mübarizə aparır, biz müxalifət deyilik ki, önə çıxaq, əziyyət çəkək. Biz başımızı aşağı salıb öz həyatımızı yaşayaq, çörəyimizi qazanaq, qrantımızı yeyək. Sanki döyülmək, söyülmək, işdən qovulmaq, həbs olunmaq, işgəncə görmək müxalifətin vəzifə borcudur və buna görə müxalifətçilər haradansa çox yüksək maaş alır. Hələ guya demokratiyaya xidmət etdikləri üçün xaricdən aldıqları qrantların hesabına ev tikən, maşın alan, kurortlarda gəzən, indi də konfiqurasiya çörəyi yeyən bəziləri də sinəsini irticaya sipər edən bu insanları illər uzunu təhqir edib aşağılayırlar. Halbuki şəkildə gördüyümüz bu dirəniş olmasa onlar heç kimə lazım olmayacaqlar. Ədalət müəllimə heç lazım olmayacaqlar…
Amma çoxlarının “müxalifətin vəzifəsi” hesab etdiyi bu dirəniş bilirsinizmi hansı qurbanların hesabına başa gəlir?!
Əli Kərimlinin alnına vurulan doqquz tikişin, ailəsinin, nəslinin pərən-pərən salınmasının, təkcə qaynının həyatından oğurlanmış 6 ilin hesabına.
Tofiq Yaqublunun işgəncə altında sındırılmış qabırğasının və 36 dəfə (!) yaşadığı həbsi hesabına.
Gözəl Bayramlının xəstə ikən həbs olunub dərmansız qalması nəticəsində faktiki qətl edilməsi hesabına.
Oqtay Gülalıyevin dəfələrlə edilən açıq və gizli təhdidlərdən sonra qəzaya salınaraq faktiki məhv edilməsi hesabına.
Ibrahim Ibrahimlinin bir həyatını haqq savaşına qurban verməsi, dəfələrlə yaşadığı həbslər və işgəncələr hesabına.
Qarabağ savaşı qəhrəmanı Saleh Rüstəmlinin özünün və 7-dən 77-yə bütöv bir nəslinin ödədiyi ağır bədəl hesabına.
Qarabağ qaziləri Asif Yusiflinin, Babək Həsənlinin həbslərdə çürüdülən illəri, yaşadıqları işgəncələr hesabına.
Dörd dəfə siyasi məhbus həyatı yaşayan və son həbsi zamanı işgəncə altında təzyiqi sıfra düşdüyü üçün ölüm xəbəri yayılan Fuad Qəhrəmanlının fədakarlığı hesabına…
İndi isə Niyaməddin Əhmədov.
Həyatda bir qarışqaya belə qıymayan bu cəsur, mərd, tərbiyəli, namuslu gəncin iki böyük suçu var:
- 19 oktyabr aksiyasında Əli Kərimlini sonadək tək qoymamaq (şəkildə);
- Ona verilən işgəncələrə rəğmən Əli Kərimlini şərləməmək.
Buna görə Niyaməddin bəyi 15 illik həbs cəzası gözləyir! Ölkəmizə soxulmuş erməni terrorçuları, diversantları 6 ay həbs cəzası alıb düşmən ölkəyə qaytarılır, öz həyat yoldaşına amansız işgəncələr verərək 7 bıçaq zərbəsi ilə öldürmüş şərəfsizin biri 10 il həbs cəzası alır, amma üzə durmaqdan, adam şərləməkdən imtina etdiyinə görə günahsız ləyaqətli, namuslu bir gənc 15 il azadlıqdan məhrum edilir, çünki o, ölkəsinin Türkmənistana çevrilməməsi üçün sinəsini repressiya maşına sipər edib istibdada, irticaya qarşı dirənib!
Cəmiyyət nəyi gözləyir?! Müxalifətin hazırda fraqment şəklində qalan son elementlərinin də fiziki cəhətdən məhv edilməsinimi? Əli Kərimlinin, Tofiq Yaqublunun, Cəmil Həsənlinin öldürülməsinimi?! Müqavimətin qırılmasınımı? Ölkənin tamamən Türkmənistana çevrilməsinimi?!
Ölkə iqtisadiyyatı çöküb, yoxsulluq və səfalət günbəgün artır. Dövlət hətta ən çox ehtiyacı olan sosial qrupları- qaziləri, şəhid ailələrini, müharibə iştirakçılarını, əlilləri, aztəminatlı ailələri təmin etmək iqtidarında və istəyində deyil. Yüz mindən çox insanın pensiyası, müavinəti kəsilib. Sosial narazılıq zirvədə. Haqsızlıq, ədalətsizlik, korrupsiya tüğyan edir. Məhkəmə institutu ədalət mühakiməsinin başını buraxıb Bakı Marionet Teatrının funksiyasını üstlənib və bu sahədə ciddi uğurları var. Təhsilin səviyyəsi sürətlə geriləyir. Ölkənin bayrağına hörmət edən mötədil dini liderlər həbsdə çürüdülür. Dini fanatizmin, radikalizmin yayılması üçün bundan münbit şərait ola bilərmi?! Ən yaxın qonşumuz olan Iranda 70-ci illərin sonlarında hadisələr belə başlamadımı?! Əfqanıstanın Taliban gerçəyi bu zəmindən qaynaqlanmadımı?!
Ürək açan bircə reallıq budur ki, dünya diktaturalarla vidalaşmağa qərarlıdır. Amma xalqlar da bunun üçün fədakarlıq etməli, mübarizə aparmalıdırlar. Əlbəttə, özlərini ləyaqətli həyata layiq bilirlərsə…
Niyaməddin Əhmədovun xilası Niyaməddin Əhmədovdan çox Azərbaycan xalqına lazımdır.
Türkmənistanda yaşamaq istəmirsə…